ନୂଆଦିଲ୍ଲୀ: ଜଣେ ବାପା ନିଜ ପୁଅକୁ ନେଇ ସବୁବେଳେ ଗର୍ବ କରେ । ପୁଅ ଉପରେ ବାପାର ଅଭିମାନ ସ୍ବଭାବିକ । ବାସ୍ତବରେ ପୁଅ ଯଦି ନିଜ କର୍ମକ୍ଷେତ୍ରରେ ଆଗକୁ ଯାଇ ପ୍ରତିଷ୍ଠା ଲାଭ କରେ ସେତେବେଳେ ବାପା ହିସାବରେ ଗର୍ବରେ ଫୁଲିଉଠେ ଛାତି । ହେଲେ ସେଇ ପୁଅ ଯେବେ ବିପଥଗାମୀ ହୋଇ ଆତଙ୍କର ରାସ୍ତା ବାଛିନିଏ, ସେତେବେଳେ ବାପ ଉପରେ ପଡିଥାଏ ବଜ୍ରଚଡକ । ଭାଙ୍ଗିଯାଏ ବର୍ଷ ବର୍ଷର ସ୍ବପ୍ନ । ଦିଲ୍ଲୀରେ ଗିରଫ ହୋଇଥିବା ସନ୍ଦିଗ୍ଧ ଆଇଏସଆଇଏସ ଆତଙ୍କବାଦୀ ଅବୁ ୟୁସୁଫଙ୍କ ବାପା କାଫିଲ ଅହମ୍ମଦ କହିଛନ୍ତି ଯେ ମୋ ପୁଅ ଏଭଳି କାର୍ଯ୍ୟରେ ଲିପ୍ତ ଥିବାରୁ ମୁଁ ମର୍ମାହତ। ପୁଅ ଯାହା କରିଛି ସମ୍ପୂର୍ଣ୍ଣ ଭୁଲ ଓ ଯଦି ମୁଁ ଆଗରୁ ଏ ବିଷୟରେ ଅବଗତ ଥାନ୍ତି, ତାହାଲେ ତାକୁ ଘରୁ ବାହାର କରିଦେଇଥାନ୍ତି ବୋଲି କହିଛନ୍ତି ୟୁସୁଫଙ୍କ ବାପା ।
ଶନିବାର ଦିଲ୍ଲୀର ଧୌଲାକୁଆଁରୁ ବୁ ୟୁସୁଫଙ୍କୁ ଗିରଫ କରାଯାଇଥିଲା। ଗିରଫ ପୂର୍ବରୁ ଦିଲ୍ଲୀ ପୋଲିସ ଏବଂ ଆତଙ୍କବାଦୀଙ୍କ ମଧ୍ୟରେ ସାମାନ୍ୟ ସଂଘର୍ଷ ମଧ୍ୟ ହୋଇଛି । ଘଟଣାସ୍ଥଳରୁ ବିସ୍ଫୋରକ ଜବତ ହୋଇଥିଲା ।
ଆବୁ ୟୁସୁଫଙ୍କ ବିଷୟରେ ତାଙ୍କ ପତ୍ନୀ କହିଛନ୍ତି ଯେ ସ୍ବାମୀ ଘରେ ବନ୍ଧୁକ ସମେତ ଅନେକ ଅସ୍ତ୍ର ରଖିଛନ୍ତି। ଏପରି କାର୍ଯ୍ୟ କରିବା ଉଚିତ ନୁହେଁ ବୋଲି ଆଗରୁ ଅନେକଥର କହିଥିଲି । ହେଲେ ସେ ମୋତେ ଏଥିରେ ହସ୍ତକ୍ଷେପ ନକରିବାକୁ କହିଥିଲେ। ହେଲେ ତାଙ୍କୁ କ୍ଷମା କରିଦେବାକୁ ପତ୍ନୀ ଅନୁରୋଧ କରିଥିବା ବେଳେ ଚାରି ଚାରିଟା ପିଲାଙ୍କୁ ଧରି କୁଆଡେ ଯିବେ ବୋଲି ପ୍ରଶ୍ନ କରିଛନ୍ତି ।
