ଶ୍ରୀନଗର: ଜମ୍ମୁ କାଶ୍ମୀରରେ ପୁଣି ଆତଙ୍କ ଖେଳାଇଛନ୍ତି ଆତଙ୍କବାଦୀ । ଆଜି(ଶୁକ୍ରବାର) ଉତ୍ତର କାଶ୍ମୀରର ବନ୍ଦିପୋରା ଅଞ୍ଚଳ ନିଶାତ ପାର୍କ ନିକଟରେ ସିଆରପିଏଫ ଯବାନଙ୍କ ଉପରେ ଗ୍ରେନେଡ଼ ମାଡ କରାଯାଇଛି । ଏହି ଆକ୍ରମଣରେ ଜଣେ ପୋଲିସ ଶହୀଦ ହୋଇଥିବା ବେଳେ ଅନ୍ୟ ୪ ଜଣ ପୋଲିସକର୍ମୀ ଓ CRPF ଯବାନ ଆହତ ହୋଇଛନ୍ତି ।
ସରକାରୀ ବିଭାଗର ସୂଚନା ଅନୁସାରେ ନିଶାତ ପାର୍କ ନିକଟରେ କାର୍ଯ୍ୟରତ ଥିବା ପୋଲିସ ଓ ସିଆରପିଏଫ ଯବାନଙ୍କ ଉପରେ ଆତଙ୍କବାଦୀମାନେ ଗ୍ରେନେଡ଼ ଫିଙ୍ଗିଥିଲେ । ସେଠାରେ ମୋଟ ୫ ଜଣ ସୁରକ୍ଷାକର୍ମୀ ଉପସ୍ଥିତ ଥିଲେ । ଏହି ବିସ୍ଫୋରଣରେ ଜଣେ ପୋଲିସକର୍ମୀ ଶହୀଦ ହୋଇଛନ୍ତି । ସେପଟେ ଅନ୍ୟ ୪ ଜଣ ଆହତ ପୋଲିସ କର୍ମୀ ଓ ସିଆରପିଏଫ ଯବାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ବିସ୍ଫୋରଣରେ ଗଭୀର ମାତ୍ରାରେ ଆହତ ହୋଇଥିବା SPO ଡ୍ରାଇଭର ଜୁବେର ଅହମ୍ମଦ ଶହୀଦ ହୋଇଛନ୍ତି ।
ତେବେ ଶହୀଦ ପୋଲିସ କର୍ମୀଙ୍କ ଘର ବନ୍ଦିପୋରାର ପାପଚାନ ଅଞ୍ଚଳରେ ବୋଲି ଜଣାପଡ଼ିଛି । ଏହି ଘଟଣାରେ ପୋଲିସ ଏକ ମାମଲା ରୁଜୁ କରି ଅଧିକ ତଦନ୍ତ ଜାରି କରିଛି । ପୋଲିସ ବିସ୍ଫୋରଣ ଘଟିଥିବା ଅଞ୍ଚଳରେ ଅଧିକ ସୁରକ୍ଷାକର୍ମୀଙ୍କୁ ନିୟୋଜିତ କରିଛି । ସେପଟେ ଏଯାବତ କୌଣସି ଆତଙ୍କବାଦୀଙ୍କୁ ଗିରଫ କରାଯାଇନାହିଁ ।
@ANI
