ଶ୍ରୀନଗର: ଅଗଷ୍ଟ 3 ତାରିଖରେ ରଞ୍ଜିତ ସାଗର ଡ୍ୟାମରେ ଖସିପଡିଥିବା ଭାରତୀୟ ବାୟୁସେନାର ଧ୍ରୁବ ହେଲିକପ୍ଟରର ଧ୍ବଂସାବଶେଷ ଠାବ କରିବା ପାଇଁ ନୌସେନା ସର୍ଚ୍ଚ ଅପରେସନକୁ ଜୋରଦାର କରିଛି । ହେଲିକପ୍ଟର ଉଡାଉଥିବା ଦୁଇ ପାଇଲଟ ଲେଫ୍ଟନାଣ୍ଟ କର୍ଣ୍ଣେଲ ଏବଂ କ୍ୟାପଟେନଙ୍କ ମୃତଦେହ ମଧ୍ୟ ଏପର୍ଯ୍ୟନ୍ତ ଉଦ୍ଧାର କରାଯାଇ ନାହିଁ । ତେବେ ଉଦ୍ଧାର କାର୍ଯ୍ୟ ଚାଲୁରହିଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ସଫଳତା ମିଳିନାହିଁ ।
ତେବେ ଆଜି ସବମେରାଇନ ରେସକ୍ୟୁ ୟୁନିଟର ସ୍ବତନ୍ତ୍ର ସର୍ଚ୍ଚ ଅଭିଯାନ ଆରମ୍ଭ ହୋଇଛି । ପ୍ରାୟ ୮୦ ରୁ ୧୦୦ ମିଟର ଗଭୀରରେ ଦୁର୍ଘଟଣାଗ୍ରସ୍ତ ବିମାନର ଯନ୍ତ୍ରାଂଶ ଠାବ ହେବା ନେଇ ସୂଚନା ମିଳିବା ପରେ ଅନୁସନ୍ଧାନ ଜାରି ରଖିଛି ନୌସେନାର ସବମେରାଇନ ରେସକ୍ୟୁ ୟୁନିଟ ।
ଅଗଷ୍ଟ 13 ଏବଂ 14 ମଧ୍ୟରାତ୍ରିରେ ଏକ ସ୍ବତନ୍ତ୍ର ଟିମ ସର୍ଚ୍ଚ ଅପରେସନ ଆରମ୍ଭ କରିବା ପାଇଁ ବିଶାଖାପାଟନମରୁ ପଠାନକୋଟ ବାୟୁସେନା ଷ୍ଟେସନକୁ ଜଳଭଣ୍ଡାରରେ ଉଦ୍ଧାର ପାଇଁ ଭାରୀ ଯନ୍ତ୍ରପାତି ପଠାଇ ଥିଲା । ଅଗଷ୍ଟ 11 ରେ, ଜଳଭଣ୍ଡାରରୁ ପ୍ରାୟ 80 ମିଟର ଗଭୀରତାରେ ଧୃବର ଭଗ୍ନାବଶେଷ ଚିହ୍ନଟ ହୋଇଥିବା ସୂଚନା ଦେଇଥିଲା ଭାରତୀୟ ସେନା । ଏହା ପରେ ସବମେରାଇନର ସ୍ବତନ୍ତ୍ର ରେସକ୍ୟୁ ଅପରେସନ ଆରମ୍ଭ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
