ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ଆଉ କିଛି ଦିନ ପରେ ଭୋଟ ଦେବେ ଦେଶବାସୀ । ଏହା ପୂର୍ବରୁ ଜୋରଦାର ପ୍ରଚାରରେ ଲାଗି ପଡିଛନ୍ତି ରାଜନେତାମାନେ । ଦେଶ ସାରା ନେତାମାନେ ବୁଲି ବୁଲି ନିଜ ନିଜ ଦଳର କରୁଛନ୍ତି ପ୍ରଚାର । ଏହି କ୍ରମରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଆଜି (ଶୁକ୍ରବାର) ହରିଆନାର ଯମୁନାନଗରରୁ ଦଳର ପ୍ରଚାର ଅଭିଯାନ ଆରମ୍ଭ କରିଛନ୍ତି । ସଭାରେ 'ଚୌକିଦାର ଚୌର ହୈ' ନାରା ସହପିଏମ ମୋଦିଙ୍କୁ ଟାର୍ଗେଟ କରିଛନ୍ତି ରାହୁଲ।
ପ୍ରତି ବ୍ୟକ୍ତିଙ୍କ ଏକାଉଣ୍ଟରେ ୧୫ ଲକ୍ଷ ଦେବାର ମିଥ୍ୟା ପ୍ରତିଶ୍ରୁତି ଦେଇଥିଲେ ମୋଦି । ବିମୁଦ୍ରୀକରଣ ଯୋଗୁଁ ଛୋଟ ଦୋକାନୀମାନେ ଅସୁବିଧାର ସମ୍ମୁଖୀନ ହୋଇଛନ୍ତି ଓ ସାଧାରଣ ଜନତାଙ୍କ କଥା ନ କହିବା ଭଲବୋଲି କଂଗ୍ରେସ ଅଧ୍ୟକ୍ଷ କହିଛନ୍ତି । ସେହିପରି ସେ ମୋଦିଙ୍କୁ ଟାର୍ଗେଟ କରି କହିଛନ୍ତି ଯେ ମୋଦି କହୁଥିଲେ, ମୋତେ ପ୍ରଧାନମନ୍ତ୍ରୀ କରନାହିଁ ବରଂ ଆପଣଙ୍କ ଚୌକିଦାର କରନ୍ତୁ । ବର୍ତ୍ତମାନ ସେ କହୁଛନ୍ତି ଆମେ ସମସ୍ତେ ଚୌକିଦାର । ଦେଶର ସମସ୍ତଚୌକିଦାର ହେଉଛନ୍ତି ସଚ୍ଚୋଟ । ଅନ୍ୟମାନଙ୍କୁ କାହିଁକି ଆପଣ ଚୋର କରିବାକୁ ଲାଗିଛନ୍ତି ବୋଲି ମୋଦିଙ୍କୁ ପ୍ରଶ୍ନ କରିଛନ୍ତି ରାହୁଲ ।
ସେ ସଭାରେ ସର୍ବନିମ୍ନ ଆୟ ଗ୍ୟରେଣ୍ଟି ଯୋଜନା (ନ୍ୟାୟ) ବିଷୟରେ ଉଲ୍ଲେଖ କରି କହିଛନ୍ତି ଯେ କଂଗ୍ରେସ ସରକାରରେ ଆସିଲେ ଗରିବ ପରିବାରଙ୍କୁ (ଯେଉଁମାନଙ୍କ ଆୟ ପ୍ରତିମାସରେ ୧୨ ହଜାରରୁ କମ) ବାର୍ଷିକ ୭୨ ହଜାର ଟଙ୍କା ବ୍ୟାଙ୍କ ଖାତାରେ ସିଧାସଳଖ ପୈଠହେବ। ବିଜେପି ଛୋଟ ଦୋକାନୀ ଓ ଚାଷୀଙ୍କୁ କଷ୍ଟ ଦେଇଛି। ଆମେ ସେମାନଙ୍କ ପାଇଁ ‘ନ୍ୟାୟ’ ଯୋଜନା ଆଣିବୁ ବୋଲି କଂଗ୍ରେସ ଅଧ୍ୟକ୍ଷ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
