ପାଟନା: ରଖେ ହରି ତ ମାରେ କିଏ, ଯାହାର ଜ୍ବଳନ୍ତ ଉଦାହରଣ ଦେଖିବାକୁ ମିଳିଛି ବିହାର ଗୟା ରେଲଓ୍ବେ ଷ୍ଟେସନରେ । ଟ୍ରେନ ଡବାରେ ବସିବା ପରବର୍ତ୍ତେ ଇଞ୍ଜିନରେ ବସି ଯାତ୍ରା କରୁଥିଲେ ଯୁବକ, କିନ୍ତୁ ଅଳ୍ପକେ ବର୍ତ୍ତି ଯାଇଛି ଜୀବନ । ଇଞ୍ଜିନରେ ବସିଥିବା ଦେଖିବା ପରେ ଯୁବକ ଜଣଙ୍କୁ ଟ୍ରେନ ଡ୍ରାଇଭର ଓ ଯାତ୍ରୀଙ୍କ ଦ୍ବାରା ଉଦ୍ଧାର କରାଯାଇଛି । ସେ ମାନସିକ ବିକାର ଗ୍ରସ୍ତ ହୋଇଥିବା ବେଳେ ସଙ୍ଗେ ସଙ୍ଗେ ଘଟଣାସ୍ଥଳରୁ ନିଖୋଜ ହୋଇଯାଇଥିବା ଜଣାପଡିଛି ।
ସୋମବାର ବାରାଣାସୀ ସାରନାଥ ବୁଦ୍ଧ ପୂର୍ଣ୍ଣିମା ଏକ୍ସପ୍ରେସ ରାଜଗିରିରୁ ଗୟା ଯାତ୍ରା ଆରମ୍ଭ କରିଥିଲା । ଏହି ସମୟରେ ଟ୍ରେନର ଇଞ୍ଜିନର ଟ୍ରାକ୍ସନ୍ ମୋଟର ତଳେ ଜଣେ ଯୁବକ ବସି ଯାତ୍ରା ଆରମ୍ଭ କରିଥିଲେ । କିଛି ସମୟ ପରେ ହଠାତ ଡ୍ରାଇଭରଙ୍କୁ କେହି କାନ୍ଦୁଥିବାର ଶୁଣିବାକୁ ପାଇଥିଲେ । ଏହାପରେ ଖୋଜାଖୋଜି କରିବା ପରେ ଜଣେ ଯୁବକ ଇଞ୍ଜିନ ନିକଟରେ ବସିଥିବା ଦେଖି ସେ ଆଶ୍ଚର୍ଯ୍ୟ ହୋଇଯାଇଥିଲେ । ଟ୍ରେନ୍ ପହଞ୍ଚିବା ପରେ ଯୁବକ ଜଣଙ୍କୁ ଉଦ୍ଧାର କରାଯାଇଥିଲା । ତେବେ ବର୍ତ୍ତମାନ ସୁଦ୍ଧା ଯୁବକଙ୍କ ପରିଚୟ ଅସ୍ପଷ୍ଟ ରହିଛି । ସେ କେଉଁ ଷ୍ଟେନରୁ ଯାତ୍ରା ଆରମ୍ଭ କରିଥିଲା ତାହା ମଧ୍ୟ ଜଣାପଡିନାହିଁ ।
ଡ୍ରାଇଭର ଏହି ବିଷୟରେ ରେଳ ଅଧିକାରୀଙ୍କୁ ସୂଚନା ଦେଇଥିଲେ। ଏଥି ସହିତ ଆରପିଏଫକୁ ମଧ୍ୟ ଏ ବିଷୟରେ ଅବଗତ କରାଯାଇଥିଲା । ଜଣେ ବ୍ୟକ୍ତି ଇଞ୍ଜିନର ସଂକୀର୍ଣ୍ଣ ଅଂଶରେ ବସି ଏହିପରି ଯିବା କଷ୍ଟକର, ଏମିତି ଯାତ୍ରା କଲେ ଅନେକ ସମୟରେ ଦୁର୍ଘଟଣା ଘଟିବାର ମଧ୍ୟ ସମ୍ଭାବନା ରହିଛି ରେଲଓ୍ବେ ତରଫରୁ କୁହାଯାଇଛି । ଯୁବକଜଣଙ୍କ ରାଜଗିରର ଷ୍ଟେସନରୁ ଟ୍ରେନରେ ଚଢିଥିବା ଅନୁମାନ କରାଯାଉଛି ।
