ହାଇଦ୍ରାବାଦ: କୋରୋନା ଲକଡାଉନ ସମୟରେ ବନ୍ଦ ପଡିଛି ଦୋକାନ ବଜାର । ଏଥିରୁ ବାଦ ପଡିନି ଆଲକୋହଲ ବା ମଦ ବ୍ୟବସାୟ । ଯେଉଁଥି ପାଇଁ ଏବେ ଅନେକ ଯୁବପୀଢି ମଦ ଓ ଡ୍ରଗ୍ସ ନପାଇ ପାଗଳ ପ୍ରାୟ । ଏପରି ସମୟରେ ଘରୁ ବାହାରି ଏହାର ସାମାଧାନ କାଢିବା ଅସମ୍ଭବ ହୋଇପଡିଥିବା ବେଳେ ଏକାଠି ହୋଇଛନ୍ତି ଫେସବୁକ, ଟ୍ବିଟର ଓ ଗୁଗୁଲ । ଏହି 3 ବଡ କମ୍ପାନୀ ଏକାଠି ହୋଇ ସୁରକ୍ଷିତ ଇଣ୍ଟରନେଟ ଫାର୍ମାସି ପାଇଁ ଆରମ୍ଭ କରିଛନ୍ତି ନନ-ପ୍ରଫିଟ ସେଣ୍ଟର ‘ଟେକ ଟୁଗେଦର’ ।
ଏହି ଅନଲାଇନ ପ୍ଲାଟଫର୍ମରେ ଡ୍ରଗ ଆଡିକ୍ଟଙ୍କ ପାଇଁ ରହିଛି ସମାଧାନର ପନ୍ଥା । ଜନ୍ସ ହପକିନ୍ସ ଓ ହାଭାର୍ଡ ୟୁନିଭର୍ସିଟିର ଏକ ରିପୋର୍ଟ ମୁତାବକ ଆମେରିକାର 2.5 ମିଲିୟନ ଯୁବପୀଢି ଏହି ଅନଲାଇନ ଟେକ୍ନୋଲୋଜିର ବ୍ୟବହାର ଆରମ୍ଭ କରିସାରିଲେଣି । ଏହା ସେମାନଙ୍କୁ ଘରେ ବସି ନିଜ ବଦଭ୍ୟାସରୁ ମୁକ୍ତି ପାଇବାରେ ସାହାଯ୍ୟ କରୁଥିବା ମଧ୍ୟ ସେମାନେ ପ୍ରକାଶ କରିଛନ୍ତି । ଏହି ବଦଭ୍ୟାସ ପାଇଁ ଯୁବପୀଢି ଏକା ଥିବା ସମୟରେ ନିଜକୁ କ୍ଷତି ପହଞ୍ଚାଇବାକୁ ଚେଷ୍ଟା କରିପାରେ । ଏହାକୁ ଧ୍ୟାନରେ ରଖି ଏହି ଅନଲାଇନ ପ୍ଲାଟଫର୍ମ ଲଞ୍ଚ କରିବା ପାଇଁ ଫେସବୁକ, ଟ୍ବିଟର ଓ ଗୁଗୁଲ ନିଷ୍ପତ୍ତି ନେଇ ସମାଧାନ ପାଇଁ ଏକାଠି ଆଗେଇ ଆସିଥିଲେ । ଏନେଇ ସୂଚନା ଦେଇଛନ୍ତି କାର୍ଯ୍ୟକ୍ରମର କାର୍ଯ୍ୟକାରୀ ନିର୍ଦ୍ଦେଶକ ମାର୍ଜୋରୀ କ୍ଲିଫଟୋନ ।
ଏହି ଯୋଜନାରେ ଟ୍ବିଟରରେ ହ୍ୟାସଟ୍ୟାଗ ଦ୍ବାରା ଲୋକେ ସମାଧାନ ପାଇପାରୁଥିବା ବେଳେ ୟୁଜର୍ସଙ୍କୁ ରିକଭରି ଷ୍ଟୋରୀ ପାଇଁ ରିଅଲ ଟାଇମ ଏନଗେଡମେଣ୍ଟର ସୁବିଧା ମଧ୍ୟ ଯୋଗାଉଛି । ଯାହାଦ୍ବାରା ବିଶ୍ବରେ ସମାନ ଅସୁବିଧା ଦେଇ ଗତି କରୁଥିବା ଲୋକେ ପରସ୍ପରକୁ ସାହାଯ୍ୟ କରୁଥିବା ଦେଖିବାକୁ ମିଳୁଛି । ସେହିପରେ ଫେସବୁକରେ ଫେସବୁକ ମେସେଞ୍ଜର, ଫେସବୁକ ଲାଇଭ, ଫେସବୁକ ଗ୍ରୁପ ଓ କମ୍ୟୁନିଟି ଦ୍ବାରା ପ୍ରଭାବିତ ଲୋକେ ସାହାଯ୍ୟ ପାଇପାରିବେ । ଅନ୍ୟପଟେ ଗୁଗୁଲ ବିଭିନ୍ନ ଗ୍ରୁପକୁ ସପୋର୍ଟ କରିବା ସହ ବିଭିନ୍ନ ନନ-ପ୍ରଫିଟ ଗ୍ରୁପକୁ ଏକାଠି କରି ଅନଲାଇନରେ ଏକ ସପୋର୍ଟ ଗ୍ରୁପ ପ୍ରସ୍ତୁତ କରିଛି ।
ଏହି ସପୋର୍ଟ ଗ୍ରୁପରେ ଅନଲାଇନ ମିଟିଂ ଦ୍ବାରା ଲୋକେ ସମାଧାନ ପାଇପାରିବେ । ତେଣୁ ଟେକ୍ନୋଲୋଜିର ବ୍ୟବହାରରେ ବର୍ତ୍ତମାନ ସମୟରେ ଯୁବପୀଢିଙ୍କୁ ଏହି ବଦଭ୍ୟାସରୁ ବାହାରିବା ପାଇଁ ଆରମ୍ଭ କରିଛି କସରତ ।
