ହାଇଦ୍ରାବାଦ: ଦିନକୁ ଦିନ ବଢୁଛି ସଡକ ଦୁର୍ଘଟଣା । ତେବେ ଆଜି ରାଜ୍ୟ ସମେତ ମହାରାଷ୍ଟ୍ର ଏବଂ ଉତ୍ତରପ୍ରଦେଶରେ ସଡକ ଦୁର୍ଘଟଣା ଘଟି ମୋଟ 34 ଜଣଙ୍କ ଜୀବନ ଯାଇଛି । ଆଉ ସେମାନଙ୍କ ପାଇଁ ଅଶୁଭ ସାଜିଛି ସୋମବାର ।
ଉତ୍ତର ପ୍ରଦେଶ
ଉତ୍ତର ପ୍ରଦେଶ ଯମୁନା ଏକ୍ସପ୍ରେସ ୱରେ ପୋଲ ତଳକୁ ଯାତ୍ରୀବାହୀ ବସ ଖସି 29 ଜଣଙ୍କ ମୃତ୍ୟୁ ଘଟିଛି । ଲକ୍ଷ୍ନୌରୁ ଗାଜିଆବାଦ ଯାଉଥିବା ସମୟରେ ଭାରସାମ୍ୟ ହରାଇ ତଳକୁ ଖସିପଡିଥିଲା ବସ । ବସରେ 60ରୁ ଊର୍ଦ୍ଧ୍ବ ଯାତ୍ରୀ ଥିବା ଜଣାପଡିଛି । ଦୁର୍ଘଟଣା ପରେ ଉତ୍ତର ପ୍ରଦେଶ ସରକାରଙ୍କ ପକ୍ଷରୁ ମୃତକଙ୍କ ପରିବାରକୁ 5 ଲକ୍ଷ ଟଙ୍କା ଲେଖାଏଁ ସହାୟତା ରାଶି ଦେବା ପାଇଁ ଘୋଷଣା କରାଯାଇଛି ।
ମହାରାଷ୍ଟ୍ର
ମୁମ୍ବାଇ ନାଗପୁରରେ ଟ୍ରକକୁ ବସ ଧକ୍କା ଦେବା ଫଳରେ 4 ଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ 7 ଜଣ ଗୁରୁତର ଆହତ ହୋଇଛନ୍ତି । ଯାତ୍ରୀବାହୀ ବସଟି ନାଗପୁର କୁହି ରୋଡ ଦେଇ ଯାତ୍ରା କରୁଥିଲା । ହଠାତ ନିୟନ୍ତ୍ରଣ ହରାଇ ରାସ୍ତା କଡରେ ଥିବା ଏକ ଟ୍ରକ ଉପରେ ମାଡି ଯିବାରୁ ଦୁର୍ଘଟଣା ଘଟିଥିଲା ।
ଭଦ୍ରକ
ଭଦ୍ରକ ଟିଲୋ କେନାଲ ବନ୍ଧରେ ବାଇକକୁ ଧକ୍କା ଦେଲା ବାଲି ବୋଝେଇ ହାଇୱା । ଫଳରେ ବାଇକ ଆରୋହୀଙ୍କ ମୃତ୍ୟୁ ଘଟିଥିବା ବେଳେ ଜଣେ ଆହତ ହୋଇଛନ୍ତି । ପରିବାର ଓ ସ୍ଥାନୀୟ ଲୋକ କ୍ଷତିପୂରଣ ଦାବିରେ ରାସ୍ତାରୋକ କରିଥିବା ଜଣାପଡିଛି । ଏପଟେ ହାଇୱା ଚାଳକଙ୍କୁ ଅଟକ ରଖିଛି ପୋଲିସ ।
ନୟାଗଡ
ନୟାଗଡ କଣ୍ଟିଲୋ ବିଜିପୁରରୁ ବାହାଘର ସାରି ଫେରୁଥିବାବେଳେ ଗଣିଆ ଥାନା କାଳିକା ପଡା ଠାରେ ସିରିଜ ଦୁର୍ଘଟଣା । ଆଜି ଭୋରୁ ତିନୋଟି କାର ମୁହାଁମୁହିଁ ଧକ୍କା ହୋଇଥିଲା । ଦୁର୍ଘଟଣାରେ 10 ଜଣ ଆହତ ହେବା ସହ 6 ଜଣଙ୍କ ଅବସ୍ଥା ଗୁରୁତର ରହିଛି ।
ମୟୂରଭଞ୍ଜ
ଉଦଳା ଥାନା ଅର୍ନ୍ତଗତ ସୂନାପାଳ ଛକରେ ଭାରସାମ୍ୟ ହରାଇ ଓଲଟିଲା ବ୍ୟାଣ୍ଡପାର୍ଟି ଗାଡି । ବାହାଘର କାମ ସାରି ଘରକୁ ଫେରୁଥୁବା ବେଳେ ଘଟିଛି ଏହି ଦୁର୍ଘଟଣା । ଘଟଣାରେ 7 ଜଣ ଆହତ ହୋଇଥିବା ବେଳେ 2 ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବା ଜଣାପଡିଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
