ନୂଆଦିଲ୍ଲୀ: ହିନ୍ଦୁ, ଜୈନ, ବୌଦ୍ଧ ଏବଂ ଶିଖ ଧର୍ମାବଲମ୍ବୀଙ୍କୁ ମୁସଲମାନ, ପାର୍ସୀ ଓ ଖ୍ରୀଷ୍ଟିଆନଙ୍କ ପରି ନିଜର ଧାର୍ମିକ ସ୍ଥାନ ପ୍ରତିଷ୍ଠା, ପରିଚାଳନା ତଥା ରକ୍ଷଣାବେକ୍ଷଣା ଅଧିକାର ପ୍ରଦାନ କରିବା ଦାବିରେ ହୋଇଥିବା ମାମଲାର ଶୁଣାଣି କରିଛନ୍ତି ସର୍ବୋଚ୍ଚ କୋର୍ଟ । ଶୁଣାଣିରେ ସର୍ବୋଚ୍ଚ କୋର୍ଟ ସ୍ପଷ୍ଟ କରିଛନ୍ତି, ଏହା ବ୍ୟବସ୍ଥାପିକା ଦ୍ବାରା ପ୍ରସ୍ତୁତ ହୋଇଥିବା ନିୟମ । ସମ୍ବିଧାନ ଦ୍ବାରା ହୋଇଥିବା ନିର୍ଣ୍ଣୟ । ତେଣୁ ବ୍ୟବସ୍ଥାପିକାର କ୍ଷେତ୍ରାଧିକାର ମଧ୍ୟରେ ନ୍ୟାୟପାଳିକା ପ୍ରବେଶ କରିପାରିବ ନାହିଁ ବୋଲି କହି ଏହି ମାମଲାର ଶୁଣାଣି ପାଇଁ ମନା କରିଦେଇଛନ୍ତି ସର୍ବୋଚ୍ଚ କୋର୍ଟ ।
ପ୍ରଧାନ ବିଚାରପତି ଡିଓ୍ବାଇ ଚନ୍ଦ୍ରଚୂଡଙ୍କ ଅଧ୍ୟକ୍ଷତାରେ ଗଠିତ ଜଷ୍ଟିସ ଜେବି ପର୍ଦ୍ଦିଓ୍ବାଲା ଓ ଜଷ୍ଟିସ ମନୋଜ ମିଶ୍ରାଙ୍କ 3 ଜଣିଆ ଖଣ୍ଡପୀଠ ଆଜି (ବୁଧବାର) ଏହି ମାମଲାର ଶୁଣାଣି କରିଥିଲେ । ପ୍ରଧାନ ବିଚାରପତି ଏହି ମାମଲାର ବିଚାର ପ୍ରକ୍ରିୟା ଆଗକୁ ବଢାଇବା ପାଇଁ ଅନିଚ୍ଛା ପ୍ରକାଶ କରିଥିଲେ । ଆବେଦନକାରୀ ଓକିଲ ଅଶ୍ବିନୀ ଉପାଧ୍ୟୟଙ୍କୁ ଏହା କଣ ଶୁଣାଣିଯୋଗ୍ୟ ଆବେଦନ ବୋଲି ପ୍ରଧାନ ବିଚାରପତି ପ୍ରଶ୍ନ ମଧ୍ୟ କରିଥିଲେ । ଶୁଣାଣିଯୋଗ୍ୟ ଆବେଦନ କରିବାକୁ ମଧ୍ୟ ପରାମର୍ଶ ଦେବା ସହ ଏହା ଏକ ଲୋକପ୍ରିୟତା ହାସଲ କରିବା ପାଇଁ ଉଦ୍ଦିଷ୍ଟ ପିଟିସନ ବୋଲି ଖଣ୍ଡପୀଠ କହିଥିଲେ ।
ଆବେଦନକାରୀ ଓକିଲ ଏହି ମାମଲାର ଶୁଣାଣି ପ୍ରକ୍ରିୟା ଜାରି ରଖିବା ପାଇଁ କୋର୍ଟଙ୍କୁ ଅନୁରୋଧ କରିଥିଲେ । ଏଥିରେ ଅସନ୍ତୋଷ ପ୍ରକାଶ କରି କୋର୍ଟ କହିଥିଲେ, ଏହା କୌଣସି ଶୁଣାଣିଯୋଗ୍ୟ ପିଟିସନ ନୁହେଁ । ଏପରି ଆବେଦନକୁ ଜନସ୍ବାର୍ଥ ମାମଲା ବର୍ଗରେ ମଧ୍ୟ ଶ୍ରେଣୀଭୁକ୍ତ କରାଯାଇ ପାରିବନାହିଁ । ସେମାନଙ୍କୁ ମିଳିଥିବା କ୍ଷମତା ସମ୍ପର୍କିତ ନିୟମ ବ୍ୟବସ୍ଥାପିକା ଦ୍ବାରା ନିର୍ଣ୍ଣୟ ହୋଇଛି । ସମ୍ବିଧାନର ଧାରା-26 ଅନୁସାରେ ଏହା ସ୍ଥିର ହୋଇଛି । ତେଣୁ ଏହା ନ୍ୟାୟପାଳିକାର କ୍ଷେତ୍ରାଧିକାର ନୁହେଁ । ତେଣୁ ବ୍ୟବସ୍ଥାପିକାର କ୍ଷେତ୍ର ପରିସରରେ ନ୍ୟାୟପାଳିକା ପ୍ରବେଶ କରିପାରିବ ନାହିଁ ବୋଲି କୋର୍ଟ ସ୍ପଷ୍ଟ କରିଥିଲେ ।
ମୁସଲମାନ, ପାର୍ସୀ ଓ ଖ୍ରୀଷ୍ଟିଆନ ପରି ଧର୍ମରେ ନିଜର ଧାର୍ମିକ ସ୍ଥାନ ପ୍ରତିଷ୍ଠା, ପରିଚାଳନା ତଥା ରକ୍ଷଣାବେକ୍ଷଣା ଅଧିକାର ରହିଛି । ଏହା ଭାରତୀୟ ସମ୍ବିଧାନରେ ମଧ୍ୟ ଉଲ୍ଲେଖ ରହିଛି । ଏହି ପରି ଅଧିକାର ହିନ୍ଦୁ ଓ ଅନ୍ୟ କିଛି ଧର୍ମକୁ ମଧ୍ୟ ପ୍ରଦାନ କରିବା ପାଇଁ ଏହି ମାମଲା ସର୍ବୋଚ୍ଚ କୋର୍ଟରେ ଦାଏର ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
