ନୂଆଦିଲ୍ଲୀ: କଳାହାଣ୍ଡି ନର୍ଲାରେ ମଞ୍ଜୁରୀପ୍ରାପ୍ତ ‘ଇଲେକ୍ଟ୍ରିକାଲ ଲୋକୋ ପେରିଓଡିକାଲ ମରାମତି କର୍ମଶାଳା’ପ୍ରକଳ୍ପକୁ ନେଇ ଏକାଧିକ ପ୍ରଶ୍ନ ପଚାରିଲେ ସାଂସଦ ବସନ୍ତ ପଣ୍ଡା । ଆଜି ( ବୁଧବାର) ପ୍ରଶ୍ନକାଳରେ ବସନ୍ତ ଏକ ଅଣତାରକା ପ୍ରଶ୍ନ ଜରିଆରେ ରେଳମନ୍ତ୍ରୀଙ୍କୁ ଏହି ପ୍ରକଳ୍ପ ସମ୍ବନ୍ଧୀତ ପ୍ରଶ୍ନ ପଚାରିଛନ୍ତି ।
କଳାହାଣ୍ଡି ନର୍ଲାରେ ହେବାକୁ ଥିବା ‘ଇଲେକ୍ଟ୍ରିକାଲ ଲୋକୋ ପେରିଓଡିକାଲ ମରାମତି କର୍ମଶାଳା’ କୁ ନେଇ ସାଂସଦ ବସନ୍ତ ପଣ୍ଡା ପ୍ରଶ୍ନ କରି କହିଛନ୍ତି କେନ୍ଦ୍ର ସରକାର ଏହି ପ୍ରକଳ୍ପ ମଞ୍ଜୁର କରିଥିଲେ ମଧ୍ୟ ବର୍ତ୍ତମାନ ସୁଦ୍ଧା ନିର୍ମାଣ କାମ ଆରମ୍ଭ ହୋଇନାହିଁ । ପ୍ରକଳ୍ପ ପାଇଁ ଆବଶ୍ୟକୀୟ ୩୨୮ ଏକର ଜମିରୁ ୧୪୧ ଏକର ଜମି ଅର୍ଥାତ ମୋଟ ଜମିର ୪୭ ପ୍ରତିଶତ ଜମି ରାଜ୍ୟ ସରକାର ରେଳବାଇକୁ ହସ୍ତାନ୍ତର କରିଛନ୍ତି । ଏହାସତ୍ବେ କୌଣସି ନିର୍ମାଣ କାମ ଆରମ୍ଭ ହୋଇନାହିଁ । କେବେ ସୁଦ୍ଧା ସମ୍ପୂର୍ଣ୍ଣ ଜମି ମିଳିବ? କେବେ ପ୍ରକଳ୍ପ କାମ ଆରମ୍ଭ ହେବ ? ଏହା ସହ ପ୍ରକଳ୍ପ କାମ ପାଇଁ ରାଜ୍ୟ ସରକାରଙ୍କ ସହ କେତେ ଥର ଆଲୋଚନା ହୋଇଛି ଜାଣିବା ପାଇଁ ଚାହିଁଥିଲେ ।
ସେହିପରି ଆର୍ଥିକ ବର୍ଷ ୨୦୧୭-୧୮ ରେ କଳାହାଣ୍ଡି ଜିଲ୍ଲା ପାଇଁ ମଞ୍ଜୁର ହୋଇଥିବା ବିଭିନ୍ନ ପ୍ରକଳ୍ପର ମଧ୍ୟ କୌଣସି ଅଗ୍ରଗିତ ହୋଇନାହିଁ । କାହିଁକି ହୋଇନାହିଁ କେବେ ସୁଦ୍ଧା ହେବ ବୋଲି ବସନ୍ତ ରେଳମନ୍ତ୍ରୀଙ୍କୁ ପ୍ରଶ୍ନ ପଚାରିଛନ୍ତି । ଏହାବାଦ ଆବଶ୍ୟକ ହେଉଥିବା ଜମି ଯଥା ସମ୍ଭବ ପ୍ରଦାନ କରିବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବାକୁ ଦାବି କରିଥିଲେ ।
ଜବାବରେ ରେଳମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି, ସାଂସଦ ଭଲ ପ୍ରଶ୍ନ ପଚାରିଛନ୍ତି । କଳାହାଣ୍ଡିରେ ‘ଇଲେକ୍ଟ୍ରିକାଲ ଲୋକୋ ପେରିଓଡିକାଲ ମରାମତି କର୍ମଶାଳା’ ନିର୍ମାଣ ପାଇଁ ରେଳ ମନ୍ତ୍ରଣାଳୟ ବଦ୍ଧପରିକର । କଳାହାଣ୍ଡି ପାଇଁ କେନ୍ଦ୍ର ସରକାର ସମ୍ବେଦନଶୀଳ ଅଛନ୍ତି । ଏହି ପ୍ରକଳ୍ପ ହେଲେ ଜିଲ୍ଲାର ଅଭିବୃଦ୍ଧି ଘଟିବ । ପ୍ରତ୍ୟକ୍ଷ ଓ ପରୋକ୍ଷରେ ନିଯୁକ୍ତି ବଢିବ । ଏହି ପ୍ରକଳ୍ପ ରେଳ ମନ୍ତ୍ରଣାଳୟର ଅଗ୍ରାଧିକାରରେ ରହିଛି । ବର୍ତ୍ତମାନ ସୁଦ୍ଧା ମିଳିଥିବା ଜମିର ‘ଡିପିଆର’ ପ୍ରସ୍ତୁତ ସରିଛି । କିଛି ଜଙ୍ଗଲ ପରିବେଶ ସମସ୍ୟା ରହିଛି । ଖୁବଶୀଘ୍ର ଏହା ସମାଧାନ ହୋଇଯିବ ଓ ନିର୍ମାଣ ଆରମ୍ଭ ହେବ ବୋଲି କହିଛନ୍ତି ।
ସେହିପରି ରାଜ୍ୟ ସରକାରଙ୍କୁ ଅବଶିଷ୍ଟ ଜମି ପ୍ରଦାନ ପାଇଁ ନିର୍ଦ୍ଦେଶ ଦେବାକୁ ପ୍ରଶ୍ନରେ ମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି, କଳାହାଣ୍ଡି ସାଂସଦଙ୍କ ରାଜ୍ୟ ସରକାରଙ୍କ ଉପରେ ବେଶ ପ୍ରଭାବ ରହିଛି । ରେଳ ମନ୍ତ୍ରଣାଳୟତ ସରକାରଙ୍କ ସମ୍ପର୍କରେ ରହିଛି । ସାଂସଦ ମଧ୍ୟ ନିଜ ଆଡୁ ଉଦ୍ୟମ କରନ୍ତୁ ବୋଲି ମନ୍ତ୍ରୀ ପରାମର୍ଶ ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
