ରାମୋଜୀ ଫିଲ୍ମ ସିଟି(ହାଇଦ୍ରାବାଦ): ସୁନ୍ଦର ତୋରଣ ଓ ରଙ୍ଗବେରଙ୍ଗର ଆଖିଝଲସା ସୁସଜ୍ଜିତ ଆଲୋକମାଳା ପରିବେଶରେ ରାମୋଜୀ ଗ୍ରୁପ ଚେୟାରମ୍ୟାନ୍ ରାମୋଜୀ ରାଓଙ୍କ ନାତୁଣୀ ବ୍ରିହତିଙ୍କ ବିବାହ ଉତ୍ସବ ମହାଆଡମ୍ବରରେ ହାଇଦ୍ରାବାଦ ସ୍ଥିତ ରାମୋଜୀ ଫିଲ୍ମ ସିଟିରେ ସମ୍ପନ୍ନ ହୋଇଛି । ଭେଙ୍କଟ ଅକ୍ଷୟଙ୍କୁ ଜୀବନସାଥୀ କରିଛନ୍ତି ବ୍ରିହତି । ରବିବାର ରାତ୍ରି ସମୟ (୧୨.୧୮)ଟାରେ ବିବାହ ଉତ୍ସବ ଅନୁଷ୍ଠିତ ହୋଇଯାଇଛି । ପରିବାର ସଦସ୍ୟ ଓ ସମ୍ପର୍କୀୟଙ୍କ ବ୍ୟତୀତ ଅନେକ ଭିଆଇପି, ରାଜନେତା ଓ ଚଳଚିତ୍ର ଇଣ୍ଡଷ୍ଟ୍ରୀର ବିଶିଷ୍ଟ ବ୍ୟକ୍ତି ଫିଲ୍ମ ସିଟିରେ ଅନୁଷ୍ଠିତ ଏହି ବିବାହ ଉତ୍ସବରେ ଅତିଥି ଭାବେ ଯୋଗଦେଇଥିଲେ । ଏକ ସ୍ବତନ୍ତ୍ରଭାବେ ପ୍ରସ୍ତୁତ ଷ୍ଟେଜ୍ରେ ବିବାହ ଉତ୍ସବ କରାଯାଇଥିଲା ।
ବିଶିଷ୍ଟ ରାଜନେତା ଓ ସୁପ୍ରିମକୋର୍ଟ ମୁଖ୍ୟ ବିଚାରପତି ଥିଲେ ସାମିଲ:
କିରଣ ଚେରୁକୁରୀ ଓ ସୈଳାଜାଙ୍କ ଝିଅ ବ୍ରିହତି, ଦନ୍ଦମୁଡି ଅମର ମୋହନଦାସ ଓ ଅନୀତାଙ୍କ ପୁତ୍ର ଭେଙ୍କଟ ଅକ୍ଷୟଙ୍କୁ ବିବାହ କରିଛନ୍ତି । ରବିବାର ରାତ୍ରି ସମୟ (୧୨.୧୮)ଟାରେ ବିବାହ ହୋଇଥିଲା । ବିଭିନ୍ନ ରାଜନେତା, ଟଲିଉଡର ବହୁ ଲୋକପ୍ରିୟ କଳାକାରଙ୍କ ସହ ବିଶିଷ୍ଟ ଶିଳ୍ପପତିମାନେ ବିବାହରେ ସାମିଲ ହୋଇଥିଲେ । ଉପରାଷ୍ଟ୍ରପତି ଭେଙ୍କୟା ନାଇଡୁ ଓ ତାଙ୍କର ପତ୍ନୀ ଉଷା, ସୁପ୍ରିମକୋର୍ଟ ମୁଖ୍ୟ ବିଚାରପତି ଏନଭି ରମଣାଙ୍କ ସମେତ ହରିୟାଣା ରାଜ୍ୟପାଳ, ଆନ୍ଧ୍ର ଓ ତେଲେଙ୍ଗାନା ମୁଖ୍ୟମନ୍ତ୍ରୀ, କେନ୍ଦ୍ର ପର୍ଯ୍ୟଟନ ମନ୍ତ୍ରୀ ଜି କିଶାନ ରେଡ୍ଡୀ, ତେଲେଙ୍ଗାନା ମନ୍ତ୍ରୀ ହରିଷ ରାଓ, ମହମ୍ମଦ ଅଲୀ, ଇନ୍ଦ୍ରକରଣ ରେଡ୍ଡୀ, ଆନ୍ଧ୍ରପ୍ରଦେଶ ହାଇକୋର୍ଟ ବିଚାରପତିମାନଙ୍କ ଓ ଅନ୍ୟ ବିଶିଷ୍ଟବ୍ୟକ୍ତି ମଧ୍ୟ ବିବାହରେ ଯୋଗ ଦେଇ ବରକନ୍ୟାଙ୍କୁ ଆଶୀର୍ବାଦ ପ୍ରଦାନ କରିଥିଲେ । ଭାରତ ବାୟୋଟେକ ସିଏମଡି କ୍ରିଷ୍ଣା ଇଲା ଏବଂ ବ୍ୟାଙ୍କ ଅଫ୍ ଇଣ୍ଡିଆର ପୂର୍ବତନ ଗଭର୍ଣ୍ଣର ପ୍ରମୁଖ ଅତିଥି ଭାବେ ଯୋଗ ଦେଇଥିଲେ ।
ବିବାହରେ ସାମିଲ ଥିଲେ ବହୁ ସୁପରଷ୍ଟାର:
ସେହିପରି ବିବାହ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିବା ପ୍ରମୁଖ ଚର୍ଚ୍ଚିତ ଷ୍ଟାର ତଥା ବ୍ୟକ୍ତିବିଶେଷଙ୍କ ମଧ୍ୟରେ ରହିଥିଲେ ପ୍ରଖ୍ୟାତ ଟଲିଉଡ୍ ନିର୍ଦ୍ଦେଶକ ଏସଏସ ରାଜମୌଲି, ଟଲିଉଡ ମେଗାଷ୍ଟାର ଚିରଞ୍ଜୀବୀ, ତାମିଲ ସୁପରଷ୍ଟାର ରଜନୀକାନ୍ତ ଓ ବ୍ୟାଡମିଣ୍ଟନ ଷ୍ଟାର ପିଭି ସିନ୍ଧୁ । TDP ଜାତୀୟ ସଭାପତି ନାରା ଚନ୍ଦ୍ରବାବୁ ନାଇଡୁ, ତାଙ୍କର ପୁଅ ଲୋକେଶ, ଜନସେନା ସଭାପତି ଓ ଫିଲ୍ମ ଅଭିନେତା ପବନ କଲ୍ୟାଣ ମଧ୍ୟ ଏହି ବିବାହ ଉତ୍ସବରେ ସାମିଲ ହୋଇଥିଲେ । ଅତି ଧୁମଧାମରେ ବିଳମ୍ବିତ ରାତିରେ ବିବାହ କାର୍ଯ୍ୟ ସମ୍ପର୍ଣ୍ଣ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
