ନୂଆଦିଲ୍ଲୀ: ବଙ୍ଗୋପସାଗରୀୟ ରାଷ୍ଟ୍ର ସମୂହଙ୍କ ମିଳିତ ବହୁପାକ୍ଷିକ ବୈଷୟିକ ଓ ଅର୍ଥନୀତିକ ସହଯୋଗ (Multi-Sectoral Technical and Economic Cooperation) (ବିମଷ୍ଟେକ)ପ୍ରୟାସ ମାଧ୍ୟମରେ ଟେକ୍ନୋଲୋଜିର ଟ୍ରାନ୍ସଫର ପାଇଁ ଏକ ରାଜିନାମା ସ୍ୱାକ୍ଷରିତ ହୋଇଛି । ଭାରତ ଏହି ସଂଗଠନର ସଦସ୍ୟ ରହିଛି । ୨୦୨୨ ମାର୍ଚ୍ଚ ୩୦ ରେ ଶ୍ରୀଲଙ୍କାର କଲମ୍ବୋରେ ଅନୁଷ୍ଠିତ ବିମଷ୍ଟେକ ରାଷ୍ଟ୍ରମାନଙ୍କର ଏକ ବୈଠକ ଅବସରରେ ଏହି ଚୁକ୍ତି ସ୍ୱାକ୍ଷରିତ ହୋଇଥିଲା । ସଭ୍ୟ ରାଷ୍ଟ୍ରମାନଙ୍କ ମଧ୍ୟରେ ଟେକ୍ନୋଲୋଜିର ଆଦାନପ୍ରଦାନ ଓ ସହଯୋଗ ରକ୍ଷା ପାଇଁ ଏହି ଚୁକ୍ତିର ମୁଖ୍ୟ ଉଦ୍ଦେଶ୍ୟ ରହିଛି।
ଟେକ୍ନୋଲୋଜି ସହାୟତାରେ ସଦସ୍ୟ ରାଷ୍ଟ୍ରଙ୍କର ଦକ୍ଷତା ବୃଦ୍ଧି ଉପରେ ଏହା ଗୁରୁତ୍ୱ ଦେଉଛି । ତଦନୁସାରେ କଲମ୍ବୋରେ ଏକ ବିମଷ୍ଟେକ ଟେକ୍ନୋଲୋଜି ଟ୍ରାନ୍ସଫର କେନ୍ଦ୍ର ପ୍ରତିଷ୍ଠା କରାଯିବ । ଏହି ଟେକ୍ନୋଲୋଜି ଟ୍ରାନ୍ସଫରରେ ବାୟୋ ଟେକ୍ନୋଲୋଜି, ନାନୋ ଟେକନୋଲୋଜି, ଆଇସିଟି, ମହାକାଶ ଟେକ୍ନୋଲୋଜି, କୃଷି, ଖାଦ୍ୟ ପ୍ରକ୍ରିୟାକରଣ, ଔଷଧପତ୍ର, ଅଟୋମେସନ, ଅକ୍ଷୟଶକ୍ତି, ମହାସାଗର ଓ ଆଣବିକ, ଇ-ୱେଷ୍ଟ, କଠିନ ବର୍ଜ୍ୟ, ସ୍ୱାସ୍ଥ୍ୟ, ବିପର୍ଯ୍ୟୟ ପରିଚାଳନା ଓ ଜଳବାୟୁ ପରିବର୍ତ୍ତନ ଟେକ୍ନୋଲୋଜିର ଆଦାନ ପ୍ରଦାନ ହେବ ।
ଟେକ୍ନୋଲୋଜି ଟ୍ରାନ୍ସଫର ଫ୍ୟାସିଲିଟି (Technology Transfer Facility ) ପାଇଁ ଏକ ପରିଚାଳନା ମଣ୍ଡଳୀ କାର୍ଯ୍ୟ କରିବ । ଏହି ପରିଚାଳନା ମଣ୍ଡଳୀ ସମସ୍ତ କାର୍ଯ୍ୟ ଦେଖିବ । ଏହି ପରିଚାଳନା ମଣ୍ଡଳୀରେ ସବୁ ବିମଷ୍ଟେକ ଦେଶର ପ୍ରତିନିଧିତ୍ୱ ରହିବ । ଏଥିରେ ଟେକ୍ନୋଲୋଜି ଡାଟା ବ୍ୟାଙ୍କ, ଟେକ୍ନୋଲୋଜି ସଂକ୍ରାନ୍ତ ସୂଚନାର ସଂରକ୍ଷଣ ଓ ସରବରାହ, ଦକ୍ଷତା ନିର୍ମାଣ ଆଦିକୁ ଅଗ୍ରାଧିକାର ଦିଆଯିବ । ସବୁ ସଦସ୍ୟ ରାଷ୍ଟ୍ର ଜନ କଲ୍ୟାଣକାରୀ ଅତ୍ୟାଧୁନିକ ଟେକ୍ନୋଲୋଜିର ଲାଭ ଯେପରି ପାଇବେ ସେ ଦିଗରେ ଟେକ୍ନୋଲୋଜି ଟ୍ରାନ୍ସଫର ସେଣ୍ଟର ଓ ଏହାର ପରିଚାଳନା ମଣ୍ଡଳୀ କାର୍ଯ୍ୟ କରିବ । ଏନେଇ ଆଜି ଭାରତର ସରକାର ଆବଶ୍ୟକୀୟ ଅନୁମତି ଦେବା ସହ ପ୍ରସ୍ତାବକୁ ମଞ୍ଜୁରୀ ପ୍ରଦାନ କରିଛନ୍ତି ।