ହାଇଦ୍ରାବାଦ: ତେଲେଙ୍ଗାନାରେ ଛାତି ଥରାଇ ଦେଲା ଭଳି ଦୃଶ୍ୟ ଦେଖିବାକୁ ମିଳିଛି । ନବଜାତ ଶିଶୁର ମୁଣ୍ଡକୁ ଧରି ବୁଲିଲା କୁକୁର । ତେବେ ସଭ୍ୟ ସମାଜରେ ଦେଖିବାକୁ ମିଳିଛି ଏହି ହୃଦୟ ବିଦାରକ ଦୃଶ୍ୟ ।
ତେଲେଙ୍ଗାନାର ରଙ୍ଗାରେଡ୍ଡୀ ଜିଲ୍ଲାର ଅନ୍ତର୍ଗତ ବନସ୍ଥଳୀପୁରମ୍ ଥାନା ଅଞ୍ଚଳରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା । ବନସ୍ଥଳୀପୁରମ୍ ଥାନା ଅଞ୍ଚଳରେ ଥିବା ସାହାରା ଗେଟ୍ ପାଖ ଅଳିଆ ଗଦାରେ ଏହି କରୁଣ ଦୃଶ୍ୟ ଦେଖିବାକୁ ମିଳିଥିଲା । ଏହି ଅଳିଆ ଗଦାରେ ଅଚିହ୍ନା ଶିଶୁର ମୁଣ୍ଡ ପଡିଥିବା ବେଳେ କୁକୁର ମୁଣ୍ଡଟିକୁ ପାଟିରେ କାମୁଡି ନେଉଥିବାବେଳେ ସ୍ଥାନୀୟ ଲୋକ ଦେଖିଥିଲେ ।
ଏହାପରେ ସ୍ଥାନୀୟ ଲୋକେ କୁକୁରକୁ ଘଉଡାଇବା ସହ ପୋଲିସକୁ ଖବର ଦେଇଥିଲେ । ଏପଟେ ପୋଲିସ ଘଟଣାସ୍ଥଳରେ ପହଞ୍ଚି ମୁଣ୍ଡକୁ ଜବତ କରିଛି ।ଏଥିସହ ପୋଲିସ ସିସିଟିଭି ଫୁଟେଜ୍ ଆଧାରରେ ତଦନ୍ତ ଚଳାଇଛି ।
ଅନ୍ୟପଟେ କିଏ ଓ କେଉଁ କାରଣରୁ ଏଭଳି କାମ କରିଛି ତାକୁ ନେଇ ଖୋଳତାଡ ଆରମ୍ଭ କରିଛି ପୋଲିସ । ସେହିପରି କେବେ ଶିଶୁଟିର ମୃତ୍ୟୁ ହେଲା ତାକୁ ମଧ୍ୟ ତଦନ୍ତ ପରିସରଭୁକ୍ତ କରିଛି ପୋଲିସ । ସେହିଭଳି ବିଭିନ୍ନ ଦିଗକୁ ନେଇ ପୋଲିସ ତଦନ୍ତ ଚଳାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
