ନୂଆଦିଲ୍ଲୀ: କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ୟୁପିର ହାଥରସରେ ହୋଇଥିବା ଗଣଦୁଷ୍କର୍ମକୁ ନେଇ ଆକ୍ରମଣାତ୍ମକ ମନ୍ତବ୍ୟ ଦେଇ ଚାଲିଥିଲେ । ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ପୀଡିତାଙ୍କ ପରିବାର ସଦସ୍ୟଙ୍କୁ ଭେଟିବା ପାଇଁ ହାଥରସ ଯାଇଥିଲେ। ବର୍ତ୍ତମାନ ବିହାରର ଜଣେ ଦଳିତଙ୍କୁ ପଞ୍ଜାବରେ ଦୁଷ୍କର୍ମ କରାଯାଇଥିବା ଘଟଣା ସାମ୍ନାକୁ ଆସିଛି । ଏହାକୁ ନେଇ ଭାରତୀୟ ଜନତା ପାର୍ଟି ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛି ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି । ସେ ରାହୁଲଙ୍କୁ ଥଟ୍ଟା କରି କହିଛନ୍ତି , ‘କୌଣସି ଟ୍ବିଟ୍ ନାହିଁ, ବିରକ୍ତି ପ୍ରକାଶ ନାହିଁ ଏବଂ ପିକନିକ୍ ନାହିଁ ’। ଅର୍ଥମନ୍ତ୍ରୀ କହିଛନ୍ତି ଯେ ଉତ୍ତର ଦେବାକୁ କଂଗ୍ରେସ ସାମ୍ନାକୁ ଆସିବା ଉଚିତ୍। ବିହାରରେ କଂଗ୍ରେସ ସହ ମିଳିତ ଭାବେ ନିର୍ବାଚନରେ ପ୍ରତିଦ୍ବନ୍ଦ୍ବିତା କରୁଥିବା ଆରଜେଡିର ନେତା ତେଜସ୍ବୀ ଯାଦବଙ୍କୁ ମଧ୍ୟ ଅର୍ଥମନ୍ତ୍ରୀ ଟାର୍ଗେଟ କରିଛନ୍ତି ।
ସେ ତେଜସ୍ବୀଙ୍କୁ ପ୍ରଶ୍ନ କରିଛନ୍ତି ଯେ ଆପଣ ବିହାରରୁ ପଞ୍ଜାବକୁ ଯାଇଥିବା ପରିବାର ପ୍ରତି ଉତ୍ତରଦାୟୀ ନୁହଁନ୍ତି କି ? କେନ୍ଦ୍ର ଅର୍ଥମନ୍ତ୍ରୀ ଏହା ମଧ୍ୟ କହିଛନ୍ତି ଯେ ପଞ୍ଜାବରେ ଏହି ପରିବାରକୁ ନ୍ୟାୟ ଦେବାକୁ ବିଜେପି ଛିଡା ହୋଇଛି। ପ୍ରକାଶ ଜାଭେଡକର ମଧ୍ୟ ତେଜସ୍ବୀଙ୍କୁ ଟାର୍ଗେଟ କରିଥିଲେ ।
ସୂଚନାଯୋଗ୍ୟ, ପଞ୍ଜାବର ହୋସିୟାରପୁର ଜିଲ୍ଲାର ଟାଣ୍ଡାରେ ବିହାରର ଜଣେ ଦଳିତ ଝିଅକୁ ଦୁଷ୍କର୍ମ କରାଯାଇଥିଲା । ଟାଣ୍ଡାରେ ଦୁଷ୍କର୍ମ ପରେ 6 ବର୍ଷର ବାଳିକାକୁ ପୋଡି ଦେବା ଘଟଣା ସାମ୍ନାକୁ ଆସିଛି। ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
