ଲକ୍ଷ୍ନୌ: ଉତ୍ତରପ୍ରଦେଶରେ ଜାରି ରହିଛି ଭୋଟ ଗଣନା । ବିଜେପି ୨୬୦ରୁ ଅଧିକ ଆସନରେ ଆଗୁଆ ଥିବାବେଳେ ୧୩୨ ଆସନରେ ଲିଡ୍ କରୁଛି ସମାଜବାଦୀ ପାର୍ଟି । ଏହାରି ମଧ୍ୟରେ ବିଜେପି ଓ ସପା କର୍ମୀ ମୁହାଁମୁହିଁ ହୋଇଛନ୍ତି । କନୌଜ ବିଧାନସଭା ମଣ୍ଡଳୀରେ ଦୁଇ ଦଳର ସମର୍ଥକଙ୍କ ମଧ୍ୟରେ ପଥର ମାଡ ହୋଇଛି । ପଥର ମାଡରେ ଜଣେ ସୁରକ୍ଷାକର୍ମୀଙ୍କ ମୁଣ୍ଡରେ ଗଭୀର ଆଘତ ଲାଗିଥିବା ବେଳେ ଅନେକ ଲୋକେ ଆହତ ହୋଇଥିବାର ସୂଚନା ମିଳିଛି ।
ସୂଚନା ଅନୁଯାୟୀ, କନୌଜରେ ମତଗଣନା ସ୍ଥଳରୁ ୨୦୦ ମିଟର ଦୂରରେ ସପା ଓ ବିଜେପି ସମର୍ଥକଙ୍କ ମଧ୍ୟରେ ଏହି ପଥରମାଡ ହୋଇଛି । ପ୍ରଥମେ ଏଠାରେ ଦୁଇ ଦଳ ପକ୍ଷରୁ ଜୋରଦୋର ନାରାବାଜି ହୋଇଥିଲା । ଏହାପରେ ଚାହୁଁ ଚାହୁଁ ଉଭୟ ପକ୍ଷର ସମର୍ଥକଙ୍କ ମଧ୍ୟରେ ଧସ୍ତାଧସ୍ତି ସ୍ଥିତି ଉପୁଜିଥିଲା । ଏହାକୁ ଅଟକାଇବାକୁ ଚେଷ୍ଟା କରୁଥିବା ସମୟରେ ଜଣେ ସୁରକ୍ଷାକର୍ମୀ ଆହତ ହୋଇଛନ୍ତି । ସ୍ଥିତିକୁ ନିୟନ୍ତ୍ରଣ କରିବାକୁ ସୁରକ୍ଷାକର୍ମୀଙ୍କୁ ଲାଠି ଚାଳନା କରିବାକୁ ପଡିଛି ।
