ନୂଆଦିଲ୍ଲୀ: ଗୁଜରାଟର ଆନନ୍ଦଠାରେ ବୁଧବାର ଠାରୁ ଆରମ୍ଭ ହୋଇଥିବା କୃଷି ଓ ଖାଦ୍ୟ ପ୍ରକ୍ରିୟାକରଣ ଜାତୀୟ ଶିଖର ସମ୍ମିଳନୀର ଅନ୍ତିମ ଅଧିବେଶନକୁ ଆଜି(ଗୁରୁବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୂର୍ବାହ୍ନ ୧୧ ଟାରେ କୃଷକମାନଙ୍କୁ ଉଦବୋଧନ ଦେବେ । ଭିଡିଓ କନଫରେନ୍ସି ଯୋଗେ ପ୍ରଧାନମନ୍ତ୍ରୀ ଦେଶର କୃଷକମାନଙ୍କୁ ଉଦବୋଧନ ଦେବେ । ଏହି ସମ୍ମିଳନୀରେ ବିଶେଷ କରି ପ୍ରାକୃତିକ ପ୍ରଣାଳୀରେ ଚାଷବାସ କରିବା ଉପରେ ଆଲୋଚନା ହେଉଛି । ଏହାଛଡା ପ୍ରାକୃତିକ ପ୍ରଣାଳୀରେ ଚାଷ କଲେ କି ପ୍ରକାର ଲାଭ ହେବ ସେ ସମ୍ପର୍କରେ ମଧ୍ୟ ଚାଷୀଙ୍କୁ ଆବଶ୍ୟକ ସୂଚନା ଦିଆଯାଉଛି ।
ଦେଶର କୃଷକଙ୍କ କଲ୍ୟାଣ ପାଇଁ ପ୍ରଧାନମନ୍ତ୍ରୀ ଯେଉଁ ଲକ୍ଷ୍ୟ ରଖିଛନ୍ତି ତାହାକୁ ପୂରଣ କରିବା ପାଇଁ ସରକାର ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରୁଛନ୍ତି । ଉତ୍ପାଦନ ବୃଦ୍ଧିକୁ ନିଶ୍ଚିତ କରି ଚାଷୀଙ୍କ ଚାଷ ଦକ୍ଷତାକୁ ବଢାଇ ସେମାନଙ୍କୁ ଲାଭବାନ କରିବାକୁ ଉଦ୍ୟମ ଅବ୍ୟାହତ ରହିଛି । ଏହାଛଡା ଚାଷୀଙ୍କ ଆୟ ବଢାଇବାକୁ ମଧ୍ୟ ସରକାର ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରିଛନ୍ତି । ଲାଭଦାୟକ କୃଷି ପଦ୍ଧତିର ନିରନ୍ତରତା ରକ୍ଷା, କୃଷି କାର୍ଯ୍ୟରେ ବିନିଯୋଗ ଜନିତ ଖର୍ଚ୍ଚ ହ୍ରାସ, ଉତ୍ପାଦିତ ସାମଗ୍ରୀ ପାଇଁ ଉତ୍ତମ ବଜାର ସୁବିଧା ଯୋଗାଣ ଓ ସର୍ବୋପରି ଚାଷୀଙ୍କୁ ଅଧିକ ଆୟ ଦେବା ନିମନ୍ତେ ସରକାର ନାନା ପ୍ରକାର ପଦକ୍ଷେପ ତଥା ସହାୟକ ବ୍ୟବସ୍ଥା ଗ୍ରହଣ କରିଛନ୍ତି । ଏହାବାଦ ଶୂନ୍ୟ ବଜେଟ (Zero Budget Natural Farming) ପ୍ରାକୃତିକ ଚାଷ, କୃଷି କାର୍ଯ୍ୟରେ ଖର୍ଚ୍ଚ ହ୍ରାସ ପାଇଁ ଆଲୋଚନା ହେଉଛି । ଫଳରେ ସାର, କୀଟନାଶକ ଓ ଅନ୍ୟାନ୍ୟ ସାମଗ୍ରୀ କିଣିବାକୁ ଚାଷୀଙ୍କୁ ବଜାର ଉପରେ ଅଧିକ ନିର୍ଭର କରିବାକୁ ପଡିବ ନାହିଁ । ଏହା ଦ୍ବାରା ସେମାନଙ୍କ ଚାଷବାସ ଖର୍ଚ୍ଚ କମିବ ଏବଂ ଆୟ ବଢିବ ବୋଲି ସରକାର ଆଶା ରଖିଛନ୍ତି ।
ସେହିପରି ଚାଷୀଙ୍କୁ ପାରମ୍ପରିକ କ୍ଷେତ୍ରଭିତ୍ତିକ ପ୍ରଯୁକ୍ତି ବ୍ୟବହାର କରି ମାଟିର ଉର୍ବରତା ଓ ଉତ୍ପାଦକତା ଶକ୍ତି ବୃଦ୍ଧି ପାଇଁ ଉପାୟ ଯୋଗାଇ ଦେବାକୁ ପ୍ରୟାସ କରୁଛନ୍ତି ସରକାର । ଦେଶୀ ଗାଈ ଗୋବର ଓ ଗୋ-ମୁତ୍ରକୁ ସହଜରେ ବିନା ଖର୍ଚ୍ଚରେ ନିଜର ଜମିରେ ବ୍ୟବହାର କରି ଚାଷୀ ଏହାର ଉତ୍ପାଦକ ଶକ୍ତିକୁ ବଢାଇ ପାରିବେ । ଜମିର ଆର୍ଦ୍ରତା ରକ୍ଷା ପାଇଁ ଘାସପତ୍ର ଆଦି ଜୈବିକ ପଦାର୍ଥମାନ ବ୍ୟବହାର କରି ତାହାକୁ ଘୋଡାଇ ରଖିବାର ପାରମ୍ପରିକ ପଦ୍ଧତିର ଉପଯୋଗ ଉପରେ ଗୁରୁତ୍ବ ଦିଆଯାଉଛି । ଏହା ଫଳରେ ଜମିର ଆର୍ଦ୍ରତା ବର୍ଷତମାମ ରହିବ ଏବଂ ଜଳାଭାବ ସମୟରେ ମଧ୍ୟ ଏହି ପଦ୍ଧତିରେ ଜମିରୁ ଫସଲ ଉତ୍ପାଦନ କମିବ ନାହିଁ କି ମରୁଡି ଭୟ ରହିବ ନାହିଁ । ଏହାଫଳରେ ଜମିରୁ ନିରନ୍ତର ଫସଲ ଉତ୍ପାଦିତ ହୋଇପାରିବ । ଏହି ପଦ୍ଧତି ଅବଲମ୍ବନ କିରବାର ପ୍ରଥମ ବର୍ଷଠାରୁ ଚାଷୀଙ୍କୁ ଭଲ ଉତ୍ପାଦନ ମିଳିପାରିବ ।
ଏସବୁ କୌଶଳ ଉପରେ ଗୁରୁତ୍ବ ଦେବା ସହିତ ସମଗ୍ର ଦେଶର ଚାଷୀମାନଙ୍କୁ ଏସଂକ୍ରାନ୍ତ ତଥ୍ୟ ଓ ବାର୍ତ୍ତା ଯୋଗାଇବାକୁ ଗୁଜରାଟ ସରକାର(Government of Gujarat) କୃଷି ଓ ଖାଦ୍ୟ ପ୍ରକ୍ରିୟାକରଣ ଉପରେ ଏକ ତିନିଦିନିଆ ଜାତୀୟ ଶିଖର ସମ୍ମିଳନୀ (National Conclave on Natural Farming) ବୁଧବାର ଠାରୁ ଆୟୋଜନ କରିଛନ୍ତି । ଏହା ଗୁରୁବାର ଶେଷ ହେବ । ଏହି ସମ୍ମିଳନୀରେ ୫ ହଜାରରୁ ଅଧିକ କୃଷକ ଯୋଗ ଦେଇଛନ୍ତି । ଏହାଛଡା ଦେଶର ବିଭିନ୍ନ ଭାଗର ଚାଷୀମାନଙ୍କୁ ଆଇସିଆରର କେନ୍ଦ୍ରୀୟ ପ୍ରତିଷ୍ଠାନ ସମୂହ, କୃଷି ବିଜ୍ଞାନ କେନ୍ଦ୍ର ଓ କୃଷି ପ୍ରଯୁକ୍ତି ପରିଚାଳନା ସଂସ୍ଥା (ଆତ୍ମା) (Agricultural Technology Management Agency) ନେଟୱାର୍କ ମାଧ୍ୟମରେ ଆଭାସୀ (ଭିଡିଓ କନଫରେନସି) ଯୋଗେ ସମ୍ମିଳନୀରେ ସାମିଲ ହେବାର ବ୍ୟବସ୍ଥା କରାଯାଇଛି ।
@IANS
