ମୁମ୍ବାଇ: ମହାରାଷ୍ଟ୍ର ନାଗପୁରରେ ଥିବା କୋଭିଡ ହସପିଟାଲରେ ଭୟାବହ ଅଗ୍ନିକାଣ୍ତ । ଏଥିରେ 4 ଜଣଙ୍କର ମୃତ୍ୟୁ ହୋଇଥିବା ବେଳେ ଏକାଧିକ ଆହତ ହୋଇଛନ୍ତି । ଏହାସହ 27 ଜଣ ରୋଗୀଙ୍କୁ ଅନ୍ୟ ଏକ ମେଡିକାଲକୁ ସ୍ଥାନାନ୍ତର କରାଯାଇଛି ।
ସୂଚନା ଅନୁସାରେ, ଶୁକ୍ରବାର ରାତିରେ ନାଗପୁରର ଅମରାବତୀ ରୋଡରେ ଥିବା ଏକ କୋଭିଡ ହସପିଟାଲରେ ସର୍ଟ ସର୍କିଟରୁ ନିଆଁ ଲାଗିଥିଲା । ନିଆଁ ଲାଗିଥିବା ଦେଖି ମେଡିକାଲ କର୍ତ୍ତୃପକ୍ଷ ଦମକଳ ବାହିନୀକୁ ଖବର ଦେଇଥିଲେ । ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିବା ସହ ରୋଗୀଙ୍କୁ ଉଦ୍ଧାର କରିଥିଲେ । ଗତ 26 ମାର୍ଚ୍ଚରେ ମଧ୍ୟ ମୁମ୍ବାଇର ଏକ କୋଭିଡ ହସପିଟାଲରେ ନିଆଁ ଲାଗି 10 ଜଣଙ୍କର ମୃତ୍ୟୁ ହୋଇଥିଲା ।
