ନୂଆଦିଲ୍ଲୀ: କୋରୋନା ଭାଇରସ ସମୟରେ ଦେଶର ପଞ୍ଚମ ଥର ପାଇଁ ସମ୍ବୋଧନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 20 ଲକ୍ଷ କୋଟିର ଆର୍ଥିକ ପ୍ୟାକେଜ୍ ଘୋଷଣା କରିଛନ୍ତି । ଏହାକୁ ମୋଦି ଆତ୍ମନିର୍ଭରଶୀଳ ଭାରତ ପ୍ୟାକେଜ ନାଁ ଦେଇଛନ୍ତି । ଅର୍ଥବ୍ୟବସ୍ଥାକୁ ସଠିକ୍ ରାସ୍ତାକୁ ଆଣିବା ପାଇଁ ଏହି ପ୍ୟାକେଜ୍ ଅନେକାଂଶରେ ସହାୟକ ହେବ । ରାଜସ୍ଥାନର ଉପମୁଖ୍ୟମନ୍ତ୍ରୀ ସଚିନ୍ ପାଇଲଟ ମୋଦିଙ୍କ ଏହି ଘୋଷଣାକୁ ପ୍ରଶଂସା କରୁଛନ୍ତି ।
ସଚିନ୍ ପାଇଲଟ୍ କହିଛନ୍ତି ମୋଦି ଯେବେ ବି ଲକଡାଉନର ଘୋଷଣା କରିଛନ୍ତି ସବୁବେଳେ ସମୟସୀମା ବଢେଇଛନ୍ତି । ଏହା ସ୍ପଷ୍ଟ ଯେ ଲକଡାଉନ୍ 4.0 ଆସିବ । କେତେ ଦିନ ପାଇଁ ଚାଲିବ ଓ ଏହାର ନୂଆ ନିୟମ ବିଷୟରେ ପ୍ରଧାନମନ୍ତ୍ରୀ ଏଯାଏଁ କହିନାହାଁନ୍ତି । ରାଜ୍ୟକୁ ଲକଡାଉନ୍ ଗତିବିଧି ନେଇ ସ୍ବତନ୍ତ୍ରତା ଦିଆଯିବା ଉଚିତ୍ ବୋଲି ସେ କହିଛନ୍ତି । ପୁରା ଦେଶରେ ଏକ ପ୍ରକାର ଲକଡାଉନ୍ ନିୟମ ରହିବା ସମ୍ଭବ ନୁହେଁ ।
ସେ କହିଛନ୍ତି ଯେ ରେଡ୍ ଜୋନରେ କୌଣସି ଚଳପ୍ରଚଳକୁ ଅନୁମତି ଦିଆଯିବା ଉଚିତ୍ ନୁହେଁ । ଦେଶରେ 500 ସଂକ୍ରମଣ ଥିବାବେଳେ ଏହି ଲକଡାଉନ୍ ଲାଗୁ ହୋଇଥିଲା। ବର୍ତ୍ତମାନ 70 ହଜାର ସଂକ୍ରମଣ ଓ ଯଦି ଏବେ ଲକଡାଉନ୍ ଖୋଲିବାକୁ ଚିନ୍ତା କରୁଛନ୍ତି, ତେବେ ସଂକ୍ରମଣର ଆଶଙ୍କା ଦୂର ହୋଇନାହିଁ କିନ୍ତୁ ଆମକୁ ସତର୍କତାର ସହିତ ଆଗକୁ ବଢିବାକୁ ପଡିବ ।
ପ୍ରଧାନମନ୍ତ୍ରୀଙ୍କ 20 ଲକ୍ଷ କୋଟି ପ୍ୟାକେଜ୍ ଘୋଷଣାକୁ ନେଇ ସେ କହିଛନ୍ତି ଯେ, କୌଣସି ଆର୍ଥିକ ସହାୟତା ଭଲ ମାତ୍ର ଏହାକୁ କେଉଁଠି ବିନିଯୋଗ କରାଯାଉଛି ତାହା ଦେଖିବା ବାକି ରହିଲା । ସେ କହିଛନ୍ତି ଯେ ଏହି ସମୟରେ ସରକାରଙ୍କର ଗୁରୁତ୍ବପୂର୍ଣ୍ଣ ସଂସ୍କାର ଆଣିବା ପାଇଁ ଇଚ୍ଛା ଶକ୍ତି ରହିବା ଉଚିତ୍। ବଡ ପଦକ୍ଷେପ ନେବା ଜରୁରୀ, ଯେଉଁ ପଦକ୍ଷେପ 1991ରେ ମନମୋହନ ସିଂହ ଓ ନରସିଂହ ରାଓ ନେଇଥିଲେ ବୋଲି ସେ କହିଛନ୍ତି ।
