ନୂଆଦିଲ୍ଲୀ: ଦିଲ୍ଲୀରେ ଆମ ଆଦମୀ ପାର୍ଟି(ଆପ୍)କୁ କ୍ରମାଗତ ଝଟକା ପରେ ଝଟକା ମିଳି ଚାଲିଛି । ବିଗତ ସପ୍ତାହରେ ଆପର ଜଣେ ବିଧାୟକ ବିଜେପିରେ ସାମିଲ ହୋଇଥିଲେ । ବର୍ତ୍ତମାନ ଆଜି(ସୋମବାର) ପୁଣି ଆପ ବିଧାୟକ ଦେବେନ୍ଦ୍ର ସିଂ ଶେରାୱାତ ବିଜେପିରେ ସାମିଲ ହୋଇଛନ୍ତି ।
ବିଗତ ସପ୍ତାହରେ ଆପକୁ ଝଟକା ଦେଇ ଅନୀଲ ବାଜପେୟୀ ବିଜେପିରେ ଯୋଗ ଦେଇଥିଲେ । ଆଜି ଦେବେନ୍ଦ୍ର ସିଂ କେନ୍ଦ୍ରମନ୍ତ୍ରୀ ପିୟୂଷ ଗୋଏଲଙ୍କ ଉପସ୍ଥିତିରେ ବିଜେପିର ହାତ ଧରିଛନ୍ତି । ସେ ଦିଲ୍ଲୀର ବିଜୱାସାନ ବିଧାନସଭା ଆସନରୁ ବିଧାୟକ ଅଛନ୍ତି ।
ଏହି ଅବସରରେ ଶେରାୱାତ କହିଛନ୍ତି ଯେ ଆପର ପ୍ରତିଷ୍ଠାତା ସଦସ୍ୟଙ୍କ ମଧ୍ୟରୁ ମୁଁ ଜଣେ ଥିଲି । ବିଗତ ୩ ବର୍ଷରୁ ମୁଁ ଅପମାନିତ ହେଉଥିଲି । ମୋ ବିଧାନସଭା କ୍ଷେତ୍ରକୁ ଅଣାଦେଖା କରାଯାଉଥିଲା । ଦଳ ବିରୋଧୀ କାର୍ଯ୍ୟକଳାପ ଯୋଗୁଁ ଶେରାୱାତଙ୍କୁ ଆପ ୨୦୧୬ରେ ନିଷ୍କାସିତ କରିଥିଲା ।
