ଲକ୍ଷ୍ନୌ: ଉତ୍ତରପ୍ରଦେଶ ମୈନପୁରୀ ଜିଲ୍ଲାରେ ଭୟଙ୍କର ଦୁର୍ଘଟଣା । ଗୋଟିଏ ଘର ଉପରେ ଟ୍ରକ ମାଡିଯିବାରୁ ୪ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଜଣେ ଅବସରପ୍ରାପ୍ତ ସବ୍-ଇନ୍ସପେକ୍ଟର ଓ ତାଙ୍କ ପତ୍ନୀ ରହିଛନ୍ତି । ଏଥିରେ ୫ ଜଣ ଆହତ ମଧ୍ୟ ହୋଇଛନ୍ତି । ମୈନପୁରୀ ଅନ୍ତର୍ଗତ ଜିଟି ରୋଡ ନିକଟରେ ଏହି ଦୁର୍ଘଟଣା ହୋଇଛି । ଏବେ ବି ଘରର ଭଗ୍ନାବଶେଷ ତଳେ ଜଣେ ଚାପି ହୋଇ ରହିଥିବାବେଳେ ତାଙ୍କୁ ବାହାର କରିବାକୁ ଉଦ୍ଧାର କାର୍ଯ୍ୟ ଜାରି ରହିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି ।
ସୂଚନା ଅନୁଯାୟୀ, ଏକ ଟ୍ରକ ଯାଉଥିବା ସମୟରେ ହଠାତ୍ ଭାରସାମ୍ୟ ହରାଇ ଜିଟି ରୋଡ ନିକଟ ରାସ୍ତାକଡରେ ଥିବା ଏହି ଘର ଉପରେ ମାଡି ଯାଇଥିଲା । ଫଳରେ ଘରଟି ଭାଙ୍ଗି ମାଟିରେ ମିଶିଯାଇଥିଲା । ତେବେ ଏଥିରେ ଅବସରପ୍ରାପ୍ତ ସବ୍-ଇନ୍ସପେକ୍ଟର ଓ ତାଙ୍କ ପତ୍ନୀଙ୍କ ସମେତ ଟ୍ରକରେ ଥିବା ଦୁଇ ଜଣଙ୍କର ମଧ୍ୟ ମୃତ୍ୟୁ ହୋଇଛି । ଏନେଇ ସୂଚନା ପାଇବା ମାତ୍ରେ ପୋଲିସ ଫୋର୍ସ ଘଟଣାସ୍ଥଳରେ ପହଞ୍ଚି ୪ ଜଣଙ୍କ ମୃତଦେହ ଉଦ୍ଧାର କରିଛନ୍ତି । ଘଟଣାସ୍ଥଳରେ ଜିଲ୍ଲାପାଳ ଏବଂ ଏସପି ମଧ୍ୟ ପହଞ୍ଚି ଅନୁଧ୍ୟାନ କରୁଛନ୍ତି ।
