କୋଲକାତା: ଅପରାଧୀ କିମ୍ବା ଅଭିଯୁକ୍ତଙ୍କୁ ଜେରା ବେଳେ ତଥ୍ୟ ହାସଲ କରିବା ପାଇଁ ସୁକ୍ଷ୍ମ ତରିକା ଆପଣାଇବ କୋଲକାତା ପୋଲିସ । ଏଥିପାଇଁ କୋଲକାତା ପୋଲିସ ଆମେରିକା ଓ ନେଦରଲ୍ୟାଣ୍ଡ ପୋଲିସ ବାହିନୀ ବ୍ୟବହାର କରୁଥିବା ଏକ ବିଶେଷ ଧରଣର କୌଶଳ ବ୍ୟବହାର କରିବ (Kolkata Police to borrow interrogation style from US Netherlands) । ଯେଉଁଥିରେ ପଚରାଉଚରା ସମୟରେ ଅଭିଯୁକ୍ତ କିମ୍ବା ଅପରାଧୀଙ୍କ ସହ ଅତି କୋମଳତାର ସହ କଥା ହେବା ସହ ସେମାନଙ୍କ ଆତ୍ମବିଶ୍ବାସ ହାସଲ କରିବାକୁ ଚେଷ୍ଟା କରାଯିବା । ଫଳରେ ବଳ ପ୍ରୟୋଗ ପରିବର୍ତ୍ତେ ଅତି ସହଜରେ ସେମାନଙ୍କ ଠାରୁ ଅପରାଧ ସମ୍ପର୍କିତ ସମସ୍ତ ତଥ୍ୟ ହାସଲ କରିବାରେ ପୋଲିସକୁ ସଫଳତା ମିଳିପାରିବ ।
କୌଣସି ଥାର୍ଡଡିଗ୍ରୀ ପରିବର୍ତ୍ତେ ଆମେରିକା ଓ ନେଦରଲ୍ୟାଣ୍ଡ ପୋଲିସ ଫୋର୍ସ ଏହି ବିଶେଷ ଧରଣର ଇଣ୍ଟୋରଗେସନ କୌଶଳ ବ୍ୟବହାର କରିଥାନ୍ତି । ଏହି ଦୁଇ ଦେଶର ପୋଲିସ ବଳ ଠାରୁ କୋଲକାତା ପୋଲିସ ଏହି କୌଶଳ ବ୍ୟବହାର କରିବା ଦିଗରେ ପ୍ରଶିକ୍ଷଣ ନେବାକୁ ନିଷ୍ପତ୍ତି ହୋଇଛି ।
ଭାରତୀୟ ପୋଲିସର ପାରମ୍ପାରିକ ଶୈଳୀରେ ବଳ ପ୍ରୟୋଗ କରି ଅଭିଯୁକ୍ତ କିମ୍ବା ଅପରାଧୀଙ୍କ ଠାରୁ ତଥ୍ୟ ହାସଲ ପ୍ରକ୍ରିୟାକୁ ବର୍ତ୍ତମାନ ସମୟରେ ମାନବିକ ଅଧିକାର ଆୟୋଗ ବାରଣ କରିଛି । ଏପରି କରିବା ବା ଅଭିଯୁକ୍ତଙ୍କୁ ପୋଲିସ ହେପାଜତରେ ଶାରୀରିକ କିମ୍ବା ମାନସିକ ନିର୍ଯାତନାର ଅଭିଯୋଗ ଆସିଲେ ତାହା ମଧ୍ୟ ପୋଲିସ ବିରୋଧରେ ଏକ ଅପରାଧ ଭାବେ ପଞ୍ଜିକୃତ ହେବାର ପ୍ରାବଧାନ ମଧ୍ୟ ରହିଛି । ଏପରି ସମୟରେ ପୂର୍ବ ପ୍ରଚଳିତ ପାରମ୍ପରିକ ଧାରା ବା ଜେରା ଶୈଳୀକୁ ଛାଡି ସୁକ୍ଷ୍ମ ଭାବେ ଏହାକୁ କରିବା ପାଇଁ କୋଲକାତା ପୋଲିସ ବିଦେଶରୁ ଏହି ପ୍ରଶିକ୍ଷଣ ନେବାକୁ ଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
