ଡେରାଡୁନ: ପ୍ରକୃତିର କରାଳ ରୂପ ଆଗରେ ଅସହାୟ ସମସ୍ତେ । ବିଗତ କିଛିଦିନ ହେବ ଲଗାଣ ବର୍ଷା ଯୋଗୁଁ ଦେବଭୂମି ଉତ୍ତରାଖଣ୍ଡରେ ପ୍ରବଳରୁ ଅତି ପ୍ରବଳ ବର୍ଷା ହୋଇଛି । ରାଜ୍ୟର ପିଥୋରଗଡ ଜିଲ୍ଲାରେ ହୋଇଥିବା ବାଦଲ ଫଟା ବର୍ଷା କାରଣରୁ ଜଣଙ୍କର ମୃତ୍ୟୁ ହୋଇଥିବା ବେଳେ 2 ଜଣ ଆହତ ହୋଇଛନ୍ତି।
ତେବେ ବର୍ଷା ଯୋଗୁଁ ଚମୋଲୀ ଘାଟି ପାଖରେ ଏକ ଯାତ୍ରୀବାହୀ ଗାଡି ମାଟିରେ ଦବି ଯାଇଛି । ଏଥିରେ କୌଣସି ଯାତ୍ରୀଙ୍କର କ୍ଷୟକ୍ଷତି ହୋଇଥିବାର ଜଣା ପଡିନାହିଁ। ସେପଟେ ଥରାଲୀ ଅଞ୍ଚଳରେ ଛିବା 2ଟି ଗୋଶାଳା ମଧ୍ୟ କ୍ଷତିଗ୍ରସ୍ତ ହୋଇଛି । ଯେଉଁ ସବୁ ଅଞ୍ଚଳରେ ବାଦଲ ଫଟା ବର୍ଷା ହୋଇଛି ସେହି ଅଞ୍ଚଳରେ ଅନେକ ଘରଦ୍ବାର ମଧ୍ୟ ପ୍ରଭାବିତ ହୋଇଥିବାର ଖବର ମିଳିଛି।
ଏ ଘଟଣା ସମ୍ପର୍କରେ ଉତ୍ତରଖଣ୍ଡ ମୁଖ୍ୟମନ୍ତ୍ରୀ ତ୍ରିବେନ୍ଦ୍ର ସିଂହ ରାୱତ ଖବର ପାଇବା ପରେ ପିଥୋରଗଡ଼ ଓ ଚମୋଲୀ ଜିଲ୍ଲା ପ୍ରଶାସନ ସହ ଆଲୋଚନା କରି ବର୍ଷା ଯୋଗୁଁ ହୋଇଥିବା କ୍ଷୟକ୍ଷତି ସମ୍ପର୍କରେ ପଚାରି ବୁଝିଛନ୍ତି । ସେପଟେ ଘଟଣାସ୍ଥଳରେ ପହଞ୍ଚିବା ଲାଗି ସେ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଆରମ୍ଭ ହୋଇଯାଇଛି।
