ଗାନ୍ଧୀନଗର: ଗୁଜୁରାଟ ମର୍ବ ଜିଲ୍ଲାର ବମନବୋର-କଚ୍ଛ ଜାତୀୟ ରାଜପଥରେ ଦୀର୍ଘ ଦେଢ ବର୍ଷରୁ ଊର୍ଦ୍ଧ୍ବ ସମୟ ଧରି ଚାଲିଆସୁଥିଲା ଏକ ନକଲି ଟୋଲ ପ୍ଲାଜା । ଆଉ କିଛି ଦୁର୍ବୃତ୍ତ ଏତେ ଦିନ ଧରି ସରକାରୀ ଅଫିସର, ପୋଲିସ ଓ ସାଧାରଣ ଜନତାଙ୍କୁ ଭୁଆଁ ବୁଲାଇଆସୁଥିଲେ । ହେଲେ ଏହି ଠକେଇର କେହି ଟେର ବି ପାଇପାରୁନଥିଲେ । ଏଭଳି ଦୀର୍ଘ ୧.୫ ବର୍ଷ ଧରି ଟୋଲ ପ୍ଲାଜା ଚଳାଇଆସୁଥିବା ଠକ ଗୋଷ୍ଠୀଙ୍କ ଗୁମର ଫିଟିଛି । ଏହି ଠକେଇ ସମ୍ପର୍କରେ ଜଣାପଡ଼ିବା ପରେ ଏବେ ସାରା ଦେଶରେ ଏହାକୁ ନେଇ ଚର୍ଚ୍ଚା ହେଉଛି ।
ମିଳିଥିବା ସୂଚନା ଅନୁସାରେ ଏହି ଟୋଲ ପ୍ଲାଜା ଏକ ଘରୋଇ ଜମିରେ ନିର୍ମାଣ ହୋଇଥିବା ବେଳେ ମର୍ବି ଜିଲ୍ଲାର ସରକାରୀ ଅଫିସରଙ୍କଠୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କ ପର୍ଯ୍ୟନ୍ତ ସମସ୍ତେ ଠକେଇର ଶିକାର ହୋଇଥିଲେ । ସବୁଠୁ ଆଶ୍ଚର୍ଯ୍ୟ କଥା ହେଉଛି ଏହି ଠକମାନେ ଦୀର୍ଘ ଦେଢ ବର୍ଷ ଧରି ଏପରି କାର୍ଯ୍ୟ କରିଆସୁଥିଲେ । ସେହି ରାସ୍ତା ଦେଇ ପ୍ରଶାସନିକ ଅଧିକାରୀମାନେ ମଧ୍ୟ ଯିବା ଆସିବା କରୁଥିଲେ, ମାତ୍ର ଏ ସମ୍ପର୍କରେ କେହି ସୁରାକ ମଧ୍ୟ ପାଇନଥିଲେ । ବମନବୋର-କଚ୍ଛ ଜାତୀୟ ରାଜପଥରେ ଥିବା ଭଘାସିଆ ଟୋଲ ପ୍ଲାଜା ମ୍ୟାନେଜରଙ୍କ କହିବାନୁସାରେ ଯେଉଁ ସ୍ଥାନରେ ଟୋଲ ପ୍ଲାଜା ନିର୍ମିତ ହୋଇଥିଲା, ସେହି ଜମିର ମାଲିକ ପ୍ରତିଦିନ ହଜାର ହଜାର ଟଙ୍କା ଟୋଲ ପ୍ଲାଜାରେ ରୋଜଗାର କରୁଥିଲେ ।
ଏହା ବି ପଢନ୍ତୁ- ଟୋଲ ପ୍ଲାଜାକୁ ନେଇ ସ୍ଥାନୀୟ ଲୋକଙ୍କ ଅସନ୍ତୋଷ, ଟୋଲ ଗେଟ୍ ଖୋଲିବାରୁ ତୀବ୍ର ବିରୋଧ
