ପାଟନା: ବିହାରରେ ରାଜନୀତୈତ ସଂକଟ ଲାଗି ରହିଥିବା ବେଳେ ଆସିଲା ବଡ଼ ଖବର । ବିହାରରେ ଭାଙ୍ଗିଲା ବିଜେପି-ଜେଡିୟୁ ମେଣ୍ଟ । ରାଜ୍ୟପାଳଙ୍କୁ ଆଉ କିଛି ସମୟ ମଧ୍ୟରେ ଭେଟି ମୁଖ୍ୟମନ୍ତ୍ରୀ ନୀତିଶ କୁମାର ନୂଆ ସରକାର ଗଠନ କରିବାକୁ ଦାବି କରିବେ । ଅପରାହ୍ନ ୪ଟାରେ ଭେଟିବା ନେଇ ସୂଚନା ରହିଛି ।
ବିଧାୟକ ଦଳର ବୈଠକରେ ଜେଡିୟୁ ବିଜେପି ସହିତ ମେଣ୍ଟକୁ ଭାଙ୍ଗିଛି । ବିଧାୟକ ଦଳ ବୈଠକରେ ଏନେଇ ନିଷ୍ପତ୍ତି ନିଆଯାଇଥିବା ବେଳେ ବିଧିବଦ୍ଧ ଭାବେ ଘୋଷଣାକୁ ଅପେକ୍ଷା ରହିଛି । ମୁଖ୍ୟମନ୍ତ୍ରୀ ନୀତିଶ ଅପରାହ୍ନ ୪ଟାରେ ରାଜ୍ୟପାଳଙ୍କୁ ଭେଟିବାକୁ ଥିବା ବେଳେ ରାଜଭବନ ପରିସରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ସେ ରାଜ୍ୟପାଳଙ୍କୁ ବିଧାୟକଙ୍କ ସମର୍ଥନ ନେଇ ଚିଠି ପ୍ରଦାନ କରିବ । ନୀତିଶ କୁମାର ମୁଖ୍ୟମନ୍ତ୍ରୀ ପଦ ବଜାୟ ରଖିବା ସହିତ ତେଜସ୍ବୀ ଯାଦବ ଉପମୁଖ୍ୟମନ୍ତ୍ରୀ ହେବେ ।
ଜେଡିୟୁ ବିଧାୟକ ଦଳ ବୈଠକ ପରେ ମୁଖ୍ୟମନ୍ତ୍ରୀ ନୀତିଶ କହିଛନ୍ତି, " ବିଜେପି ସବୁବେଳେ ଆମକୁ ଅପମାନ କରିଛି । ବିଜେପି ପକ୍ଷରୁ ଆମ ଦଳକୁ ଭାଙ୍ଗିବାକୁ ଉଦ୍ୟମ କରାଯାଇଛି । ବିଜେପି ଏନେଇ ଷଡ଼ଯନ୍ତ୍ର କରିଥିଲା ।" ସେପଟେ ଉପମୁଖ୍ୟମନ୍ତ୍ରୀ ପଦ ସହିତ ଗୃହ ବିଭାଗ ମଧ୍ୟ ତେଜସ୍ବୀଙ୍କ ନିକଟରେ ରହିବାକୁ ଆରଜେଡ଼ି ବିଧାୟକ ଦଳର ବୈଠକରେ ଦାବି ଉଠିଛି ।
