ବେଙ୍ଗାଲୁରୁ: 6 ବର୍ଷୀୟ ନାବାଳକକୁ ହାତୁଡିରେ ଛେଚି ବୀଭତ୍ସ ଭାବେ ହତ୍ୟା କରିବା ସହ ନାବାଳିକା ଭଉଣୀକୁ ଦୁଷ୍କର୍ମ ମାମଲାରେ ଦୋଷୀକୁ ଫାଶୀ ଦଣ୍ଡାଦେଶ ଶୁଣାଇଛନ୍ତି କୋର୍ଟ । କର୍ଣ୍ଣାଟକର ଇଦୁକି ଜିଲ୍ଲାରେ 2021 ମସିହା ଅକ୍ଟୋବର 3 ତାରିଖରେ ଘଟିଥିଲା ଏହି ଦୁଷ୍କର୍ମ ଓ ହତ୍ୟାକାଣ୍ଡ । ଗତକାଲି(ଶନିବାର) ଏହି ମାମଲାରେ ଇଦୁକି ଫାଷ୍ଟଟ୍ରାକ ପୋକ୍ସୋ କୋର୍ଟରେ ଏହି ରାୟ ପ୍ରକାଶ ପାଇଛି । ବିଚାରପତି ଟି.ଜି ଭର୍ଗିସ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିବା ସହ ନାବାଳକୁ ହତ୍ୟା ମାମଲାରେ ଦୋଷୀକୁ ଫାଶୀ ଓ ନାବାଳିକା ଦୁଷ୍କର୍ମ ମାମଲାରେ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି । ନାବାଳିକାର ପରିବାରର ଦୁଇ ସଦସ୍ୟଙ୍କୁ ମଧ୍ୟ ହତ୍ୟା ଉଦ୍ୟମ କରିଥିଲା ଅଭିଯୁକ୍ତ । ତେଣୁ ବିଭିନ୍ନ ମମଲାରେ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି ଫାଶୀ ସହ ମୋଟ 92 ବର୍ଷର କାରାଦଣ୍ଡରେ ଦଣ୍ଡିତ କରିଛନ୍ତି କୋର୍ଟ । ଦୋଷୀ ମଧ୍ୟ ସମ୍ପୃକ୍ତ ନାବାଳକ ଓ ନାବାଳିକାଙ୍କ ସମ୍ପର୍କୀୟ ବୋଲି ଜଣାପଡିଛି ।
ବର୍ଷ 2021 ଅକ୍ଟୋବର 3 ତାରିଖରେ ଇଦୁକି ଜିଲ୍ଲାର ଅଞ୍ଚଳର ଅମକ୍କାନଦମ ଅଞ୍ଚଳରେ ଏହି ଜଘନ୍ୟ କାଣ୍ଡ ଘଟିଥିଲା । ଭୋର ସମୟରେ ସମସ୍ତେ ଶୋଇଥିବା ବେଳେ ଅଭିଯୁକ୍ତ ମାରଣାସ୍ତ୍ର ଧରି ଘରେ ଡୋର ଭାଙ୍ଗି ପଶିବା ସହ ନାବାଳିକାକୁ ଦୁଷ୍କର୍ମ ଉଦ୍ୟମ କରିଥିଲା । ଏଥିରେ ବାଧା ଦେବାରୁ ତାର ସାନଭାଇକୁ ହାତୁଡିରେ ଛେଚି ହତ୍ୟା କରିଥିଲା । ପରେ ନାବାଳିକାର ମା’ ଓ ଜେଜେମା’ଙ୍କୁ ମଧ୍ୟ ହତ୍ୟା କରିବା ଉଦ୍ୟମରେ ମରଣାନ୍ତକ ଆକ୍ରମଣ କରିଥିଲା ଅଭିଯୁକ୍ତ ।
ଘଟଣାସ୍ଥଳରେ 6 ବର୍ଷୀୟ ନାବାଳକର ମୃତ୍ୟୁ ହୋଇଥିବା ବେଳେ ମା’ ଓ ଜେଜେମା’ ମଧ୍ୟ ଆକ୍ରମଣରେ ଗୁରୁତର ହୋଇ ଚେତା ହରାଇଥିଲେ । ନାବାଳିକାକୁ ଦୁଷ୍କର୍ମ କରିବା ସହ ମୁର୍ମୁଷ ଅବସ୍ଥାରେ ଫିଙ୍ଗି ଦେଇ ଫେରାର ହୋଇଯାଇଥିଲା ଅଭିଯୁକ୍ତ । ପଡୋଶୀମାନେ ଏ ସମ୍ପର୍କରେ ସୂଚନା ପାଇ ନାବାଳିକା, ତାର ମା’ ଓ ଜେଜେମା’ଙ୍କୁ ଉଦ୍ଧାର କରି ହସ୍ପିଟାଲର ଭର୍ତ୍ତି କରିଥିଲେ । ପରେ ପୋଲିସ ଏକ ମାମଲା ରୁଜୁ କରି ଫେରାର ଅଭିଯୁକ୍ତକୁ ଗିରଫ କରିଥିଲା ।
ଏହା ମଧ୍ୟ ପଢନ୍ତୁ:-West Bengal: ଦୁଇ ମହିଳାଙ୍କୁ ଉଲଗ୍ନ କରି ମାଡ, ଭିଡିଓ ଭାଇରାଲ ପରେ ମମତାଙ୍କୁ ଘେରିଲା ବିଜେପି
ଏହି ମାମଲାର ଚୂଡାନ୍ତ ରାୟ ପ୍ରକାଶ ପାଇଛି । ଇଦୁକି ଫାଷ୍ଟଟ୍ରାକ ପୋକ୍ସୋ କୋର୍ଟରେ ବିଚାରପତି ଟି.ଜି ଭର୍ଗିସ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିଛନ୍ତି । ମାମଲାରେ ପୋଲିସର ପ୍ରମାଣ ସମେତ ମୋଟ 73 ଜଣଙ୍କ ସାକ୍ଷ ଗ୍ରହଣ କରିଥିଲେ କୋର୍ଟ । ନାବାଳକକୁ ହତ୍ୟା, ନାବାଳିକା ଦୁଷ୍କର୍ମ ଓ ଅନ୍ୟ ଦୁଇଜଣଙ୍କୁ ହତ୍ୟା ଉଦ୍ୟମ ଏପରି ଭାବେ ଭିନ୍ନ ଭିନ୍ନ ମାମଲାରେ ଦୋଷୀକୁ ଫାଶୀ ଓ ମୋଟ 92 ବର୍ଷର କାରାଦଣ୍ଡରେ ଦଣ୍ଡିତ କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
