ଚେନ୍ନାଇ: ତାମିଲନାଡୁ କଏମ୍ବାଟୋରର ଅଭିଭାବକମାନେ କୋରୋନା ସମୟରେ ବିଦ୍ୟାଳୟ ଖୋଲିବାକୁ ନେଇ ଦ୍ବନ୍ଦ୍ବରେ ପଡିଯାଇଛନ୍ତି । କିଛି ଅଭିଭାବକ 4ଟି ଶ୍ରେଣୀ ପାଇଁ ବିଦ୍ୟାଳୟ ଖୋଲିବାକୁ ଇଚ୍ଛୁକ ଥିବା ବେଳେ ଆଉ କିଛି ଅଭିଭାବକ କେବଳ ଦଶମ ଓ ଦ୍ବାଦଶ ଶ୍ରେଣୀ ପାଇଁ ବିଦ୍ୟାଳୟ ଖୋଲିବାକୁ କହିଥିବା ଦେଖିବାକୁ ମିଳିଛି ।
ରାଜ୍ୟ ସରକାର ନଭେମ୍ବର 16 ତାରିଖରୁ ରାଜ୍ୟର ଶିକ୍ଷାନୁଷ୍ଠାନମାନଙ୍କରେ କେବଳ ନବମ ଠାରୁ ଦ୍ବାଦଶ ଶ୍ରେଣୀର ଛାତ୍ରଛାତ୍ରୀଙ୍କୁ ବିଦ୍ୟାଳୟକୁ ଆସି ଶିକ୍ଷା ଗ୍ରହଣ କରିବାକୁ ଅନୁମତି ଦେଇଥିଲେ । ତଥାପି ଅଭିଭାବକମାନଙ୍କର ନିଷ୍ପତ୍ତି ଚୂଡାନ୍ତ ନିଷ୍ପତ୍ତି ହେବ ବୋଲି ସରକାର କହିଥିଲେ । ଏଥିଲାଗି ଜିଲ୍ଲାରେ ବିଦ୍ୟାଳୟ ଶିକ୍ଷା ବିଭାଗ ପକ୍ଷରୁ ସ୍କୁଲ ଖୋଲିବା ସଂପର୍କରେ ସୋମବାର ଅଭିଭାବକଙ୍କୁ ନେଇ ଏକ ସଭାର ଆୟୋଜନ ହୋଇଥିଲା । ଉକ୍ତ ସଭାରେ 60 ପ୍ରତିଶତ ଅଭିଭାବକ ଯୋଗ ଦେଇଥିଲେ ।
ତେବେ କିଛି ଅଭିଭାବକ ନବମଠାରୁ ଦ୍ବାଦଶ ଶ୍ରେଣୀ ପର୍ଯ୍ୟନ୍ତ ସମସ୍ତ ଶ୍ରେଣୀର ଛାତ୍ରଛାତ୍ରୀମାନେ ବିଦ୍ୟାଳୟକୁ ଆସି ପାଠ ପଢିବାରେ ସହମତି ପ୍ରକାଶ କରିଥିଲେ । କିନ୍ତୁ ଆଉ କିଛି ଅଭିଭାବକ କେବଳ ଦଶମ ଓ ଦ୍ବାଦଶ ଶ୍ରେଣୀ ପାଇଁ ବିଦ୍ୟାଳୟ ଖୋଲିବାକୁ କହିଥିଲେ । ଅନ୍ୟପଟେ ଆଉ କିଛି ଅଭିଭାବକ ଶିକ୍ଷାନୁଷ୍ଠାନ ଖୋଲିବାକୁ ଆଦୌ ଇଚ୍ଛୁକ ନଥିବା ବିଦ୍ୟାଳୟ ଶିକ୍ଷା ବିଭାଗର ଜଣେ ଅଧିକାରୀ ସୂଚନା ଦେଇଛନ୍ତି ।
ବିଭିନ୍ନ ପ୍ରକାର ବିଦ୍ୟାଳୟ ଓ ଏହାର ଅବସ୍ଥିତି ଅନୁସାରେ ଅଭିଭାବକମାନଙ୍କର ବିଦ୍ୟାଳୟ ଖୋଲିବାକୁ ନେଇ ମତ ବଦଳିବ । ସହରାଞ୍ଚଳରେ ଅବସ୍ଥିତ ବିଦ୍ୟାଳୟ ଖୋଲିବା ପାଇଁ 40 ପ୍ରତିଶତ ଅଭିଭାବକ ଇଚ୍ଛୁକ ଥିବା ବେଳେ ଗ୍ରାମାଞ୍ଚଳରେ ରହୁଥିବା ବିଦ୍ୟାଳୟ ଖୋଲିବାକୁ ଅଧିକାଂଶ ଅଭିଭାବକ ଇଚ୍ଛୁକ ଥିବା ଦେଖିବାକୁ ମିଳିଛି । ସେପଟେ ବେସରକାରୀ ଶିକ୍ଷାନୁଷ୍ଠାନର ଅଧିକାଂଶ ଅଭିଭାବକ ସ୍କୁଲ ଖୋଲିବା ନିମନ୍ତେ ଆଦୌ ଇଚ୍ଛୁକ ନଥିବା ଦେଖିବାକୁ ମିଳିଛି ବୋଲି ରାଜ୍ୟ ଉଚ୍ଚ ଶିକ୍ଷା ବିଭାଗର ଶିକ୍ଷକ ସଙ୍ଗଠନର ଅଧିକାରୀ ଟି. ଅରୁଲାନାନ୍ଥମ କହିଛନ୍ତି ।
