ନୂଆଦିଲ୍ଲୀ: ଚୀନର ରାଜଧାନୀ ବେଜିଂରେ ଶୀତକାଳୀନ ଅଲିମ୍ପିକ୍ସ ଆୟୋଜନ ହେବାକୁ ଯାଉଥିବା ବେଳେ ଏହା ପୂର୍ବରୁ ଏକ ଷଡଯନ୍ତ୍ର ଆରମ୍ଭ କରିଛି ଚୀନ । ଭାରତ-ଚୀନ ମଧ୍ୟରେ ଲାଗି ରହିଥିବା ସୀମା ବିବାଦକୁ ଚୀନ କେବଳ ସାମରିକ କିମ୍ବା କୂଟନୈତିକ ସ୍ତରରେ ସୀମିତ ରଖିନାହିଁ ବରଂ କ୍ରୀଡା ମୈଦାନରେ ମଧ୍ୟ ଏହି ବିବାଦକୁ ରୂପ ଦେବାକୁ ଯାଉଛି । ଆଜି ସେମିତି କିଛି ଦୃଶ୍ୟ ସାମ୍ନାକୁ ଆସିବା ପରେ ଭାରତରେ ମଧ୍ୟ ତାର ପ୍ରତିକ୍ରିୟା ଆରମ୍ଭ ହୋଇଯାଇଛି ।
ଆଜି (ବୁଧବାର) ଚୀନ ସେନା (PLA) ରେ ଜଣେ କାର୍ଯ୍ୟରତ କମାଣ୍ଡର ଶୀତକାଳୀନ ଅଲମ୍ପିକ୍ସର ବ୍ୟବହାର ହେବାକୁ ଥିବା ମଶାଲ ରାଲି ହାତରେ ଧରି ଏହାକୁ ପ୍ରଦର୍ଶିତ କରୁଥିବାର ଏକ ଦୃଶ୍ୟ ସାମ୍ନାକୁୁ ଆସିଛି । ଚୀନ କମାଣ୍ଡର କର୍ଣ୍ଣେଲ କାଇ ଫାବାଓ ଏହି ମଶାଲ ସହ ନଜର ଆସିଛନ୍ତି, ଯିଏକି ଭାରତ-ଚୀନ ସେନା ମଧ୍ୟରେ ଗଲଓ୍ବାନ ଘାଟିରେ ହୋଇଥିବା ସଂଘର୍ଷରେ ଗୁରୁତର ଆହତ ହୋଇଥିବା ଚର୍ଚ୍ଚା ହୋଇଛି ।
ଦୁଇ ଦେଶ ମଧ୍ୟରେ ସୀମାରେ ଉତ୍ତେଜନା ହ୍ରାସ କରିବା ପାଇଁ ଏକାଧିକ ବୈଠକ ସରିଥିବା ବେଳେ ଉଭୟ ପକ୍ଷରୁ ପ୍ରକ୍ରିୟା ମଧ୍ୟ ଜାରିରହିଛି । ଏପରି ସ୍ଥଳେ ଦୁଇ ଦେଶର ସେନା ମଧ୍ୟରେ ହୋଇଥିବା ସଂଘର୍ଷରେ ଆହତ ଜଣେ କମାଣ୍ଡରଙ୍କ ହାତରେ ମଶାଲ ରିଲେ ମାଧ୍ୟମରେ ଭାରତକୁ ନିନ୍ଦା କରିବାକୁ ଚୀନ ପ୍ରୟାସ କରୁଥିବା ଦେଖାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
