ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆଜି ଧନ୍ୟବାଦ ଦେବେ ଦିଲ୍ଲୀବାସୀ । ରାଜଧାନୀର ରାମଲୀଳା ମୈଦାନରେ ମୋଦିଙ୍କୁ ଏପରି ଭବ୍ୟ ସମ୍ବର୍ଦ୍ଧନା ଦେବାକୁ ବିରାଟ ସଭା ଆୟୋଜନ କରୁଛି ବିଜେପି । ରାଜଧାନୀରେ ଥିବା 1734 ବେଆଇନ କଲୋନୀକୁ ନିୟମିତ କଲୋନୀରେ ପରିଣତ କରିଥିବାରୁ ଆୟୋଜନ ହେଉଛି ଏହି ବିଶାଳ ଜନସଭା । ସେପଟେ ଆଗକୁ ଦିଲ୍ଲୀ ବିଧାନସଭା ନିର୍ବାଚନା ରହିଥିବାରୁ ଏହା ବିଜେପିର ନିର୍ବାଚନୀ ବିଗୁଲ ଫୁଙ୍କା ବୋଲି କୁହାଯାଉଛି ।
ଦିଲ୍ଲୀରେ ରହିଥିବା ଏହି ବେଆଇନ କଲୋନୀକୁ କେନ୍ଦ୍ର ସରକାର ନିୟମିତ କରିଥିବାରୁ ପାଖାପାଖି 40 ଲକ୍ଷ ଅଧିବାସୀଙ୍କ ମାଲିକାନା ମିଳିବାର ଅଧିକାର ସଫଳ ହୋଇଛି । ଯେଉଥିପାଇଁ ଦିଲ୍ଲୀବାସୀ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେବାକୁ ରାମଲୀଳା ମୈଦାନରେ ଏକଜୁଟ ହେଉଛନ୍ତି । ରବିବାର ଆୟୋଜନ ହେବାକୁ ଥିବା ଏହି ଜନସଭାରେ ପ୍ରାୟ 2ଲକ୍ଷ ଲୋକଙ୍କ ସମାଗମ ହେବ ବୋଲି ସୂଚନା ଦେଇଛି ବିଜେପି ।
ଚଳିତ ମାସ 14 ତାରିଖରେ ଏହି ମୈଦାନରେ କଂଗ୍ରେସ ବିଜେପି ବିରୋଧରେ ଭାରତ ବଞ୍ଚାଓ ରାଲି କରିଥିବା ବେଳେ ଆଜି ବିଜେପି ଏହାକୁ କଡ଼ା ଟକ୍କର ଦେବାକୁ ଯାଉଛି । ସୂଚନା ଅନୁଯାୟୀ ଏହି ଜନସଭା ପାଇଁ ରାଜଧାନୀର ସାତ ସାଂସଦ, 281 ମଣ୍ଡଳ ସଭାପତି, ନିଗମ ପରିଷଦ ସଭାପତି ଆଦି ଲୋକଙ୍କ ଏକତ୍ରିତ ପାଇଁ ଦାୟିତ୍ବ ନେଇଛନ୍ତି ।
ଗୋଟେପଟେ ନାଗରିକତା ସଂଶୋଧନ ଆଇକୁ ନେଇ ଦେଶର ଅନେକ ସ୍ଥାନରେ ତୀବ୍ର ପ୍ରତିବାଦ ସହ ହିଂସାକାଣ୍ଡ ଦେଖିବାକୁ ମିଳିଛି । ବିଜେପି, ନରେନ୍ଦ୍ର ମୋଦି ଓ ଅମିତ ଶାହାଙ୍କ ବିରୋଧରେ ନାରାବାଜି ମଧ୍ୟ ହେଉଛି । କିନ୍ତୁ ଏପଟେ ବିଜେପିର ବିଶାଳ ରାଲି ଆୟୋଜନ । ଏହି ସବୁ ଘଟଣାକୁ ଚପାଇବା ସହ ଦିଲ୍ଲୀ ବିଧାନସଭା ନିର୍ବାଚନ ପାଇଁ ଦଳର ଏହା ପ୍ରାରମ୍ଭିକ ରଣନୀତି ବୋଲି ଚର୍ଚ୍ଚା ହେଉଛି ।
