ଗ୍ୟାଙ୍ଗଟକ: ସିକିମ କ୍ରାନ୍ତିକାରୀ ମୋର୍ଚ୍ଚା(ଏସକେଏମ୍)ର ଅଧ୍ୟକ୍ଷ ପ୍ରେମ ସିଂହ ତୋମାଙ୍ଗ ଓରଫ ପିଏସ ଗୋଲାୟ ସୋମବାର ସିକିମର ନୂଆ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ । ପଲଜୋର ଷ୍ଟାଡିୟମରେ ଆୟୋଜିତ ଶପଥ ଗ୍ରହଣ ସମାରୋହରେ ରାଜ୍ୟପାଳ ଗଙ୍ଗା ପ୍ରସାଦ ତାଙ୍କୁ ପଦ ଏବଂ ଗୋପନୀୟତାର ଶପଥ ପାଠ କରାଇବେ ।
ତେବେ ଗୋଲାୟ ଶନିବାର ନିଜ ନବ ନିର୍ବାଚିତ 17 ବିଧାୟକଙ୍କ ସହ ମିଶି ରାଜ୍ୟପାଳଙ୍କୁ ଭେଟିଥିଲେ ଏବଂ ରାଜ୍ୟରେ ନୂଆ ସରକାର ଗଠନ କରିବାର ଦାବି ଉପସ୍ଥାପନା କରିଥିଲେ । କିନ୍ତୁ ରାଜ୍ୟପାଳ ଗୋଲାୟଙ୍କ ମାମଲାରେ ଆଇନଗତ ରାୟ ଲୋଡିଥିଲେ ଏବଂ ତାଙ୍କ ପ୍ରତିନିଧିମଣ୍ଡଳକୁ ଏଥି ପାଇଁ ସମୟ ମାଗିଥିଲେ । କାରଣ ଗୋଲାୟ 2016ରେ ଏକ ଦୁର୍ନୀତି ମାମଲାରେ ଜେଲ ଯାଇଥିଲେ । ତେବେ ଆଇନଗତ ରାୟ ପରେ ରାଜ୍ୟପାଳ ତାଙ୍କୁ ନୂଆ ସରକାର ଗଠନ କରିବାକୁ ଅନୁମତି ଦେଇଥିଲେ ।
ସୂଚନା ଯୋଗ୍ୟ ଯେ, ଏସକେଏମ୍ର ସ୍ଥାପନା 2013ରେ ହୋଇଥିଲା । 32 ଆସନ ବିଶିଷ୍ଟ ବିଧାନସଭା ନିର୍ବାଚନରେ ତାଙ୍କ ଦଳ 17ଟି ଆସନରେ ବିଜୟ ହୋଇ ପୂର୍ଣ୍ଣ ବହୁମତ ହାସଲ କରିଥିଲା ।
