ଲକ୍ଷ୍ନୌ: ଉତ୍ତରପ୍ରଦେଶର ଝାନ୍ସୀରେ ମର୍ମନ୍ତୁଦ ସଡକ ଦୁର୍ଘଟଣା । ମା'ଙ୍କ ଦର୍ଶନ ସାରି ଶ୍ରାଦ୍ଧାଳୁଙ୍କୁ ନେଇ ଫେରୁଥିବା ଏକ ଟ୍ରାକ୍ଟର ଓଲଟି 11 ଜଣଙ୍କ ମୃତ୍ୟୁ ହୋଇଛି । ଦୁର୍ଘଟଣାରେ 12ରୁ ଉର୍ଦ୍ଧ୍ବ ଆହତ ହୋଇଥିବା ମିଳିଛି ସୂଚନା । ଆହତଙ୍କୁ ଉଦ୍ଧାର କରି ଝାନ୍ସି ମେଡିକାଲ କଲେଜରେ ଭର୍ତ୍ତି କରାଯାଇଛି ।
ଛାତି ଥରାଇଦେବା ଭଳି ଏହି ଦୁର୍ଘଟଣା ଝାନ୍ସୀ ଚିରଗାଁ ଥାନା ଅଞ୍ଚଳରେ ଘଟିଛି । ସୂଚନା ଅନୁଯାୟୀ, ଦେବୀ ମା'ଙ୍କ ଦର୍ଶନ କରି ଅନେକ ଭକ୍ତି ଟ୍ରାକ୍ଟର ଯୋଗେ ପଣ୍ଡୋଖରରୁ ଝାନ୍ସୀ ଫେରୁଥିଲେ । ଏହି ସମୟରେ ରାସ୍ତାରେ ଟ୍ରାକ୍ଟର ସାମ୍ନାରେ ଏକ ବନ୍ୟଜନ୍ତୁ ଚାଲିଆସିଥିଲା । ଫଳରେ ଡ୍ରାଇଭର ଟ୍ରାକ୍ଟର ଉପରୁ ନିୟନ୍ତ୍ରଣ ହରାଇବାରୁ ଏହା ଓଲଟିପଡିଥିଲା ।
ସମସ୍ତ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ଏଠାରେ 11 ଜଣଙ୍କୁ ମୃତ ଘୋଷଣା କରିଥିଲେ ଡାକ୍ତର । ମୃତକଙ୍କ ମଧ୍ୟରେ 7 ଜଣ ମହିଳା ଓ 4 ଜଣ ଶିଶୁ ସାମିଲ ଅଛନ୍ତି ।
