ନୂଆଦିଲ୍ଲୀ: ଭାରତ କେବେ କୌଣସି ରାଷ୍ଟ୍ରକୁ ଅସମ୍ମାନ କରେ ନାହିଁ । ବଳପୂର୍ବକ କିଛି କାର୍ଯ୍ୟ କରେ ନାହିଁ । କିନ୍ତୁ ଶତ୍ରୁଙ୍କୁ ମୁହଁତୋଡ ଜବାବ ଦେବାକୁ ଆମ ସେନା ସର୍ବଦା ତୟାର ବୋଲି କହିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ।
ନୌସେନା ପକ୍ଷରୁ ଆୟୋଜିତ କମାଣ୍ଡର ସମ୍ମିଳନୀରେ ଯୋଗ ଦେବା ଅବସରରେ ରାଜନାଥ ଏପରି କହିଛନ୍ତି । ସାମ୍ବାଦିକଙ୍କ ପାକିସ୍ତାନ ପକ୍ଷରୁ ସମ୍ଭାବ୍ୟ ଆକ୍ରମଣ ଉପରେ ମତ ରଖିଛନ୍ତି ପ୍ରତିରକ୍ଷା ମନ୍ତ୍ରୀ । ସେ କହିଛନ୍ତି ଯେ ଭାରତ କେବେ କୌଣସି ରାଷ୍ଟ୍ର ପ୍ରତି ଅପମାନଜନକ ବ୍ୟବହାର କରିନାହିଁ । କେବେବି ବିଶ୍ବର କୌଣସି ଦେଶ ଉପରେ ଆକ୍ରମଣ କରିନାହିଁ । ଏପରିକି ବଳପୂର୍ବକ କାହାରି ଇଞ୍ଚେ ଜମି ମଧ୍ୟ ଦଖଲ କରିନି ।
କିନ୍ତୁ ଭାରତ ଉପରେ ନଜର ରଖିଥିବା ଶତ୍ରୁ ଦେଶଙ୍କୁ ସାବଧାନ କରିଦେଇଛନ୍ତି ରାଜନାଥ । ସର୍ବଦା ଶାନ୍ତିରେ ବିଶ୍ବାସ ରଖୁଥିବା ଭାରତ ଦରକାର ପଡିଲେ ନିଜ ପ୍ରକୃତ ରୂପ ଦେଖାଇପାରେ । ଶତ୍ରୁ ଦେଶଙ୍କୁ ଉଚିତ ଜବାବ ଦେବାକୁ ଭାରତୀୟ ସେନା ପାଖରେ ରହିଛି ଯଥେଷ୍ଟ କ୍ଷମତା । ମୁହଁତୋଡ ଜବାବ ଲାଗି ସେନା ସବୁବେଳେ ପ୍ରସ୍ତୁତ ରହିଛି ବୋଲି ପ୍ରତିରକ୍ଷା ମନ୍ତ୍ରୀ କହିଛନ୍ତି ।
ଉଲ୍ଲେଖଯୋଗ୍ୟ ଯେ ଗତକାଲି ଭାରତୀୟ ସେନାରେ ଥାର୍ଡ ଜେନେରେସନ ଆଣ୍ଟି ଟ୍ୟାଙ୍କ ମିସାଇଲ ସାମିଲ କରିବାକୁ ପ୍ରତିରକ୍ଷା ମନ୍ତ୍ରଣାଳୟ ଅନୁମତି ଦେଇଛି । ମେକ ଇନ ଇଣ୍ଡିଆରେ 2ଟି ଟ୍ୟାଙ୍କ ନିର୍ମାଣ କରିବେ ପ୍ରାଇଭେଟ କମ୍ପାନୀ । ସମ୍ପୂର୍ଣ୍ଣ ସ୍ବଦେଶୀ କୌଶଳରେ ଏହି ଟ୍ୟାଙ୍କ ନିର୍ମାଣ ହେବ ବୋଲି ପ୍ରତିରକ୍ଷା ମନ୍ତ୍ରଣାଳୟ ସୂଚନା ଦେଇଛି ।
