ଚଣ୍ଡିଗଡ: କଂଗ୍ରେସଠାରୁ ଅଲଗା ହୋଇ ନୂଆ ରାସ୍ତା ବାଛି ସାରିଛନ୍ତି ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂ । ପଞ୍ଜାବ କଂଗ୍ରେସରେ ଝଡ ଥମିବାକୁ ନାଁ ନେଉନଥିବାବେଳେ ନୂଆ ଦଳ ଗଠନ ନେଇ ଘୋଷଣା କରିଛନ୍ତି ଅମରିନ୍ଦର ।
ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ କ୍ୟାପ୍ଟେନ ଅମରିନ୍ଦର ସିଂ କଂଗ୍ରେସରୁ ଅଲଗା ହୋଇ ବିଜେପିରେ ମିଶିବେ ବୋଲି ଚର୍ଚ୍ଚା ହେଉଥିଲା । ହେଲେ ଖୋଦ ଅମରିନ୍ଦର ଏହି ଚର୍ଚ୍ଚାରେ ପୂର୍ଣ୍ଣଛେଦ ପକାଇଥିଲେ । ଏବେ ନୂଆ ଦଳ ଗଠନ କରିବେ ବୋଲି ଘୋଷଣା କରିଛନ୍ତି କ୍ୟାପ୍ଟେନ ।
କ୍ୟାପ୍ଟେନ ଅମରିନ୍ଦର ସିଂଙ୍କ ମିଡିଆ ପରାମର୍ଶଦାତା ରବୀନ ଠୁକରାଲ ଟ୍ବିଟ କରି ନୂଆ ଦଳ ଗଠନର ଘୋଷଣା ବାବଦରେ ସୂଚନା ଦେଇଛନ୍ତି । ରବୀନ ଠୁକରାଲ କ୍ୟାପ୍ଟେନଙ୍କ ପକ୍ଷରୁ ଟ୍ବିଟ କରି କହିଛନ୍ତି, ପଞ୍ଜାବର ଭବିଷ୍ୟତ ପାଇଁ ଲଢେଇ ଜାରି ରହିଛି । ଖୁବ ଶୀଘ୍ର ରାଜନୈତିକ ଦଳ ଘୋଷଣା ହେବ । ଏହା ପଞ୍ଜାବର ଜନସାଧାରଣ ଓ ଚାଷୀଙ୍କ ହିତରେ କାର୍ଯ୍ୟ କରିବ ।
