ରାୟପୁର: ଛତିଶଗଡରେ ଚାଞ୍ଚଲ୍ୟ । ଗୋଟିଏ ପରିବାରରୁ 5ଟି ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ଘଟଣା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ପୋଲିସ ମାମଲାର ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ ଛତିଶଗଡର ରାଜଧାନୀ ରାୟପୁରସ୍ଥିତ ଅଭନପୁର କେନ୍ଦ୍ରୀ ଗାଁର ଏକ ପରିବାରରୁ 5 ଜଣଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ଗାଁର କମଳେଶ ସାହୁ ନାମକ ଜଣେ ବ୍ୟକ୍ତିଙ୍କ ପରିବାରରୁ 5ଟି ମୃତଦେହ ଉଦ୍ଧାର କରାଯାଇଛି । ଘରର ଏକ କଠୋରୀରୁ କମଲେଶଙ୍କ ମୃତଦେହ ଉଦ୍ଧାର କରାଯାଇ ଥିବାବେଳେ ଅନ୍ୟ ଏକ କଠୋରୀରୁ କମଲେଶଙ୍କ ମାଆ, ପତ୍ନୀ ଏବଂ ଦୁଇ ଛୁଆଙ୍କ ମୃତଦେହ ଉଦ୍ଧାର କରାଯାଇଛି ।
ତେବେ ଏମାନଙ୍କ ମୁହଁରେ ଧଳାରଙ୍ଗର ଦାଗ ଦେଖିବାକୁ ମିଳିଛି, ଯାହା ବିଷ ପିଇଥିବା ସନ୍ଦେହ କରାଯାଉଛି । ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ପୋଷ୍ଟମଟମ ପାଇଁ ପଠାଇଛି । ତେବେ ମାମଲାଟି ଆତ୍ମହତ୍ୟା ନା ହତ୍ୟା ତାହା ସ୍ପଷ୍ଟ ହୋଇ ନ ଥିବାବେଳେ ମୃତ୍ୟୁର କାରଣ ମଧ୍ୟ ଜଣାପଡିନାହିଁ । ପୋଷ୍ଟମଟମ୍ ରିପୋର୍ଟ ଆସିବା ପରେ ସତ ସାମ୍ନାକୁ ଆସିବ ବୋଲି ପୋଲିସ କହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
