ନୂଆଦିଲ୍ଲୀ: ଲୋକସଭା ନିର୍ବାଚନ ସରିବା ପରେ ପୁଣି ଥରେ ରାମ ମନ୍ଦିର ନିର୍ମାଣକୁ ନେଇ ଚର୍ଚ୍ଚା ଜୋର ଧରିଛି । ଶିବସେନା ପ୍ରମୁଖ ଉଦ୍ଧବ ଠାକରେ ନିଜ ପାର୍ଟିର 18 ନବନିର୍ବାଚିତ ସାଂସଦଙ୍କ ସହ ଜୁନ 15 ତାରିଖ ଅଯୋଧ୍ୟା ଯିବାର କାର୍ଯ୍ୟକ୍ରମ ରହିଛି ।
ଉଦ୍ଧବ ଅଯୋଧ୍ୟା ଯାଇ ରାମଲଲାଙ୍କ ଦର୍ଶନ କରିବା ସହ ରାମ ମନ୍ଦିରକୁ ନେଇ ଆଇନକାନୁନ ବ୍ୟବସ୍ଥା ଆଣିବା ପାଇଁ କେନ୍ଦ୍ର ସରକାରଙ୍କ ଉପରେ ଚାପ ପକାଇ ପାରନ୍ତି ।
ରାମ ମନ୍ଦିର ନିର୍ମାଣକୁ କାଶ୍ମୀର ସମସ୍ୟା ଭଳି ଜଟିଳ କରାନଯାଉ ବୋଲି ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଦାବି କରିଆସୁଥିବା ଶିବ ସେନା ନିଜ ମୁଖପତ୍ର ସାମ୍ନାର ସମ୍ପାଦକୀୟ ପ୍ରକାଶ କରିଥିଲା । ଗତ ନଭେମ୍ବର ମାସରେ ଉଦ୍ଧବ ନିଜ ପତ୍ନୀ ରଶ୍ମୀ ଓ ପୁତ୍ର ଆଦିତ୍ୟ ଠାକରେଙ୍କ ସହ ପ୍ରଭୁ ଶ୍ରୀରାମଙ୍କ ନଗରୀ ଯାଇ ରାମ ଜନ୍ମଭୂମୀ ନ୍ୟାସର ଅଧ୍ୟକ୍ଷ ନୃତ୍ୟ ଗୋପାଳ ଦାସଙ୍କୁ ମନ୍ଦିର ନିର୍ମାଣ ପାଇଁ ରୁପାର ଇଟା ଦେଇଥିଲେ ।
