ନୂଆଦିଲ୍ଲୀ: ଦେଶରେ କୋରୋନା ମାମଲା ଦ୍ରୁତ ଗତିରେ ବଢୁଛି । ଏ ସମୟରେ ସରକାରଙ୍କ ପକ୍ଷରୁ କୋରୋନା ପରୀକ୍ଷା ଉପରେ ଅଧିକ ଗୁରୁତ୍ବ ଦିଆଯାଉଛି। ତେବେ ଆଜି ଦେଶରେ ରେକର୍ଡ ସଂଖ୍ୟକ ଆକ୍ରାନ୍ତ ଚିହ୍ନଟ ହୋଇଛନ୍ତି। ଗୋଟିଏ ଦିନରେ ପାଖାପାଖି 50 ହଜାର କୋରୋନା ମାମଲା ସାମ୍ନାକୁ ଆସିଛି ।
ଏପଟେ ଶୁକ୍ରବାର ସୁଦ୍ଧା ଦେଶରେ 1,54,28,170 ନମୁନା ପରୀକ୍ଷଣ ହୋଇଥିବା ଭାରତୀୟ କାଉନସିଲ ଅଫ୍ ମେଡିକାଲ୍ ରିସର୍ଚ୍ଚ(ଆଇସିଏମଆର) ପକ୍ଷରୁ ସୂଚନା ମିଳିଛି। ସେହିପରି ଗୁରୁବାର ଦିନ ଦେଶରେ 3,52,801 କୋରୋନା ପରୀକ୍ଷଣ ହୋଇଥିବା ଆଇସିଏମଆର କହିଛି। ସେପଟେ ଦେଶରେ ଆକ୍ରାନ୍ତଙ୍କ ସଂଖ୍ୟା 13 ଲକ୍ଷ ପାଖାପାଖି ପହଞ୍ଚିଲାଣି ।
ଦେଶରେ 24 ଘଣ୍ଟାରେ ସର୍ବାଧିକ 49,310 କୋରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ 740 ଆକ୍ରାନ୍ତଙ୍କର ମୃତ୍ୟୁ ଘଟିଛି । ଏହାକୁ ମିଶାଇ ବର୍ତ୍ତମାନ ସୁଦ୍ଧା ଦେଶରେ ଆକ୍ରାନ୍ତଙ୍କ ସଂଖ୍ୟା 12 ଲକ୍ଷ 87 ହଜାର 945ରେ ପହଞ୍ଚିଛି ।
ମୋଟ ଆକ୍ରାନ୍ତଙ୍କ ମଧ୍ୟରୁ 4,40,135 ଆକ୍ରାନ୍ତ ଆକ୍ଟିଭ 8,17,209 ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି । ଏହାଛଡା ଏହି ମାରାତ୍ମକ ଭାଇରସ ପାଇଁ ଦେଶରେ 30,601 ଆକ୍ରାନ୍ତ ଏବେସୁଦ୍ଧା ପ୍ରାଣ ହରାଇ ସାରିଥିବା ଶୁକ୍ରବାର କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ସୂଚନା ଦେଇଛନ୍ତି ।
