ନୂଆଦିଲ୍ଲୀ: ରାଫେଲ ଚୁକ୍ତିକୁ ନେଇ ସୁପ୍ରିମକୋର୍ଟର ନୂଆ ଆଦେଶ ପରେ ବେଶ ସରଗମର ହୋଇ ଉଠିଛି ଜାତୀୟ ରାଜନୀତି । କୋର୍ଟ ପୁନଃର୍ବିଚାର ଯାଚିକା ଉପରେ ଶୁଣାଣି କରିବାକୁ ସହମତି ବ୍ୟକ୍ତ କରିଛନ୍ତି । ଏହାସହ କୌଣସି ଆଇନ ଗଣମାଧ୍ୟମକୁ ଗୋପନୀୟ ନଥିପତ୍ର ପ୍ରକାଶିତ କରିବାକୁ ଅଟକାଇ ପାରିବ ନାହିଁ ବୋଲି କୋର୍ଟ ନିଜ ବକ୍ତବ୍ୟରେ କହିଛନ୍ତି ।
ମୁଖ୍ୟ ବିଚାରପତି ଜଷ୍ଟିସ ରଞ୍ଜନ ଗୋଗୋଇ ଓ ବିଚାରପତି ସଞ୍ଜୟ କେ କୌଲ ରାଫେଲ ଉପରେ ଶୁଣାଣି ବେଳେ ଗଣମାଧ୍ୟମର ସ୍ବତନ୍ତ୍ରତା ଉପରେ ଗୁରୁତ୍ବାରୋପ କରିଛନ୍ତି । ସର୍ବୋଚ୍ଚ କୋର୍ଟ କହିଛନ୍ତି ଯେ ନା ଭାରତୀୟ ସଂସଦ ଦ୍ବାରା ପ୍ରସ୍ତୁତ କୌଣସି ଆଇନ ଓ ନା ଇଂରେଜ ଦ୍ବାରା ପ୍ରସ୍ତୁତ 'ଅଫିସିଆଲ ସିକ୍ରେଟ ଆକ୍ଟ' ମିଡିଆକୁ କୌଣସି ନଥିପତ୍ର ପ୍ରକାଶିତ କରିବାକୁ ଅଟକାଇ ପାରିବେ । ଏହାସହ ଏହି ନଥିପତ୍ରକୁ କୋର୍ଟ ଗୋପନୀୟ ବୋଲି ସ୍ବୀକାର କରିବେ ନାହିଁ ।
କେନ୍ଦ୍ର ସରକାର ରାଷ୍ଟ୍ରୀୟ ସୁରକ୍ଷା କଥା କହି ସୂଚନା ଅଧିକାର(ଆରଟିଆଇ) ଅନ୍ତର୍ଗତ ମିଳୁଥିବା ତଥ୍ୟ ଦେବାକୁ ମନା ମଧ୍ୟ କରି ପାରିବେ ନାହିଁ ବୋଲି କୋର୍ଟ ନିଜ ରାୟରେ କହିଛନ୍ତି । ସୂଚନା ମାଗୁଥିବା ବ୍ୟକ୍ତି ନିଜ ତର୍କ ମାଧ୍ୟମରେ ପ୍ରମାଣିତ କରିବାକୁ ପଡିବ ଯେ ଏପରି ସୂଚନା ଲୁଚାଇବା, ସୂଚନା ନ ଦେବା ଠାରୁ ଅଧିକ କ୍ଷତିକାରକ ସାବ୍ୟସ୍ତ ହୋଇପାରେ ବୋଲି କୋର୍ଟ କହିଛନ୍ତି ।
