ନୂଆଦିଲ୍ଲୀ: ପୁଲୱାମା ଆତଙ୍କବାଦୀ ଆକ୍ରମଣରେ ପରେ ମିଡିଆ ପାଇଁ ନିର୍ଦ୍ଦେଶନାମା ଜାରି କରିଥିଲେ କେନ୍ଦ୍ର ସରକାର । ଏହାପରେ ଶନିବାର ସିଆରପିଏଫ ଓ ସେନା ମଧ୍ୟ ମିଡିଆ ପାଇଁ ନିର୍ଦ୍ଦେଶନାମା ଜାରି କରିଥିଲେ । ଗଣମାଧ୍ୟମରେ କୌଣସି ନୈରାଶଜନକ ଓ ଯନ୍ତ୍ରଣାଦାୟକ ପରିସ୍ଥିତିରେ ଶହୀଦ ପରିବାରଙ୍କ କ୍ରନ୍ଦନ-ଚିତ୍କାର କରିବା ଦୃଶ୍ୟ ନଦେଖା ଯାଉ ବୋଲି ଅନୁରୋଧ କରାଯାଇଥିଲା ।
ସିଆରପିଏଫ ତରଫରୁ ପୁଣି କିଛି ଗାଇଡଲାଇନ ଜାରି କରାଯାଇଛି । ପୁଲୱାମା ଆତଙ୍କୀ ଆକ୍ରମଣରେ ଶହୀଦଙ୍କ ଅଙ୍ଗର ଜାଲ ଛବି ସୋସିଆଲ ମିଡିଆରେ ସେୟାର କରାଯାଉଛି । ଏମାନେ ଏପରି କରି ଘୃଣାକୁ ପ୍ରସାରିତ କରୁଛନ୍ତି । ଦୟାକରି ଏହି ଛବି ଓ ପୋଷ୍ଟ ସର୍କୁଲେଟ, ସେୟାର ଓ ଲାଇକ କରନ୍ତୁ ନାହଁ । ଏପରି କୌଣସି ପୋଷ୍ଟ ସୋସିଆଲ ମିଡିଆରେ ଦେଖା ଗଲେ ଏ ସମ୍ପର୍କରେ webpro@crpf.gov.inରେ ସୂଚନା ଦେବାକୁ ସିଆରପିଏଫ ତରଫରୁ କୁହାଯାଇଛି ।
ଆତଙ୍କବାଦୀମାନେ ଚାହାନ୍ତି ଯେ ଦେଶରେ ଏପରି ପରିସ୍ଥିତି ଉତ୍ପନ୍ନ ହେଉ । ଶହୀଦଙ୍କ ପରିବାରର କ୍ରନ୍ଦନ ଓ ଚିତ୍କାର ଦୃଶ୍ୟ ଦେଖି ଆତଙ୍କବାଦୀଙ୍କ ସାହସ ବଢିଥାଏ । ସେହିପରି ସିଆରପିଏଫ ମଧ୍ୟ ମିଡିଆକୁ ଏପରି ଦୃଶ୍ୟ ନ ଦେଖାଇବା ପାଇଁ ଅନୁରୋଧ କରିଥିଲେ । ଔପଚାରିକ ଭାବେ ପୃଷ୍ଟି ନ ହେବା ଯାଏଁ ଶହୀଦଙ୍କ ନାମ ଘୋଷଣା ନ କରାଯାଉ ବୋଲି ସିଆରପିଏଫ କହିଥିଲା ।
ପୁଲୱାମା ଆତଙ୍କୀ ଆକ୍ରମଣରେ ୪୦ରୁ ଅଧିକ ଯବାନ ଶହୀଦ ହେବା ସହ ଏମାନଙ୍କ ଶରୀର କ୍ଷତବିକ୍ଷତ ହୋଇଥିଲା । ବିଶେଷ କରି ଟିଭି ଚ୍ୟାନେଲରେ ଏହାକୁ ନେଇ ଆକ୍ରମକ ପ୍ରସାରଣ କରାଯାଉ ଥିଲା । ତେଣୁ ସରକାର ଏହା ଉପରେ ପଦକ୍ଷେପ ନେଇ ମିଡିଆ ପାଇଁ ନିର୍ଦ୍ଦେଶନାମା ଜାରି କରିଥିଲେ ।