ରାୟପୁର: ସର୍ପାଘାତରେ ମଣିଷର ମୃତ୍ୟୁ ହେବା ଘଟଣା ପ୍ରାୟତଃ ସବୁଠି ଦେଖିବାକୁ ମିଳିଥାଏ (child bites snake in jashpur)। ତେବେ ଛତିଶଗଡରେ ଏହାର ସମ୍ପୂର୍ଣ୍ଣ ବ୍ୟତିକ୍ରମ ଘଟଣା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଛତିଶଗଡ ଯଶପୁର ଅଞ୍ଚଳରେ ଏକ ବାଳକକୁ ସାପଟି କାମୁଡିବା ପରେ ବାଳକଟି କ୍ରୋଧିତ ହୋଇ ସାପଟିକୁ କାମୁଡି ଦେଇଥିବା ଦେଖିବାକୁ ମିଳିଥିଲା । ପରେ ସାପଟିର ମୃତ୍ୟୁ ହେବା ସହ ପିଲାଟିକୁ ପରିବାର ସଦସ୍ୟ ତୁରନ୍ତ ହସ୍ପିଟାଲରେ ଭର୍ତ୍ତି କରିଥିଲେ । ତେବେ ପିଲାଟି ସୁସ୍ଥ ହୋଇ ଫେରିଥିବା ଚର୍ଚ୍ଚାର ବିଷୟ ପାଲଟିଛି ।
କ’ଣ ଥିଲା ସମୂର୍ଣ୍ଣ ଘଟଣା :-
ଯଶପୁର ଜିଲ୍ଲାର ବଗିଚା ବିକାଶ ବ୍ଲକର ପାଣ୍ଡାରାପଥର ଅଞ୍ଚଳରେ ଏହି ଘଟଣାଟି ଘଟିଛି । ଗ୍ରାମବାସୀଙ୍କ ପକ୍ଷରୁ ମିଳିଥିବା ସୂଚନା ଅନୁସାରେ, ସ୍ଥାନୀୟ ଜନଜାତି ସମ୍ପ୍ରଦାୟର ଦୀପକରାମ ନାମକ ଏହି 12 ବର୍ଷୀୟ ବାଳକଟି ନିଜ ଘର ନିକଟରେ ଭାଇ ଭଉଣୀଙ୍କ ସହ ଖେଳୁଥିଲା । ତେବେ କୌଣସି କାରଣବଶତଃ ସେଠାରେ ଏକ ନାଗ ସାପ ତାକୁ କାମୁଡି ଦେଇଥିଲା (child bites snake in jashpur)। ସାପ ଚୋଟ ଯନ୍ତ୍ରଣାରେ ଜର୍ଜରିତ ବାଳକଟି ମଧ୍ୟ ଉତ୍ତେଜିତ ହୋଇ ସାପଟିକୁ ଧରି କାମୁଡି ଦେଇଥିଲା । ତେବେ ସାପଟିର ସେହିଠାରେ ହିଁ ମୃତ୍ୟୁ ହୋଇଥିଲା । ଅନ୍ୟପଟେ ଏ ସମ୍ପର୍କରେ ଖବର ପାଇ ପରିବାର ସଦସ୍ୟ ବାଳକଟିକୁ ତୁରନ୍ତ ନିକଟସ୍ଥ ହସ୍ପିଟାଲରେ ଭର୍ତ୍ତି କରିଥିଲେ । ଚିକିତ୍ସା ପରେ ବାଳକଟି ସୁସ୍ଥ ହୋଇ ଘରକୁ ଫେରିଛି ।
