ନୂଆଦିଲ୍ଲୀ: ସରିଛି ସପ୍ତମ ତଥା ଅନ୍ତିମ ପର୍ଯ୍ୟାୟ ନିର୍ବାଚନ। ଏଥି ସହିତ ଶେଷ ହୋଇଛି 2019 ଲୋକସଭା ନିର୍ବାଚନ । ତେବେ ରବିବାର ସନ୍ଧ୍ୟାରେ ପ୍ରକାଶ ପାଇଥିବା ବିଭିନ୍ନ ଗଣମାଧ୍ୟମ ସର୍ଭେ ସଂସ୍ଥାର ଏକଜିଟ ପୋଲ ଆକଳନ ହଜାଇଛି ବିରୋଧୀଙ୍କ ନିଦ ।
ପୁଣିଥରେ ଦେଶରେ ମୋଦୀ ମ୍ୟାଜିକ୍ କାମ କରିବା ସହ ବିଜେପି ସଂଖ୍ୟା ଗରିଷ୍ଠତା ହାସଲ କରି ସରକାର ଗଢିବ ବୋଲି ପୂର୍ବାନୁମାନ କରିଛି ସମସ୍ତ ସଂସ୍ଥାର ଏକଜିଟ୍ ପୋଲ ରିପୋର୍ଟ । ହେଲେ ବିରୋଧିଙ୍କ ଅଧିକ ଭୟ ବଢାଇଛି ପ୍ରମୁଖ ଗଣମାଧ୍ୟମ ସଂସ୍ଥା CNN-NEWS18ର ନିର୍ବାଚନୀ ଆକଳନ ।
ସର୍ଭେ ସଂସ୍ଥାର ରିପୋର୍ଟ ମୁତାବକ 2019 ଲୋକସଭା ନିର୍ବାଚନରେ ବିଜେପି ନେତୃତ୍ବାଧିନ ଏନଡିଏ ସରକାରକୁ ମିଳିବାକୁ ଯାଉଛି 336 ଆସନ । ଯଦି ଉକ୍ତ ସଂସ୍ଥାର ଆକଳନ ସତରେ ପରିଣତ ହୁଏ, ତେବେ ମୋଦି ସରକାରର ଏପରି ବିପୁଳ ବିଜୟ ଦେଶର ରାଜନୀତିରେ ସୃଷ୍ଟି କରିବ ନୂଆ ଅଧ୍ୟାୟ । ଯାହା ପୂର୍ବରୁ କେବେ ଦେଶ ଦେଖିନାହିଁ ।
କଂଗ୍ରସ ନେତୃତ୍ବାଧିନ ୟୁପିଏକୁ ବୁଥ୍ ବାହୁଡା ମତ ଅନୁଯାୟୀ ମିଳୁଛି 82 ଲୋକସଭା ଆସନ ଓ ଅନ୍ୟାନ ଦଳକୁ ମିଳୁଛି 124 ଆସନ । ଫଳରେ ଏହି ସଂଖ୍ୟାରେ ସରକାର ଗଢିବା କୌଣସି ଦଳ କିମ୍ବା ମେଣ୍ଟ ପାଇଁ ସମ୍ଭବ ନୁହେଁ । କିନ୍ତୁ କୌଣସି ଗଣମାଧ୍ୟମର ନିର୍ବାଚନୀ ଆକଳନକୁ କଂଗ୍ରସ ଗ୍ରହଣ କରିବାକୁ ପ୍ରସ୍ତୁତ ନୁହେଁ । ସେପଟେ ଦେଶରେ ପ୍ରଥମଥର ପାଇଁ ବିଜେପି ନେତୃତ୍ବାଧିନ ଏନଡିଏ ସରକାର ଦ୍ବୀତିୟ ଥର ପାଇଁ ପୂର୍ଣ୍ଣ ବହୁମତ ସହ ସରକାର ଗଠନ କରିବାକୁ ଯାଉଛି ବୋଲି ପ୍ରକାଶ ପାଇଛି ।
