ନୂଆଦିଲ୍ଲୀ: ପୂର୍ବରୁ ଯେକୌଣସି ଦେଶକୁ ବିମାନ ସେବା ଯୋଗାଉଥିବା ଏୟାର ଇଣ୍ଡିଆ ସେଠାରେ ନିଜେ ଗ୍ରାଉଣ୍ଡ ପରିଚାଳନାର ଅଧିକାର ରଖୁଥିଲା । ହେଲେ ଆମେରିକାରେ ନିଜସ୍ବ ନୀତି ଅନୁଯାୟୀ ଏହି ଅଧିକାରକୁ ଛଡାଇ ଦିଆଯାଇଥିଲା । ତେଣୁ ଆମେରିକାରେ ଗ୍ରାଉଣ୍ଡ ପରିଚାଳନା ପାଇଁ ଏୟାର ଇଣ୍ଡିଆକୁ ସେଠାକାର ଆଞ୍ଚଳିକ କମ୍ପାନୀର ସହାୟତା ନେବାକୁ ପଡୁଥିଲା । ହେଲେ ଶୁକ୍ରବାର ପୁଣି ଥରେ ନିଜ ଗ୍ରାଉଣ୍ଡ ପରିଚାଳନାର ଅଧିକାର ଫେରି ପାଇଛି ଏୟାର ଇଣ୍ଡିଆ । ୟାହାକୁ ନେଇ ଏୟାର ଇଣ୍ଡିଆ କର୍ମଚାରୀଙ୍କ ମଧ୍ୟ ଖେଳିଛି ଖୁସିର ଲହରୀ ।
ସୂଚନା ଅନୁୟାୟୀ 2019 ମସିହା ଜୁଲାଇ ମାସରେ ଏୟାର ଇଣ୍ଡିଆ ସମେତ ଅନ୍ୟ ବିମାନ କମ୍ପାନୀଠାରୁ ଗ୍ରାଉଣ୍ଡ ପରିଚାଳନାର ଅଧିକାର ଛଡାଇଥିଲା ୟୁଏସ ଡିପାର୍ଟମେଣ୍ଟ ଅଫ ଟ୍ରାନ୍ସପୋର୍ଟେସନ (ୟୁଏସଡିଓଟି) । ଏଥିସହ ଆମେରିକାରେ ଏୟାରଇଣ୍ଡିଆର ଗ୍ରାଉଣ୍ଡ ପରିଚାଳନା ପାଇଁ ଅନ୍ୟ ଘରୋଇ କମ୍ପାନୀକୁ ଦିଆଯାଇଥିଲା ଦାୟିତ୍ବ । ହେଲେ ବର୍ଷେ ପରେ ପୁଣି ନିଜ ଅଧିକାର ଫେରି ପାଇଛି ଏୟାର ଇଣ୍ଡିଆ । ତେବେ ଗ୍ରାଉଣ୍ଡ ପରିଚାଳନା ମଧ୍ୟରେ ରହିଛି ଯାତ୍ରୀଙ୍କ ବ୍ୟାଗେଜକୁ ବିମାନର ଲୋଡ ଓ ଅନଲୋଡ କରିବା ପ୍ରକ୍ରିୟା । ଏଥିସହ ବିମାନରେ ବରଫ ସଫେଇ, ଚେକ-ଇନ ଓ ଟିକେଟିଂ ମଧ୍ୟ ଏହି ପ୍ରକ୍ରିୟାର ଅନ୍ତର୍ଗତ ।
ଏନେଇ ଏୟାର ଇଣ୍ଡିଆ କର୍ତ୍ତୃପକ୍ଷ ପ୍ରତିକ୍ରିୟା ଦେଇ କହିଛନ୍ତି କି, ଆମେରିକା ଦ୍ବାରା ହୋଇଥିବା ନୂଆ ଘୋଷଣାରେ କମ୍ପାନୀକୁ ଏକ ନୂଆ ସୁଯୋଗ ମିଳିଛି । ପୂର୍ବରୁ କମ୍ପାନୀ ଉପରେ ଗ୍ରାଉଣ୍ଡ ପରିଚାଳନାର ସୁଯୋଗ ଦିଆଯାଉନଥିବାବେଳେ ଏବେ ନୂଆ ଘୋଷଣା ପରେ କମ୍ପାନୀ ଗ୍ରାଉଣ୍ଡ ସମ୍ଭାଳିବା ନେଇ ପ୍ରସ୍ତୁତ ରହିଥିବା ମଧ୍ୟ ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
