ଜୟପୁର: ରାଜସ୍ଥାନର ଯୋଧପୁର ସହରରେ ଛାତିଥରା ଦୁର୍ଘଟଣା । ଭିଡରାସ୍ତାରେ ଲୋକଙ୍କ ଉପରେ ମାଡିଗଲା ଦ୍ରୁତଗତିରେ ଆସୁଥିବା ଏକ ଅନିୟନ୍ତ୍ରିତ ଅଡି କାର । ଯାହାର ଲୋମଟାଙ୍କୁରା ଦୃଶ୍ୟ CCTVରେ ରେକର୍ଡ ହୋଇଛି । ଯାହାକୁ ଦେଖିଲେ ଯେ କେହି ବି ବିଚଳିତ ହୋଇପାରେ । ଏହି ଦୁର୍ଘଟଣାରେ ଜଣେ 16 ବର୍ଷୀୟ ନାବାଳକଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବାବେଳେ 9 ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରେ ୪ ଜଣଙ୍କ ଅବସ୍ଥା ଗମ୍ଭୀର ଥିବା ସୂଚନା ରହିଛି ।
ସମ୍ପୂର୍ଣ୍ଣ ଘଟଣାକ୍ରମ ଅନୁସାରେ, ଆଜି (ମଙ୍ଗଳବାର) ସକାଳେ ଯୋଧପୁର ହାଉସିଂ ବୋର୍ଡ ପୋଲିସ ଷ୍ଟେସନ ପରିସରରେ ଥିବା AIIMS ରୋଡରେ ଏକ ଅଡି କାର ଦ୍ରୁତଗତିରେ ଅନିୟନ୍ତ୍ରିତ ଲୋକଙ୍କ ଉପରେ ମାଡି ଯାଇଥିଲା । ତେବେ ଗାଡିଟି ନିୟନ୍ତ୍ରଣ ହରାଇ ଏପରି ଦୁର୍ଘଟଣା ଘଟିଥିବା ଆଶଙ୍କା କରାଯାଉଛି । ଲୋକଙ୍କ ଉପରେ ମାଡିଯିବା ପରେ ନିକଟରେ ଏକ ପାଚେରୀରେ ଧକ୍କା ଖାଇ ଗାଡିିଟି ଅଟକି ଯାଇଥିଲା ।
ତେବେ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ଯୋଧପୁର ଗସ୍ତରେ ଥିବା ସମୟରେ ଏହି ଦୁର୍ଘଟଣା ଘଟିଛି । ଘଟଣା ସମ୍ପର୍କରେ ଜାଣିବା ପରେ ମୁଖ୍ୟମନ୍ତ୍ରୀ ଗେହଲୋଟ ବିମାନବନ୍ଦରରୁ ସିଧାସଳଖ AIIMS ହସ୍ପିଟାଲରେ ପହଞ୍ଚି ଆହତମାନଙ୍କ ଅବସ୍ଥା ସମ୍ପର୍କରେ ପଚାରି ବୁଝିଥିଲେ । ମୃତକଙ୍କ ପରିବାରକୁ ତୁରନ୍ତ 2ଲକ୍ଷ ଟଙ୍କାର ଅନୁକମ୍ପା ରାଶି ସହ ଗୁରୁତର ପ୍ରତ୍ୟେକ ଆହତଙ୍କୁ 1ଲକ୍ଷ ଏବଂ ଅନ୍ୟ ଆହତମାନଙ୍କୁ 50 ହଜାର ଟଙ୍କାର ସହାୟତା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଅଶୋକ ଗେହଲୋଟ ।
ବ୍ୟୁରୋ ରିପୋର୍ଟ, ଇଟିଭି ଭାରତ
