ଇମ୍ଫାଲ: ମଣିପୁର ପୋଲିସ ଓ ଆସାମ ରାଇଫଲ୍ସର ମିଳିତ ଉଦ୍ୟମରେ ଅକ୍ଟୋବର ମାସ ମଧ୍ୟରେ 582 କିଲେଗ୍ରାମ ଓଜନର ବ୍ରାଉନ ସୁଗାର ଜବତ କରାଯାଇଛି । ଯାହାର ଆନୁମାନିକ ବଜାର ମୂଲ୍ୟ ପ୍ରାୟ 2320 କୋଟି ଟଙ୍କା ହେବ ବୋଲି ଜଣାପଡିଛି । ପୋଲିସର ଏହି ସଫଳତା ପରେ ମଣିପୁର ସରକାର 94 ଜଣ ପୋଲିସ ଅଧିକାରୀଙ୍କ ଲାଗି 30 ଲକ୍ଷ ପୁରସ୍କାର ରାଶି ଘୋଷଣା କରିଛନ୍ତି ।
ଦେଶର ବିଭିନ୍ନ ସ୍ଥାନରୁ ବିପୁଳ ପରିମାଣରେ ନିଶାଦ୍ରବ୍ୟ ଜବତ ହେଉଛି । ଇତିମଧ୍ୟରେ ମଣିପୁର ପୋଲିସକୁ ବଡ ସଫଳତା ମିଳିଛି । ମିଆଁମାରରୁ ଦେଶକୁ ଚାଲାଣ ହେଉଥିବା ପ୍ରାୟ 2320 କୋଟି ମୂଲ୍ୟର ନିଶାଦ୍ରବ୍ୟକୁ ପୋଲିସ ଅକ୍ଟୋବର ମାସ ମଧ୍ୟରେ ଜବତ କରିଛି । ତେବେ ପୋଲିସ ଏହି ନିଶାଦ୍ରବ୍ୟକୁ ଭିନ୍ନ ଭିନ୍ନ ସମୟ ତଥା ସ୍ଥାନରେ ଚଢାଉ କରି ଜବତ କରିଛି ।
ରାଜ୍ୟର ଥୌବାଲ ଜିଲ୍ଲା ପୋଲିସ ମୋଜିଙ୍ଗ ଅୱାଙ୍ଗ ଅଞ୍ଚଳରୁ 435.945 କିଲୋଗ୍ରାମର ବ୍ରାଉନ ସୁଗାର ଜବତ କରିଥିବା ବେଳେ 438 ଲିଟରର ନିଶା ପାନୀୟକୁ ଅକ୍ଟୋବର 29 ତାରିଖରେ ଜବତ କରିଥିଲା । ସେହିପରି ବିଷ୍ଣୁପୁର ଜିଲ୍ଲାରୁ ଅକ୍ଟୋବର 28 ତାରିଖରେ ଏକ ସେଭରୋଲେଟ କାର ମଧ୍ୟରୁ 74 କେଜି ବ୍ରାଉନ ସୁଗାର ଜବତ କରିଥିବା ବେଳେ ନଭେମ୍ବର 11 ତାରିଖରେ ଥୌବାଲ ଜିଲ୍ଲା କମୁ ଗ୍ରାମରୁ 72 କେଜି ବ୍ରାଉନ ସୁଗାରକୁ ଆସାମ ରାଇଫଲ୍ସ ଓ ମଣିପୁର ପୋଲିସ ମିଳିତ ଭାବେ ଚଢାଉ କରି ଜବତ କରିଥିଲା ।
ଏହି ବଡ ସଫଳତାରେ ଜଡିତ ଥିବା ରାଜ୍ୟର ବିଭିନ୍ନ ଅଞ୍ଚଳର 94 ଜଣ ପୋଲିସ ଅଧିକାରୀଙ୍କୁ ମଣିପୁର ସରକାର 30 ଲକ୍ଷ ପୁରସ୍କାର ରାଶି ଘୋଷଣା କରିଛନ୍ତି । କୋରୋନା ସମୟରେ ଲୋକମାନେ ଜୀବିକା ହରାଇ ଏଭଳି ନିଶା କାରବାରରେ ଲିପ୍ତ ରହୁଥିବା ଫେଡେରେସନ୍ ଅଫ୍ ଇଣ୍ଡିଆନ ଚାମ୍ବର୍ସ ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରି (FICCI) କହିଛି ।
