ପାଟନା: 22 ତାରିଖରେ ଅଯୋଧ୍ୟାରେ ହେବାକୁ ଥିବା ବହୁପ୍ରତୀକ୍ଷିତ ରାମଲାଲାଙ୍କ ପ୍ରାଣ ପ୍ରତିଷ୍ଠା ଉତ୍ସବରେ ସାମିଲ ହେବନି ଆରଜେଡି ମୁଖ୍ୟ ତଥା ବିହାର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ । ଆଜି ସେ କାର୍ଯ୍ୟକ୍ରମରେ ଅଂଶଗ୍ରହଣ ନକରିବା ନେଇ ଗଣମାଧ୍ୟମରେ ସୂଚନା ଦେଇଛନ୍ତି । ତେବେ ଏହି କାର୍ଯ୍ୟକ୍ରମକୁ ବିଭିନ୍ନ ବିରୋଧୀ ନେତା ନିମନ୍ତ୍ରିତ ହୋଇଥିଲେ । କିଛି ନେତାଙ୍କୁ ନିମନ୍ତ୍ରଣ କରାଯାଇନଥିବା ନେଇ ସେମାନେ କ୍ଷୋଭ ମଧ୍ୟ ପ୍ରକାଶ କରିଥଲେ । ପୂର୍ବରୁ କଂଗ୍ରେସ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବେ ନାହିଁ ବୋଲି ସ୍ପଷ୍ଟ କରିସାରିଛି । ଏବେ ସାମିଲ ନହେବା କ୍ରମରେ ଲାଲୁ ଯାଦବ ମଧ୍ୟ ସାମିଲ ହୋଇଛନ୍ତି ।
ଆଜି (ବୁଧବାର) ପାଟନାରେ ସାମ୍ବାଦିକଙ୍କ ସହ ଆଲୋଚନା ବେଳେ ଲାଲୁ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି । କହିଛନ୍ତି, ସେ 22 ରେ କାର୍ଯ୍ୟକ୍ରମରେ ଅଂଶଗ୍ରହଣ କରିବା ପାଇଁ ଅଯୋଧ୍ୟା ଯିବେ ନାହିଁ । ପୂର୍ବରୁ ଲାଲୁଙ୍କ ପୁଅ ତଥା ବିହାର ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ମଧ୍ୟ ଏହି ପ୍ରସଙ୍ଗରେ ପ୍ରଶ୍ନ ଉଠାଇ ସାରିଛନ୍ତି । ଏହି ମନ୍ଦିର ନିର୍ମାଣ ଫଳରେ ଗରିବ ଲୋକମାନେ ମନ୍ଦିରରେ ଖାଦ୍ୟ ପାଇବେ କି ? ବୋଲି ତେଜସ୍ବୀ ପ୍ରଶ୍ନ କରିଥିଲେ । ଏଥିରୁ ଆରଜେଡିର ଆଭିମୁଖ୍ୟର ଆଭାସ ମିଳିଥିଲା ।
