ନୂଆଦିଲ୍ଲୀ: ଚର୍ଚ୍ଚାରେ ରହିବା ପାଇଁ ଅନେକ ସମୟରେ ସିଦ୍ଧୁ ବିବାଦୀୟ ବୟାନ ଦେଇଥାନ୍ତି । ହେଲେ ଚଳିତ ଥର କୌଣସି ବିବାଦୀୟ ବୟାନ ନୁହେଁ ବରଂ ମୁଣ୍ଡରେ ପାକିସ୍ତାନ ପତାକା ପଗଡି ପିନ୍ଧି ଚର୍ଚ୍ଚାର ପରିସରକୁ ଆସିଛନ୍ତି । ଯେଉଁ ଫଟୋ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ସୂଚନା ଅନୁସାରେ, ସିଦ୍ଧୁଙ୍କ ଏହି ଫଟୋକୁ ପାକିସ୍ତାନ ଶିଖ ଗୁରୁଦ୍ବାର ପ୍ରବନ୍ଧକ କମିଟିର ମହାସଚିବ ଗୋପାଲ ସିଂ ଚାୱଲା ସୋସିଆଲ ମିଡିଆରେ ସେୟାର କରିଛନ୍ତି । ଆଉ ସେଥିରେ କ୍ୟାପସନ ରହିଛି" ଦିସ ସୁଡ ବି ସେଣ୍ଟ ଟୁ ଇଣ୍ଡିଆ" । ଯାହା ବର୍ତ୍ତମାନ ସମସ୍ତ ଜାତୀୟ ଓ ଅନ୍ତର୍ଜାତୀୟ ଗଣମାଧ୍ୟମର ଚର୍ଚ୍ଚାର ଶିରୋନାମା ପାଲଟିଛି । କିନ୍ତୁ ଯାଞ୍ଚ ପରେ ଶୁଣିବାକୁ ମିଳୁଛି ଏହି ଫଟୋଟିକୁ ଫଟୋସପରେ ଏଡିଟିଙ୍ଗ କରି ସେୟାର କରାଯାଇଛି ।
ଖବର ଅନୁଯାୟୀ, ପାକିସ୍ତାନର ପ୍ରଧାନମନ୍ତ୍ରୀ ଇମରାନ ଖାନଙ୍କ ଶପଥଗ୍ରହଣ ବେଳେ ସିଦ୍ଧୁ ପାକିସ୍ତାନ ଗସ୍ତରେ ଯାଇଥିଲେ । ସେଠାରେ ସେ ଗୋପାଲ ସିଂ ଚାୱଲାଙ୍କୁ ମଧ୍ୟ ଆଲିଙ୍ଗନ କରିଥିବା ବେଳେ ଏବେ ସେ ଗୋପାଲ ସିଂଙ୍କୁ ଚିହ୍ନିନଥିବା ପ୍ରକାଶ କରିଛନ୍ତି ।
