ବେଙ୍ଗାଲୁରୁ: ପରିବାରଠାରୁ ଅଲଗା ହେବା ଯେ କେତେ କଷ୍ଟକର ତାହା ଅଳ୍ପ ବହୁତେ ସଭିଏଁ ଜାଣନ୍ତି । ହେଲେ ପରିବାରଠାରୁ ଅଲଗା ହେବା ପରେ ତାଙ୍କୁ ଚିହ୍ନି ନପାରିବାର ଦୁଃଖ ବହୁତ କମ ଲୋକେ ବୁଝନ୍ତି । ଏପରି ଏକ ପରିବାର ରହିଛି ତାମିଲନାଡୁରେ । ଯେଉଁ ପରିବାରରେ ତିନି ଛୁଆ ଓ ସ୍ବାମୀଙ୍କୁ ଛାଡି 10 ବର୍ଷ ତଳେ କେଉଁ ଆଡେ ଚାଲିଯାଇଥିଲେ ମ୍ୟାରୀ ।
ମ୍ୟାରୀ ନିଜ ମାନସିକ ଭାରସାମ୍ୟ ହରାଇ 10 ବର୍ଷ ତଳେ ନିଜ 3 ଛୁଆ ଓ ସ୍ବାମୀଙ୍କୁ ଛାଡି କେଉଁ ଆଡେ ଚାଲିଯାଇଥିଲେ । ଏହାପରେ ବେଶ କିଛି ଦିନ ପର୍ଯ୍ୟନ୍ତ ଖୋଜାଖୋଜି ମଧ୍ୟ ଜାରି ରହିଥିଲା। ହେଲେ ମିଳିପାରିନଥିଲା କୌଣସି ସୁଫଳ । ପରେ ହାର ମାନି ଗତ ବର୍ଷେ ତଳେ ଆଖି ବୁଜିଥିଲେ ତାଙ୍କ ସ୍ବାମୀ । ପିଲାମାନଙ୍କୁ ଏକୁଟିଆ କରି ସବୁଦିନ ପାଇଁ ଚାଲିଯାଇଥିଲେ ସେ । ହେଲେ ଭାଗ୍ୟର ଲେଖା କିଛି ଅଲଗା ଥିଲା ।
ହଠାତ୍ ଏକ ଏନଜିଓ ସାହାଯ୍ୟରେ ପିଲାମାନେ ଜାଣିବାକୁ ପାଇଥିଲେ କି ମା’ ଜୀବିତ ଏବଂ ମାଙ୍ଗାଲୋରର ଏକ ସେଲଟର ହୋମରେ ସୁରକ୍ଷିତ ଅଛନ୍ତି । ବାସ୍, ଏହାପରେ ଖୁସିରେ ଆଉ ପାଦ ଲାଗିନଥିଲା ଭୂଇଁରେ । ତୁରନ୍ତ ଭାଇ ଭଉଣୀ ଆସି ପହଞ୍ଚିଥିଲେ ମାଙ୍ଗାଲୋରର ସେଲଟର ହୋମରେ । ପ୍ରଥମେ ନିଜ ପିଲାମାନଙ୍କୁ ଚିହ୍ନି ପାରିନଥିବା ବେଳେ ପରେ ସେମାନଙ୍କୁ ଚିହ୍ନି ନିଜ ଘରକୁ ଫେରିଛନ୍ତି ମ୍ୟାରୀ ।
ସତରେ ଭାଗ୍ୟର ଲେଖା ଆଗରେ ହାର ମାନେ ସବୁକିଛି । ଯାହା ଏହି ପରିବାର ପାଖରେ ପ୍ରମାଣିତ ହୋଇଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
