ନୂଆଦିଲ୍ଲୀ: ଏଣିକି ଆଗକୁ ଆଉ ଗଡିବନି ଡିଜେଲ ଚାଳିତ ଟ୍ରେନ । ଦେଶର ସମସ୍ତ ଟ୍ରେନ ହେବ ବିଦ୍ୟୁତ ଚାଳିତ ଟ୍ରେନ । ବଢୁଥିବା ବାୟୁ ପ୍ରଦୂଷଣକୁ ରୋକିବା ଦିଗରେ ରେଳ ମନ୍ତ୍ରାଳୟ ଏଭଳି ବଡ ନିଷ୍ପତ୍ତି ନେଇଛି । ଏନେଇ ବୁଧବାର ସୂଚନା ଦେଇଛନ୍ତି ରେଳମନ୍ତ୍ରୀ ପିୟୂଷ ଗୋଏଲ ।
ଆଗାମୀ 10 ବର୍ଷ ମଧ୍ୟରେ ଦେଶର ଶତ ପ୍ରତିଶତ ଟ୍ରେନକୁ ବିଦ୍ୟୁତ୍ ଚାଳିତ କରାଯିବା ନେଇ ଲକ୍ଷ୍ୟ ରଖିଛନ୍ତି ସରକାର । ଏଥିପାଇଁ ପ୍ରସ୍ତୁତି ମଧ୍ୟ ଆରମ୍ଭ ହୋଇଯାଇଛି । ସିଆଇଆଇ ପକ୍ଷରୁ ଆୟୋଜିତ ଏକ କାର୍ଯ୍ୟକ୍ରମରେ ରେଳମନ୍ତ୍ରୀ ପିୟୂଷ ଗୋଏଲ ଯୋଗ ଦେଇ ଏହି ନିଷ୍ପତ୍ତି ନେଇଛନ୍ତି । ମନ୍ତ୍ରୀ କହିଛନ୍ତି, ରେଳ ମନ୍ତ୍ରାଳୟ ଶତ ପ୍ରତିଶତ ଟ୍ରେନ ବିଦ୍ୟୁତକରଣ ପାଇଁ ନିର୍ଣ୍ଣୟ ନେଇଛନ୍ତି । ପାଖାପାଖି 1ଲକ୍ଷ 20ହଜାର କିଲୋମିଟର ଟ୍ରାକରେ ବିଦ୍ୟୁତ୍ ଚାଳିତ ଟ୍ରେନ ଗଡିବ । ଶତପ୍ରତିଶତ ବିଦ୍ୟୁତ୍ ଚାଳିତ ଟ୍ରେନ ଚଳାଇ ଆମେ ଦୁନିଆର ପ୍ରଥମ ଦେଶ ହେବୁ । ଯାହା ଫଳରେ ବାୟୁ ପ୍ରଦୂଷଣ ମାତ୍ରା କମିବ ।
ଏହାସହ ମନ୍ତ୍ରୀ ଆହୁରି କହିଛନ୍ତି, ଦିଲ୍ଲୀକୁ ଆସୁଥିବା ଅନେକ ଟ୍ରେନ ଡିଜେଲ ଚାଳିତ ଅଟେ । ତେଣୁ ସେହି ଟ୍ରେନ ଗୁଡିକୁ ବିଦ୍ୟୁତ୍ ଚାଳିତ କରିବା ପାଇଁ ସରକାର କାମ ଆରମ୍ଭ କରିଦେଇଛନ୍ତି । ଏହା ଯଦି ସମ୍ଭବ ହୁଏ ତେବେ 2029 ସୁଦ୍ଧା ସାରା ଦେଶରେ ବିଦ୍ୟୁତ୍ ଚାଳିତ ଟ୍ରେନ ଚାଲିବ । ଏଥିସହ ପରିବେଶରୁ ଅନେକ ପରିମାଣରେ କାର୍ବନ ଡାଇଅକ୍ସସାଇଡ୍ କମିଯିବ ।
