ଓ୍ବାସିଂଟନ: ଚୀନର 28ଟି ସଂସ୍ଥା ଉପରେ ପ୍ରତିବନ୍ଧକ ଲଗାଇଛି ଆମେରିକା। ତେବେ ଚୀନର ସିନଜିଆଙ୍ଗ ଅଞ୍ଚଳରେ ବସବାସ କରୁଥିବା ମୁସଲମାନ ଏବଂ ଉଇଘର ସଂଖ୍ୟାଲଘୁ ସମ୍ପ୍ରଦାୟ ଉପରେ ଅକଥନୀୟ ଅତ୍ୟାଚାର ପାଇଁ ଆମେରିକା ଉକ୍ତ ସଂସ୍ଥା ଉପରେ ବ୍ୟାନ ଲଗାଇଥିବା ଜଣାପଡ଼ିଛି । ସେମାନଙ୍କୁ ଟାର୍ଗେଟ କରିବା ଏବଂ ବିଭିନ୍ନ ଅନୈତିକ କାର୍ଯ୍ୟରେ ବ୍ୟବହାର କରିବା ଅଭିଯୋଗ ହୋଇଥିଲା।
ଆମେରିକାର ବିତ୍ତ ମନ୍ତ୍ରୀ ବିଲ୍ବର ରୋସ ବ୍ୟାନ ସମ୍ପର୍କରେ ସୂଚନା ଦେଇଛନ୍ତି । ଏହା ଫଳରେ ଚୀନର ଉକ୍ତ ସଂସ୍ଥା ଆମେରିକାରୁ ଜିନିଷ କିଣିପାରିବେ ନାହିଁ । ରୋସ ଆହୁରି ମଧ୍ୟ କହିଛନ୍ତି, ଚୀନର ମନମୁଖୀ ଶାସନ ଏବଂ ଏଭଳି ଅମାନବୀୟ କାଣ୍ଡ କୌଣସି ପରିସ୍ଥିତିରେ ବରଦାସ୍ତ କରାଯିବ ନାହିଁ।
ଉଇଘର ହେଉଛି ଏକ ସଂଖ୍ୟାଲଘୁ ସମ୍ପ୍ରଦାୟ । ଏହି ସମ୍ପ୍ରଦାୟ ମଧ୍ୟ ଓ ପୂର୍ବ ଏସିଆର କେତେକ ସ୍ଥାନରେ ଦେଖାଯାଇଥାନ୍ତି । ମାତ୍ର ଚୀନର ଅଧିକାଂଶ ସ୍ଥାନରେ ଏହି ସମ୍ପ୍ରଦାୟର ଲୋକେ ବସବାସ କରି ଆସୁଛନ୍ତି । ସେଠାକାର କମ୍ୟୁନିଷ୍ଟ ସରକାର ସେମାନଙ୍କୁ ନାଗରିକତା ପ୍ରଦାନ କରିଛନ୍ତି । ଏହି ସମ୍ପ୍ରଦାୟର ଲୋକେ ଦଶମ ଶତାବ୍ଦୀ ବେଳକୁ ଇସଲାମ ଧର୍ମର ବଡ଼ ସମର୍ଥକ ଭାବେ ଉଭା ହୋଇଥିଲେ । ପରେ ଷୋଡ଼ଷ ଶତାବ୍ଦୀ ବେଳକୁ ଏମାନେ ମୁସଲିମ ଧର୍ମଗ୍ରହଣ କରିନେଇଥିବା ଜଣାପଡ଼େ । ଏହାପରେ ଉଇଘର ସମ୍ପ୍ରଦାୟ ସଂସ୍କୃତି ଓ ପରିଚୟ ପାଇଁ ଏକ ମହତ୍ତ୍ବପୂର୍ଣ୍ଣ ଭୂମିକା ଗ୍ରହଣ କରିଥିଲେ ।
ତେବେ ଗତ ଅଗଷ୍ଟ ମାସରେ ଏ ନେଇ ଏକ ଗୁରୁତ୍ତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା । ଏଥିରେ ଆମେରିକା, ଜାତିସଂଘ ଏବଂ କାନାଡ଼ା ଏହି ପ୍ରସଙ୍ଗ ଉଠାଇଥିଲେ । ଚୀନ ଏବଂ ପାକିସ୍ତାନ ଉକ୍ତ ଧର୍ମର ସ୍ବାଧୀନତା ଉପରେ ବ୍ୟାପକ ଭାବେ ପ୍ରଭାବ ପକାଉଥିବା ଏବଂ ଉକ୍ତ ସମ୍ପ୍ରଦାୟର ଲୋକଙ୍କ ଉପରେ ଦମନ କରୁଥିବା ପ୍ରସଙ୍ଗ ଉଠିଥିଲା । ଭାରତ ଜମ୍ମୁ କାଶ୍ମୀରରୁ ଧାରା 370 ଉଚ୍ଛେଦ ପରେ ପାକିସ୍ତାନ ବିଳିବିଳାଇଛି । ଏହି ବାହାନାରେ ପାକିସ୍ତାନ ଇସଲାମ ଧର୍ମ, ଭାରତୀୟ ସେନା ଓ କାଶ୍ମୀର ଲୋକଙ୍କୁ ଟାର୍ଗେଟ କରିବା ସହିତ ପଶ୍ଚିମ ରାଷ୍ଟ୍ର ଆଗରେ ମୁସଲିମ ଧର୍ମର ରକ୍ଷା ପାଇଁ କାର୍ଯ୍ୟ କରିବା ବାହାନାରେ ଛଳନା କରୁଥିବାର ଅଭିଯୋଗ ହୋଇଛି । ଏପରିକି ଭାରତକୁ ପରମାଣୁ ଆକ୍ରମଣ କରିବାର ଧମକ ଦେଇଛି ପାକିସ୍ତାନ।
