ପାଟନା: ମୁଣ୍ଡ ଗଡାଉଛି ଚମକି ଜ୍ବର । ଏହା ବର୍ତ୍ତମାନ ମହାମାରୀ ରୂପ ନେବା ସହ ବିହାରର ମୁଜାଫରପୁରର ଏହି ମୃତ୍ୟୁ ସଂଖ୍ୟା 90ରେ ପହଞ୍ଚିଛି । ତେବେ ଏହି ଘଟଣା ପରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ମୁଜାଫରପୁରରେ ପହଞ୍ଚି ଘଟଣାର ତଦାରଖ କରିଛନ୍ତି । ଅନ୍ୟପଟେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ପ୍ରତ୍ୟେକ ମୃତକଙ୍କ ପରିବାରକୁ 4 ଲକ୍ଷ ଲେଖାଏଁ କ୍ଷତିପୂରଣ ରାଶି ଘୋଷଣା କରିଛନ୍ତି ।
ସୂଚନା ଅନୁସାରେ, ଏହି ରୋଗର ଶିକାର ହେଲେ ଶରୀରରୁ ରକ୍ତ ଶର୍କରା କମ ହେବାସହ ଇଲେକ୍ଟ୍ରୋଲାଇଟ ଅସନ୍ତୁଳିତ ହୋଇଯାଏ । ଏବେ ସୁଦ୍ଧା ଶ୍ରୀକୃଷ୍ଣା ମେଡିକାଲରେ 66 ଜଣଙ୍କ ମୃତ୍ୟୁ ହୋଇଥିବା ବେଳେ କେଜରିଓ୍ବାଲ ହସ୍ପିଟାଲରେ 14 ଜଣଙ୍କ ମୃତ୍ୟୁ ହୋଇଛି ।
ତେବେ ଏହା ପୂର୍ବରୁ ଚିକିତ୍ସା ଅଧିକାରୀଙ୍କ ସହ ସ୍ବାସ୍ଥ୍ୟମନ୍ତ୍ରୀ ମଙ୍ଗଲ ପାଣ୍ଡେ ଆଲୋଚନା କରିବା ସହ ଉତ୍ତମ ଚିକିତ୍ସା ସୁବିଧା ଯୋଗାଇ ଦିଆଯିବ ବୋଲି ପ୍ରତିଶୃତି ଦେଇଥିଲେ । ଏହାସହ ଏହି ରୋଗ ବିଷୟରେ ସ୍ଥାନୀୟ ଲୋକଙ୍କୁ ସରକାରଙ୍କ ପକ୍ଷରୁ ସଚେତନତାର ବାର୍ତ୍ତା ବଣ୍ଟାଯାଉଛି ।
