ଡେରାଡୁନ : ଚମୋଲିର ତପୋବନରେ ଆସିଥିବା ହିମସ୍ଖଳନରେ ନରେନ୍ଦ୍ର ନଗର ଗୁଲର ବାସିନ୍ଦା ଆଲମ ସିଂହ ପୁଣ୍ଡିରଙ୍କ ମୃତ୍ୟୁ ହୋଇଯାଇଛି । ଆଲମ ସିଂଙ୍କ ମୃତ୍ୟୁ ପରେ ତାଙ୍କର 4 ଝିଅ ବେସାହାରା ହୋଇଯାଇଛି । ବର୍ତ୍ତମାନ ତାଙ୍କ ପରିବାର ଜୀବିକା ପାଇଁ ସଂଘର୍ଷ କରୁଥିବା ଦେଖିବାକୁ ମିଳୁଛି । ଏହି ଖବର ପ୍ରସାର ହେବା ମାତ୍ରେ ଅଭିନେତା ସୋନୁ ସୁଦ ଆଲମଙ୍କ ଚାରି ଝିଅଙ୍କୁ ପୋଷ୍ୟ ଭାବେ ଗ୍ରହଣ କରିବାକୁ ନିଷ୍ପତ୍ତି ନେଇଛନ୍ତି ।
ଏହା ପୂର୍ବରୁ କୋରୋନା ମହାମାରୀ ସମୟରେ ଦିନ ମଜୁରିଆ ଓ ବେସାହାରା ଲୋକଙ୍କୁ ଅନେକ ସାହାଯ୍ୟ କରିଥିବା ସୋନୁ ସୁଦ ପୁନଶ୍ଚ ନିଜର ମାନବିକତା ଦେଖାଇଛନ୍ତି । ଗତ ଫେବୃଆରୀ 7 ତାରିଖରେ ଉତ୍ତରାଖଣ୍ଡର ଚମୋଲିଠାରେ ହିମ ସ୍ଖଳନ ଯୋଗୁଁ ଅନେକ ଲୋକଙ୍କ ମୃତ୍ୟୁ ଘଟିଥିଲା । ସେଥିରେ ଆଲମ ସିଂହ ପୁଣ୍ଡିରଙ୍କ ମୃତ୍ୟୁ ହୋଇଥିଲା । ତାଙ୍କ ପରିବାର ପ୍ରତିପୋଷଣ କରିବା ପାଇଁ ଏକମାତ୍ର ଆଲମ ସିଂ ହିଁ ଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
