ଲକ୍ଷ୍ନୌ: ମୃତଦେହ ସହ କାଟିଲେ ଦେଢ଼ବର୍ଷ । ପ୍ରାୟ ଦେଢ଼ ବର୍ଷ ପୂର୍ବେ ମୃତ୍ୟୁ ଘଟିଥିବା ଜଣେ ବ୍ୟକ୍ତିଙ୍କ ମୃତଦେହ ପରିବାର ଲୋକେ ପାଖରେ ପାଖରେ ରଖିଥିଲେ । ଖାଲି ସେତିକି ନୁହେଁ ସ୍ବାମୀ କୋମାରେ ଅଛନ୍ତି ଭାବି ପ୍ରତିଦିନ ମୃତଦେହ ଉପରେ ଗଙ୍ଗା ଜଳ ଛିଞ୍ଚୁଥିଲେ ପତ୍ନୀ । ଉତ୍ତର ପ୍ରଦେଶର କାନପୁରର ରୋଶନ ନଗର ଅଞ୍ଚଳରୁ ଏଭଳି ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି ।
ସୂଚନା ଅନୁଯାୟୀ, ରୋଶନ ନଗର ଅଞ୍ଚଳର ଆୟକର ବିଭାଗର କର୍ମଚାରୀ ବିମଲେଶ କୁମାରଙ୍କ କୋରୋନାରେ ଆକ୍ରାନ୍ତ ହୋଇ ଡାକ୍ତରଖାନାରେ ଚିକିତ୍ସିତ ହେଉଥିଲେ। ଚିକିତ୍ସାଧିନ ଅବସ୍ଥାରେ 2021 ମସିହା ଏପ୍ରିଲ 22ତାରିଖରେ ତାଙ୍କର ମୃତ୍ୟୁ ହୋଇଥିଲା । ମୃତଦେହ ବ୍ୟବଚ୍ଛେଦ ପରେ ଡାକ୍ତରଖାନା କର୍ତ୍ତୃପକ୍ଷ ମୃତ୍ୟୁ ପ୍ରମାଣ ପତ୍ର ଦେଇ ପରିବାର ଲୋକଙ୍କୁ ହସ୍ତାନ୍ତର କରିଥିଲେ । କିନ୍ତୁ ପୁଅ ଜୀବିତ ଥିବା କହି ପରିବାର ଲୋକେ ତାଙ୍କ ପାଖରେ ରଖିଥିଲେ । ମୃତଦେହକୁ ଜୀବିତ ଭାବି ପରିବାର ଲୋକେ ସେବାରେ ଲାଗିପଡ଼ିଥିଲେ । ଦିନେ କି ଦୁଇ ଦିନ ନୁହେଁ ଦେଢ ବର୍ଷ ଧରି ବିମଲେଶଙ୍କ ଯତ୍ନ ନେଉଥିଲେ ପରିବାର ଲୋକେ । ଘରେ ମୃତଦେହ ରଖିବା ଖବର ସାମ୍ନାକୁ ଆସିବା ପରେ ପୋଲିସ ଏବଂ ସ୍ବାସ୍ଥ୍ୟ ବିଭାଗ ଟିମ ଘଟଣାସ୍ଥଳରେ ପହିଞ୍ଚି ଥିଲେ ଏବଂ ଯାଞ୍ଚ ପାଇଁ ପଠାଇ ପୁନଃ ମୃତ ଘୋଷଣା କରିଥିଲେ । ପଡ଼ୋଶୀ ବିମଲେଶଙ୍କ ବିଷୟରେ ପଚାରିଲେ ସେ କୋମାରେ ଅଛନ୍ତି ବୋଲି ପରିବାର ଲୋକେ କହୁଥିଲେ ।
ଏହା ମଧ୍ୟ ପଢ଼ନ୍ତୁ: ପୁଣି ୟୁପିରେ ଲଜ୍ଜା, ଘରୁ ଡାକି ନେଇ ବିବାହିତ ମହିଳାଙ୍କୁ ଗଣଦୁଷ୍କର୍ମ
ଏନେଇ ମୃତକଙ୍କ ବାପା କହିଛନ୍ତି, " ମୃତ୍ୟୁର ପରଦିନ ବିମଳେଶଙ୍କ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ହୋଇଥିଲା । ଏତିକି ବେଳେ ତାଙ୍କ ଶରୀର ହଲଚଲ ହେବା ଅନୁଭବ ହୋଇଥିଲା । ଏହାପରେ ଅନ୍ତିମ ସଂସ୍କାର ବନ୍ଦ କରାଗଲା ।" ପରିବାର ଲୋକେ ଶେଷ ପର୍ଯ୍ୟନ୍ତ କହୁଥିଲେ ବିମଲେଶ ନିଶ୍ବାସ ପ୍ରଶ୍ବାସ ନେଉଥିଲେ, ଯଦିଓ ଡାକ୍ତର ବିମଲେଶଙ୍କୁ ମୃତ ଘୋଷଣା କରିଥିଲେ । ମୃତକଙ୍କ ବାପା ତାଙ୍କ ପୁଅ ବଞ୍ଚିଥିବା ଜିଦ କରିଥିଲେ । ପୋଲିସର ଅନେକ ବୁଝାସୁଝା ପରେ ପରିବାର ଲୋକେ ବିମଲେଶଙ୍କ ଅନ୍ତିମ ସଂସ୍କାର କରିବାକୁ ରାଜି ହୋଇଥିଲେ ।
ପୋଲିସ ଓ ମେଡିକାଲ ଟିମ ବିମଲେଶଙ୍କ ମୃତଦେହକୁ ଏଲଏଲଆର ହସପିଟାଲକୁ ନେଇଥିଲେ । ସେତେବେଳେ ସ୍ଥାନୀୟ ଲୋକଙ୍କ କହିବ କଥା ହେଲା ମୃତଦେହରୁ କୌଣସି ଦୁର୍ଗନ୍ଧ ବାହାରୁନଥିଲା । ଏନେଇ ପୋଲିସ ଟିମ ପରିବାର ଲୋକଙ୍କୁ ପଚାରିଥିଲେ । ପୋଲିସର ପ୍ରାଥମିକ ଯାଂଚ ବେଳେ ବିମଲେଶଙ୍କ ମୃତଦେହକୁ ଗୋଟଏ ଶୀତାତାପ କଠୋରୀରେ ରଖିଥିଲେ । ପ୍ରତିଦିନ ମୃତଦେହକୁ ଡେଟଲରେ ପୋଛିବା ସହ ପିନ୍ଧାଲୁଗା ବଦଳାଉଥିଲେ ।
ସେପଟେ ଜଏଣ୍ଟ ପୋଲିସ କମିଶନର ଆନନ୍ଦ ପ୍ରକାଶ ତିୱାରୀ ଏହି ଘଟଣାର ଯାଂଚ କରିବାକୁ ଏଡିସିପି ଲାଖନ ସିଂହଙ୍କୁ ନିର୍ଦ୍ଦେଶ ଦେଇଛନ୍ତି । ସାତ ଦିନ ମଧ୍ୟରେ ତଦନ୍ତ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି । ସବୁଠାରୁ ଆଶ୍ଚର୍ଯ୍ୟର କଥା ମୃତଦେହକୁ କିପରି ଭାବେ ସଂରକ୍ଷିତ କରି ରଖିଥିଲେ ପରିବାର ଲୋକେ । ଶବ ଦେହରେ କୌଣସି ବିଶେଷ ଲେପ କିମ୍ବା କେମିକାଲ ଲଗାଇ ରଖାଯାଇଥିଲା ନା କୌଣସି ତନ୍ତ୍ର ମନ୍ତ୍ର କରାଯାଇଥିଲା ସେନେଇ ଯାଂଚ କରିବ ପୋଲିସ ।
