ନୂଆଦିଲ୍ଲୀ: ଦେଶରେ କୋରୋନା ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଉଛି। ଏହି ସମୟରେ କେନ୍ଦ୍ର ସରକାର ଲଗାତାର କୋରୋନା ବିରୋଧି ଲଢେଇ ଜାରି ରଖିଛନ୍ତି। ପ୍ରଧାନମନ୍ତ୍ରୀ ମୋଦି ପୁଣି ଥରେ କୋରୋନା ଭାଇରସ ମହାମାରୀ ବିରୋଧରେ ଲଢେଇ ପ୍ରସଙ୍ଗରେ ଭିଡିଓ କନଫରେନ୍ସିଂ ମାଧ୍ୟମରେ ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି। ଏହି ବୈଠକରେ ଅନେକ ରାଜ୍ୟର ମୁଖ୍ୟମନ୍ତ୍ରୀ ଲକଡାଉନ୍ ବୃଦ୍ଧି କରିବାକୁ ପ୍ରଧାନମନ୍ତ୍ରୀ ମୋଦିଙ୍କୁ ଦାବି କରିଛନ୍ତି। ଏହି ରାଜ୍ୟ ଗୁଡିକରେ ତେଲେଙ୍ଗାନା, ବିହାର, ଆସାମ, ରାଜସ୍ଥାନ, ମଧ୍ୟପ୍ରଦେଶ, ପଞ୍ଜାବ, ମଧ୍ୟପ୍ରଦେଶ ଓ ପଶ୍ଚିମବଙ୍ଗ ଅନ୍ତର୍ଭୁକ୍ତ ।
ମୋଦିଙ୍କ ସହ ଏହି ବୈଠକରେ ପଞ୍ଜାବର ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଲକଡାଉନ୍ ବୃଦ୍ଧିକୁ ସମର୍ଥନ କରିଛନ୍ତି। ସେ କହିଛନ୍ତି ଯେ ଲୋକଙ୍କ ଜୀବନ ବଞ୍ଚାଇବା ଆବଶ୍ୟକ । 3 ମାସ ପାଇଁ ଆର୍ଥିକ ସହାୟତା ଦିଆଯିବା ଆବଶ୍ୟକ। କ୍ୟାପଟେନ ଅମରିନ୍ଦର ମଧ୍ୟ ଲକଡାଉନ୍ ସମୟରେ ଲୋକଙ୍କ ଜୀବିକା ତଥା ଜୀବନକୁ ସୁରକ୍ଷିତ ରଖିବା ପାଇଁ ଉପଯୁକ୍ତ ରଣନୀତି ପ୍ରସ୍ତୁତ କରିବାକୁ କେନ୍ଦ୍ର ସରକାରଙ୍କୁ ଦାବି କରିଛନ୍ତି।
କ୍ୟାପଟେନ ଅମରିନ୍ଦର ସିଂ ପ୍ରଧାନମନ୍ତ୍ରୀଙ୍କୁ କହିଛନ୍ତି ଯେ ରାଜ୍ୟ ମଧ୍ୟରେ ଗ୍ରୀନ, ଅରେଞ୍ଜ ଓ ରେଡ୍ ଜୋନ୍ ସ୍ଥିର କରିବାର ରାଜ୍ୟ ସରକାରଙ୍କର ଅଧିକାର ରହିବା ଉଚିତ। ଏହା ବ୍ୟତୀତ ସେ ରାଜ୍ୟଗୁଡିକ ପାଇଁ ଏକ ସ୍ବତନ୍ତ୍ର ଅର୍ଥନୈତିକ ପ୍ୟାକେଜ୍ ଓ ଆର୍ଥିକ ସହାୟତା ମଧ୍ୟ ଦାବି କରିଛନ୍ତି । ଅନ୍ୟପକ୍ଷେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ମୋଦିଙ୍କୁ କହିଛନ୍ତି ଯେ ବିହାର ସରକାର ଲକଡାଉନ୍ ବଢେଇବା ସପକ୍ଷରେ ଅଛନ୍ତି। ସେ କହିଛନ୍ତି ଯେ ବିହାର ସରକାର ଅନୁସାରେ ଲକଡାଉନ୍ ଖୋଲିବା ପରେ ରାଜ୍ୟରେ କୋରୋନା ସଙ୍କଟ ଅଧିକ ବଢିପାରେ ।
ଏହାସହ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ମଧ୍ୟ ଲକଡାଉନକୁ ସମର୍ଥନ କରିଛନ୍ତି। ସେ କହିଛନ୍ତି ଯେ ଲକଡାଉନ୍ ବିନା ଆଗକୁ ବଢିବା ସମ୍ଭବ ନୁହେଁ । ସେ କହିଛନ୍ତି ଯେ, ମେ ମାସରେ କୋରୋନା ମାମଲା ବଢିପାରେ। ସେ କହିଛନ୍ତି ଯେ ଲକଡାଉନ୍ ଉପରେ କୌଣସି ନିଷ୍ପତ୍ତି ଅତି ଯତ୍ନର ସହ ନିଆଯାଉ । ଗ୍ରୀନ୍ ଜୋନରେ ଥିବା ଶିଳ୍ପଗୁଡିକୁ ଅନୁମୋଦନ କରାଯିବା ଉଚିତ ବୋଲି ଉଦ୍ଧବ ଠାକରେ କହିଛନ୍ତି। ଏହା ସହିତ ଅତ୍ୟାବଶ୍ୟକ ସେବା ପାଇଁ ଲୋକାଲ୍ ଟ୍ରେନ୍ ଚଲାଇବା ଉଚିତ୍ ।
ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଲକଡାଉନକୁ ସମର୍ଥନ କରି ଯାତ୍ରୀବାହୀ ଟ୍ରେନ ଚାଲିବା ଦ୍ବାରା ସଂକ୍ରମଣ ବଢିପାରେ ବୋଲି କହିଛନ୍ତି । ରେଳ ସେବା ଆରମ୍ଭ ନକରିବାକୁ ତେଲେଙ୍ଗାନା ମୁଖ୍ୟମନ୍ତ୍ରୀ ମୋଦିଙ୍କୁ ଅନୁରୋଧ କରିଛନ୍ତି। ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ରେଡ୍ ଯୋନ୍ ଓ କଣ୍ଟେନମେଣ୍ଟ ଅଞ୍ଚଳରେ ଲକଡାଉନ୍ ଜାରି ରଖିବା ସହ ଗ୍ରୀନ ଜୋନରେ ସାମାଜିକ ଦୂରତା ରଖି କାର୍ଯ୍ୟ ଆରମ୍ଭ କରିବାକୁ କହିଛନ୍ତି । ସକାଳ 7ରୁ ସନ୍ଧ୍ୟା 7 ଯାଏଁ କାମ ହେବା ଆବଶ୍ୟକ । ଏହାସହ ଉତ୍ସବ, ଧାର୍ମିକ ଓ ସାମାଜିକ କାର୍ଯ୍ୟକ୍ରମ ଉପରେ ପ୍ରତିବନ୍ଧକ ଲାଗିବା ଜରୁରୀ ।
ଚତୁର୍ଥ ପର୍ଯ୍ୟାୟ ତାଲା ପକାଇବା ବିଷୟରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ କହିଛନ୍ତି ଯେ କେନ୍ଦ୍ର ସରକାର ଯାହା ନିଷ୍ପତ୍ତି ନେବେ ରାଜ୍ୟ ସରକାର ତାଙ୍କ ସହ ଅଛନ୍ତି। ଗ୍ରୀନ୍ ଜୋନରେ କାର୍ଯ୍ୟକଳାପକୁ ସ୍ବଭାବିକ କରିବା ସପକ୍ଷରେ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ କହିଥିଲେ । ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବାଘେଲ କହିଛନ୍ତି ଯେ ରାଜ୍ୟ ଭିତରେ ଆର୍ଥିକ କାର୍ଯ୍ୟକଳାପ ସ୍ଥିର କରିବାର ଅଧିକାର ରାଜ୍ୟ ସରକାର ପାଇବା ଉଚିତ। ସେ କହିଛନ୍ତି ଯେ କୋରୋନା ସଂକ୍ରମଣ ସମ୍ପର୍କରେ ରେଡ ଜୋନ୍, ଗ୍ରୀନ ଜୋନ୍ ଓ ଅରେଞ୍ଜ ଜୋନ୍ ନିର୍ଣ୍ଣୟ କରିବାର ଦାୟିତ୍ବ ରାଜ୍ୟ ସରକାରଙ୍କୁ ଦିଆଯିବା ଉଚିତ୍। ନିୟମିତ ଟ୍ରେନ୍ ଓ ବିମାନ ସେବା, ଆନ୍ତଃ ରାଜ୍ୟ ବସ ପରିବହନ ରାଜ୍ୟ ସରକାରଙ୍କ ପରାମର୍ଶରେ ଆରମ୍ଭ ହେବା ଉଚିତ୍। ସେ କହିଛନ୍ତି ଯେ MNREGA ରେ 200 ଦିନ ମଜୁରୀ ଦିଆଯିବା ଉଚିତ୍ | ଏହା ବ୍ୟତୀତ ରିଲିଫ୍ ଓ କଲ୍ୟାଣକାରୀ ଯୋଜନାଗୁଡିକର କାର୍ଯ୍ୟ ପାଇଁ 30 ହଜାର କୋଟି ଆର୍ଥିକ ସହାୟତା ପ୍ରଦାନ କରାଯିବା ଉଚିତ୍ ।
ତାମିଲନାଡୁର ମୁଖ୍ୟମନ୍ତ୍ରୀ ପଲାନିସ୍ବାମୀ ରାଜ୍ୟରେ ବଢୁଥିବା କୋରୋନା ରୋଗୀଙ୍କ ସଂଖ୍ୟା ଦର୍ଶାଇ କହିଛନ୍ତି ଯେ ଆସନ୍ତା 31 ତାରିଖ ପର୍ଯ୍ୟନ୍ତ ନିୟମିତ ଟ୍ରେନ୍ ଓ ବିମାନ ସେବା ଆରମ୍ଭ ହେବା ଉଚିତ ନୁହେଁ। ସେ କହିଛନ୍ତି ଯେ ଯଦି ଏହା ହୁଏ ତେବେ କୋରୋନା ସଂକ୍ରମଣ ଆହୁରି ବିସ୍ତାର ହୋଇପାରେ। ଏହା ବ୍ୟତୀତ ଖୁବ ଶୀଘ୍ର ରାଜ୍ୟର ଜିଏସଟିକୁ ହଟାଇବାକୁ ସେ କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି।
ଦେଶର ଅର୍ଥନୀତି ଓ ଜିଡିପିରେ ହରିୟାଣା ସମ୍ପୂର୍ଣ୍ଣ ଅବଦାନ ଦେବ ବୋଲି ହରିୟାଣା ମୁଖ୍ୟମନ୍ତ୍ରୀ ମନହୋରଲାଲ ଖଟ୍ଟର କହିଛନ୍ତି। ଗହମର ଭଲ ଅମଳ ହୋଇଛି । କୃଷକମାନଙ୍କୁ ଫସଲ ବୀମା ଦେବାକୁ ସରକାର ଅନୁମତି ଦିଅନ୍ତୁ। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କହିଛନ୍ତି ଯେ କଣ୍ଟେନମେଣ୍ଟ ଜୋନ୍ ବ୍ୟତୀତ ସମଗ୍ର ଦିଲ୍ଲୀରେ ଅର୍ଥନୈତିକ କାର୍ଯ୍ୟକଳାପ ଆରମ୍ଭ ହେବା ଉଚିତ୍। ଆସାମ ସରକାର ଏହି ବନ୍ଦକୁ 2 ସପ୍ତାହ ବୃଦ୍ଧି କରିବାକୁ ପ୍ରସ୍ତାବ ଦେଇଛନ୍ତି। କେରଳ ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟଗୁଡିକ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି ତେଣୁ ସେମାନଙ୍କୁ ଲକଡାଉନ୍ ସହ ଜଡିତ ନିର୍ଦ୍ଦେଶାବଳୀରେ ଉପଯୁକ୍ତ ପରିବର୍ତ୍ତନ ଆଣିବା ପାଇଁ ସ୍ବାଧୀନତା ଦିଆଯିବା ଉଚିତ୍।
ପ୍ରଧାନମନ୍ତ୍ରୀ ମୋଦିଙ୍କ ସହ ଏହି ବୈଠକରେ ପଶ୍ଚିବବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମୋଦି ସରକାରଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି କରୋନା ସଙ୍କଟ ସମୟରେ ରାଜନୀତି ଭଲ ନୁହେଁ । ଗୋଟିଏ ପଟେ ଯେଉଁଠାରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ରାଜ୍ୟଗୁଡିକର ପରାମର୍ଶ ଆଧାରରେ ନିର୍ଦ୍ଦେଶାବଳୀ ସ୍ଥିର କରାଯିବ ଅନ୍ୟପଟେ ମମତା ବାନାର୍ଜୀ କେନ୍ଦ୍ର ସରକାରଙ୍କ ଉପରେ ଭେଦଭାବ କରୁଥିବା ଅରୋଗ ଲଗାଇଛନ୍ତି ।
